चेन्नेईनगरम्, ०१ जुलाईमासः (हि.स.)। तमिळनाडु-राज्यस्य राजनीतौ प्रवर्तमानस्य परिवर्तनस्य मध्ये अखिल-भारतीय-अन्ना-द्रविड़-मुनेत्र-कड़गम्-दलस्य पूर्व-विधायकः पूर्व-स्वास्थ्य-मन्त्री च सी.-विजयभास्करः आधिकारिकतया घोषितवान् यत् सः २ जुलाई-दिनाङ्के तमिळगा-वेत्रि-कड़गम्-दलस्य सदस्यतां गृह्णीयात्। सः अवदत् यत् मुख्यमन्त्रिणः विजयस्य नेतृत्वे नव-उत्साहेन जनसेवा-सङ्कल्पेन च स्वस्य राजनैतिक-यात्रां अग्रे नेष्यति।

बुधवासरे प्रकाशिते वक्तव्ये सी.-विजयभास्करः उक्तवान् यत् सः गत-पञ्चत्रिंशद्वर्षेभ्यः राजनीतिमाध्यमेन जनसेवां कुर्वन् अस्ति। तमिळनाडु-राज्यस्य स्वास्थ्य-मन्त्रिरूपेण कार्यं कुर्वन् कोविड्-१९-महामारी-समये अभूतपूर्वस्य सङ्कटस्य अवधौ सः पूर्ण-निष्ठया, समर्पणेन उत्तरदायित्वेन च जनसेवाम् अकरोत्। तस्मिन् कठिन-काले तेन कृतानि कार्याणि राज्यस्य जनाः सम्यक् जानन्ति।

सः अवदत् यत् जनहिताय तमिळनाडु-राज्यस्य विकासाय च स्वस्य सार्वजनिक-जीवनस्य नूतनां दिशां प्रदातुं मुख्यमन्त्रिणः विजयस्य नेतृत्वयुक्ते टीवीके-दले सम्मिलितुं निर्णयं कृतवान्। तेन विश्वासः व्यक्तीकृतः यत् नूतनेन राजनैतिक-मञ्चेन जनहित-कार्याणि अधिक-प्रभावी-रीत्या प्रवर्तयितुं शक्यन्ते।

सी.-विजयभास्करः अवदत् यत् तस्य सदस्यता-ग्रहण-समारोहः २ जुलाई-दिनाङ्के प्रातः ९ वादने मामल्लपुरम्-स्थितस्य एकस्य होटलस्य सभागारे आयोज्यते। सः माध्यम-प्रतिनिधीन् कार्यक्रमे उपस्थितुं तस्य वृत्तान्तस्य प्रसारणं कर्तुं स्वस्य सहयोगं शुभकामनाश्च प्रदातुं प्रार्थितवान्।

उल्लेखनीयम् अस्ति यत् सी.-विजयभास्करः अन्नाद्रमुक-सर्वकारे स्वास्थ्य-जनकल्याण-मन्त्री आसीत्। २०२६ तमस्य वर्षस्य तमिळनाडु-विधानसभा-निर्वाचने सः विरालिमलै-विधानसभा-निर्वाचन-क्षेत्रात् विजयं प्राप्य विधायकः अभवत्। किन्तु अद्यतनकाले सः स्वस्य विधायक-पदात् त्यागपत्रम् अददात्, तदनन्तरं तस्य टीवीके-दले प्रवेशस्य अटकलाः तीव्राः अभवन्। अधुना तेन स्वयमेव तस्य औपचारिकी घोषणा कृता।

तमिळनाडु-विधानसभा-निर्वाचनानन्तरं मुख्यमन्त्रिणः विजयस्य नेतृत्वे तमिळगा-वेत्रि-कड़गम्-दलस्य सर्वकारस्य गठनानन्तरम् अन्नाद्रमुक-दलस्य राजनैतिक-स्थितिः दुर्बला अभवत् तथा दलस्य अन्तः नेतृत्व-विषये मतभेदाः अपि प्रकटिताः। दलं एडप्पाडी-के.-पलानीस्वामी-गुटे तथा सी.-वी.-षण्मुगम्-गुटे विभक्तम् इव दृश्यते। एतस्मिन् मध्ये अन्नाद्रमुक-दलस्य चत्वारः विधायकाः पूर्वमेव त्यागपत्रं दत्त्वा टीवीके-दले सम्मिलितवन्तः। अधुना पूर्व-मन्त्री सी.-विजयभास्करस्य एषः निर्णयः अपि तमिळनाडु-राज्यस्य परिवर्तमान-राजनैतिक-परिस्थितीनां तथा अन्नाद्रमुक-दलाय अन्यत् महत् आघातम् इति परिगण्यते।

Hindusthan Samachar / Divya Ranjan