पश्चिमसिंहभूमिः, १० जुलाईमासः (हि.स.)। जनपदे आदिवासी-समाजसम्बद्धानां विविध-विषयाणां सम्बन्धे शुक्रवासरे चाईबासा-स्थितस्य पुरातन-उपायुक्त-कार्यालयस्य समीपे ‘सम्पूर्ण-क्रान्तेः आह्वानम्’ इति ध्वजपटस्य अन्तर्गतं धरणा-प्रदर्शनम् आयोजितम्। अस्य कार्यक्रमस्य नेतृत्वं मुख्य-संयोजकेन रेयांश-सामडेन कृतम्। विरोधप्रदर्शने बहुसंख्यया महिला-पुरुष-सामाजिक-कार्यकर्तारः, बेरोजगार-युवक-युवत्यः, कृषकाः, श्रमिकाः तथा विभिन्न-सङ्घटनानां प्रतिनिधयः सहभागिनः अभवन्।

धरणा-प्रदर्शनस्य समये पश्चिमसिंहभूमेः जनपदादण्डाधिकरण-सह-उपायुक्तस्य माध्यमेन राज्यपालाय सन्तोष-कुमार-गङ्गवाराय संयुक्त-याचनापत्रम् प्रेषितम्। तस्मिन् याचनापत्रे आरोपः कृतः यत् राज्ये मुख्यमन्त्रिणा सह बहुसंख्यकाः आदिवासी-विधायकाः सांसदाश्च सन्ति, तथापि आदिवासी-समाजस्य समस्याः न समाधीयन्ते। तत्र जल-जङ्गल-भूमिषु वर्धमानः सङ्कटः, बेरोजगारी, स्वास्थ्य-सेवानां दुर्दशा तथा संवैधानिक-अधिकाराणां उल्लङ्घनस्य उल्लेखः कृतः।

याचनापत्रे सीएनटी तथा एसपीटी अधिनियमयोः उल्लङ्घनस्य निरोधनम्, वनाधिकार-अधिनियमस्य सम्यक् पालनम्, आदिवासी-भूमिषु अवैध-अधिग्रहणस्य निष्कासनम् तथा अवैध-भूमि-हस्तान्तरणस्य निरोधनं च प्रार्थितम्। तदतिरिक्तं युवभ्यः विशेष-नियुक्ति-अभियानस्य सञ्चालनम्, लम्बित-शासकीय-नियुक्तीनां पूर्तिः तथा आरक्षणस्य पूर्ण-लाभस्य प्रदानम् इति याचना: अपि प्रस्तुताः।

कृषकाणां कृते न्यूनतम-समर्थन-मूल्यस्य प्रत्याभूतिः, सिञ्चन-सुविधानां विस्तारः, श्रमिकाणां कृते न्यूनतम-वेतनस्य कठोर-पालनम्, सामाजिक-सुरक्षा-योजनानां लाभः तथा शोषणस्य निरोधनम् अपि याचनापत्रे समाविष्टम्।

तस्मिन् याचनापत्रे आन्दोलनकारिषु पञ्जीकृतानां प्रकरणानां प्रत्याहारः, दंडप्रहार-पीडितेभ्यः क्षतिपूर्तिः, शान्तिपूर्ण-प्रदर्शनस्य अधिकारस्य संरक्षणम्, चाईबासा-सदर-चिकित्सालयेन सह स्वास्थ्य-सुविधानां सुधारः, ग्रामसभानां सशक्तीकरणम्, पञ्चम-अनुसूच्याः प्रभावी-क्रियान्वयनम् तथा परिसीमन-प्रक्रियायाम् आदिवासी-प्रतिनिधित्वस्य संरक्षणम् इत्यादयः याचना: अपि समाविष्टाः आसन्।

विरोधप्रदर्शनं सम्बोधयन् रेयांश-सामडः अवदत् यत् आदिवासी-समाजसम्बद्ध-विषयेषु त्वरित-कार्यवाही अपेक्षिता अस्ति। तेन राज्यपालात् उच्चस्तरीय-समितेः गठनं कृत्वा प्रकरणानां अन्वेषणं कारयितुं प्रतिनिधिमण्डलाय च साक्षात्काराय समयं दातुम् आग्रहः कृतः।

धरणा-प्रदर्शने माधवचन्द्र-कुङ्कलः, सुरेशचन्द्र-सोयः, रविन्द्र-आल्डा, सुशीला-बोदरा, सुष्मिता-बारी, ऊषाराणी-सवैया, सुमी-सिङ्कू, तुरी-सुण्डी, हरीश-आल्डा, सुभाषचन्द्र-सिङ्कू, बीरसिंह-बालमुचू, नितिन-जामूडा इत्यादयः बहवः जनाः उपस्थिताः आसन्।

Hindusthan Samachar / Divya Ranjan