- प्रदेशस्य पञ्चसहस्रं युवानः सहभागिनः भविष्यन्ति, इन्दौरनगरं क्रान्ति-ज्ञानयोः सङ्गमस्य साक्षी भविष्यति।

- राज्यस्तरीय-युवा-पुरस्काराणां घोषणा भविष्यति।

भोपालनगरम्, १० जुलाईमासः (हि.स.)। मध्यप्रदेशस्य मुख्यमन्त्री डॉ. मोहनयादवः शनिवासरे, ११ जुलाईमासे, इन्दौरस्थिते ब्रिलियण्ट् कन्वेन्शन्-केन्द्रे आयोजितस्य मध्यप्रदेश-युवा-समागम-२०२६ इत्यस्य शुभारम्भं करिष्यति। प्रदेशस्य विविधेभ्यः क्षेत्रेभ्यः आगताः प्रायः पञ्चसहस्रं युवानः अस्मिन् महोत्सवे सहभागित्वं करिष्यन्ति। अस्य आयोजनस्य प्रमुखोद्देश्यं युवाशक्तेः प्रदेशस्य विकासस्य मुख्यधारया सह संयोजनं, तेषां विचाराणां नीतिनिर्माणे समावेशः तथा विविधेषु क्षेत्रेषु यूनां सक्रियसहभागितायाः सुनिश्चितीकरणं च अस्ति।

जनसम्पर्क-अधिकारिणी बबीता मिश्रा शुक्रवासरे अवदत् यत् समागमे शिक्षा, क्रीडा, उद्यमिता, कृषि, स्वास्थ्यं, सूचना-प्रौद्योगिकी, कौशल-विकासः, संस्कृतिः, पर्यावरणं तथा सामाजिक-विकासः इत्यादिषु दश प्रमुखक्षेत्रेषु युवानः सहभागित्वं करिष्यन्ति। समागमस्य विशेषाकर्षणरूपेण क्रान्ति-ज्ञानयोः सङ्गमस्य प्रतीकरूपे द्वे प्रेरणादायिन्यौ यात्रे भविष्यतः। अमर-बलिदानीन: चन्द्रशेखर-आजादस्य जन्मस्थलात् चन्द्रशेखर-आजाद-नगरात् आरब्धा आजाद-युवा-मोटरयान-यात्रा, तथा ओङ्कारेश्वरात्, यत् आदि-शङ्कराचार्यस्य दीक्षास्थली अस्ति, आरब्धा शङ्कर-संकल्प-द्विचक्रिका-यात्रा, उभे अपि ब्रिलियण्ट् कन्वेन्शन-केन्द्रं समागत्य स्वगन्तव्यं प्राप्स्यतः। मुख्यमन्त्री डॉ. यादवः उभयोः यात्रयोः सहभागिनां स्वागतं सम्मानं च करिष्यति।

समागमे युवानः विषयाधारितेषु विभिन्नेषु समूहेषु विभज्य कार्यशालाः आयोजयिष्यन्ते। एतासु कार्यशालासु युवानः स्वस्वक्षेत्रसम्बद्धान् विचारान्, नवाचारान् तथा भाविकार्ययोजनाः विषये विचारविमर्शं कृत्वा क्रियान्वयनयोग्यान् सङ्कल्पान् निर्मास्यन्ति। कार्यशालासु शिक्षा-कौशल-विकासः, क्रीडा-स्वास्थ्यं, एमएसएमई-स्टार्टअप्, कृषि-उद्यानिकी-पर्यावरणम् तथा जन-अभियान-संस्कृति-पर्यटनम् इत्यादिषु विषयेषु विस्तृतचर्चा भविष्यति। प्रत्येकेन समूहेन निर्मितानां सङ्कल्पानां प्रस्तुतिर्मुख्यमञ्चात् करिष्यते।

समागमे प्राप्तानां सर्वेषां विचाराणां सङ्कल्पानां च समेकनं कृत्वा ‘मध्यप्रदेश-युवा-सङ्कल्पः-२०२६’ नाम तथ्यं निर्मास्यते। उपस्थिताः युवानः सामूहिकरूपेण प्रदेशस्य विकासाय, नवाचाराय, सामाजिक-उत्तरदायित्वाय तथा राष्ट्रनिर्माणाय सङ्कल्पं गृह्णीयुः। एतत् सङ्कल्प-तथ्यं मुख्यमन्त्रिणे डॉ. यादवाय समर्पयिष्यते तथा अग्रिम-कार्यवाह्यर्थं सम्बन्धित-विभागेभ्यः प्रेषयिष्यते।

समागमे इन्दौरस्य पारम्परिक-भोजन-संस्कृतेः आधारेण निर्मिता भोजन-वीथिका स्थानीयैः युवा-उद्यमिभिः स्वसहायता-समूहैश्च सञ्चालिता भविष्यति। तथा च स्थानीय-युवा-वाद्य-दलानां लोक-फ्यूजन-कलाकाराणां च सांस्कृतिक-प्रस्तुतयः आयोजनस्य प्रमुखाकर्षणं भविष्यन्ति।

अस्मिन् समागमे मुख्यमन्त्री डॉ. यादवः प्रदेशस्य यूनां प्रोत्साहनार्थं चतस्रः नवीनाः राज्यस्तरीय-युवा-पुरस्कार-श्रेण्यः अपि घोषयिष्यति। तासु मुख्यमन्त्री युवा-शिखर-सम्मानं, मुख्यमन्त्री युवा-नवाचार-पुरस्कारः, मुख्यमन्त्री युवा-समाज-सेवा-पुरस्कारः तथा मुख्यमन्त्री युवा-कला-क्रीडा-गौरव-पुरस्कारः इति समाविष्टाः भविष्यन्ति। एतैः पुरस्कारैः विविधेषु क्षेत्रेषु उत्कृष्टकार्यं कुर्वन्तः युवानः सम्मानिताः प्रोत्साहिताश्च भविष्यन्ति।

मध्यप्रदेश-युवा-समागमः-२०२६ युवाशक्तेः, नवाचारस्य, सामाजिक-उत्तरदायित्वस्य तथा सांस्कृतिक-चेतनायाः समन्वितं मञ्चं भविष्यति, यत्र यूनां विचाराः प्रदेश-विकासस्य सङ्कल्पेषु परिणमिष्यन्ति तथा विकसित-मध्यप्रदेशस्य निर्माणे तेषां सहभागितायै नूतना दिशा प्रदास्यते।

Hindusthan Samachar / Divya Ranjan