पूर्वी सिंहभूमः, 10 जुलाईमासः (हि.स.)।श्रावणमासस्य अवसरे बाबा बैद्यनाथ सेवा संघ इत्यस्य पक्षतः अस्मिन् वर्षे अपि निश्शुल्ककावडयात्रायाः आयोजनं करिष्यते। शुक्रवासरे साकचीस्थिते अग्रसेनभवने आयोजितायां पत्रकारवार्तायां संघस्य संस्थापकसदस्यः विकास सिंहः एतां सूचनां ददन् उक्तवान् यत् अगस्तमासस्य नवमदिनाङ्के जमशेदपुरतः सहस्रश्रद्धालूनां समूहः सुल्तानगञ्जं प्रति प्रस्थास्यति। ततः सर्वे श्रद्धालवः जलं गृहीत्वा पदयात्रां कुर्वन्तः बाबा बैद्यनाथधाम देवघरं प्राप्स्यन्ति तथा जलार्पणस्य अनन्तरं बाबा बासुकीनाथधाम्नः अपि दर्शनं करिष्यन्ति। सम्पूर्णा यात्रा अष्टदिनात्मिका भविष्यति।

सः सूचितवान् यत् यात्रायां सम्मिलितुं पञ्जीकरणप्रक्रिया जुलाईमासस्य विंशतितमदिनाङ्कात् प्रारप्स्यते। पञ्जीकरणं प्रथमम् आगच्छ प्रथमं प्राप्नुहि इत्यस्य आधारस्य अनुसारं करिष्यते। अस्यां यात्रायाम् अष्टादशवर्षाधिकाः षष्टिवर्षन्यूनाः च श्रद्धालवः भागं ग्रहीतुं शक्ष्यन्ति। सर्वेभ्यः पञ्जीकृतश्रद्धालुभ्यः छायाचित्र चलदूरभाषसङ्ख्यायुक्तानि परिचयपत्राणि प्रदास्यन्ते येषां माध्यमेन ते यात्राकाले आरक्षितस्थलेषु प्रवेशसहिताः सर्वाः सुविधाः निश्शुल्कं प्राप्स्यन्ति।

विकास सिंहः सूचितवान् यत् जनसम्मर्दकाले श्रद्धालूनाम् अभिज्ञानं सरलं कर्तुं सर्वेषां कावडयात्रिणां कृते समानः वेशसंहिता निर्धारिता अस्ति। सुल्तानगञ्जतः देवघरपर्यन्तं कावडमार्गे धर्मशालानाम् अन्येषां विश्रामस्थलानां च पूर्वव्यवस्था कृता अस्ति। प्रत्येकस्मिन् विश्रामस्थले श्रद्धालूनां कृते भोजनस्य विश्रामस्य स्वास्थ्यसेवायाः सांस्कृतिककार्यक्रमाणां च व्यवस्था भविष्यति। ईनारावरणस्थितायां भूतनाथधर्मशालायां छत्तीसगढस्य कलाकारैः रावणवधस्य जीवन्तझाङ्की अपि प्रस्तोष्यते।

संघस्य पक्षतः यात्रायां सम्मिलितेभ्यः सर्वेभ्यः श्रद्धालुभ्यः बसयानानि निवासव्यवस्था भोजनं चिकित्सासुविधा तथा अन्याः आवश्यकसेवाः पूर्णतया निश्शुल्कम् उपलब्धाः कारयिष्यन्ते। संघेन इच्छुकश्रद्धालवः समये पञ्जीकरणं कर्तुम् आहूताः यतः स्थानानाम् आवंटनं सीमितसङ्ख्यायाः आधारेण करिष्यते।

---------------

Hindusthan Samachar / Dheeraj Maithani