सूरतम्, 10 जुलाईमासः (हि.स.)।

केन्द्रीयशिक्षाराज्यमन्त्री जयन्त चौधरी अवदत् यत् शिक्षा न कस्यचित् एकस्य विभागस्य अथवा व्यक्तेः उत्तरदायित्वम्, अपितु समग्रस्य समाजस्य सामूहिकम् उत्तरदायित्वम् अस्ति। सः शिक्षकान् विद्यार्थिनां सर्वाङ्गीणविकासे विशेषावधानं दातुम् आह्वयन् अवदत् यत् शिक्षकाः केवलं ज्ञानप्रदातारः न सन्ति, अपितु समाजस्य भविष्यनिर्माणकर्तारः पथप्रदर्शकाश्च सन्ति।

सूरतनगरस्य पालक्षेत्रस्थिते संजीवकुमारप्रेक्षागृहे जिलाशिक्षाधिकारीकार्यालयस्य सूरतस्य तथा एसआरके नॉलेज फाउण्डेशनस्य संयुक्ततत्त्वावधाने आयोजितं ‘शिक्षायाः शिल्पकाराः’ सम्मानसमारोहं सम्बोधयन् केन्द्रीयमन्त्री सम्मानितेभ्यः प्राचार्येभ्यः शिक्षकेभ्यश्च अभिनन्दनानि अददात्। सः अवदत् यत् शिक्षणं विश्वस्य श्रेष्ठतमेषु व्यवसायेषु अन्यतमम् अस्ति तथा शिक्षकाः स्वधैर्येण समर्पणेन कर्तव्यनिष्ठया च विद्यार्थिनां व्यक्तित्वनिर्माणेन सह समाजस्य उत्थाने महत्त्वपूर्णां भूमिकां निर्वहन्ति।

जयन्त चौधरी अवदत् यत् राष्ट्रियशिक्षानीतिः विद्यार्थिनः केवलं पुस्तकीयज्ञानपर्यन्तं सीमितान् न करोति, अपितु व्यावहारिकशिक्षायां कौशलाधारितशिक्षायां च समानरूपेण बलं ददाति। अनेन युवानः स्वप्रतिभानुसारम् अग्रे गत्वा विकसितभारतस्य निर्माणे योगदानं दातुं शक्ष्यन्ति। सः शिक्षकान् आग्रहं कृतवान् यत् ते विद्यार्थिनां मित्राणि भवन्तु, तान् अध्ययनस्य परीक्षायाश्च अनावश्यकतनावात् बहिः आनयन्तु तथा सकारात्मकं प्रेरणादायकं च शैक्षणिकवातावरणम् उपलब्धं कारयन्तु।

कार्यक्रमे गुजरातमण्डलसहितेषु विभिन्नशिक्षामण्डलेषु शतप्रतिशतं परिणामं प्रदत्तवतां पञ्चषष्ट्यधिकत्रिशतविद्यालयानां प्राचार्याः, परीक्षायां लेखकत्वेन ‘लहिया’रूपेण सेवां प्रदत्तवन्तः एकोनसप्ततिः विद्यार्थिनः तथा अनुदानितमाध्यमिक उच्चतरमाध्यमिकविद्यालयानां त्रिषष्ट्यधिकशतं शिक्षकाः पूर्णवेतनादेशपत्राणि प्रदाय सम्मानिताः।

अस्मिन् अवसरे राज्यसभासांसदः गोविन्दभाई ढोलकिया, पुलिसायुक्तः वाबांग जामीर, वीएनएसजीयू इत्यस्य कुलपतिः डॉ. किशोरसिंह चावड़ा, सांसदः मनु रवि तेलंगाना, लोकसभासदस्या रूपकुमारी छत्तीसगढ़, जिलाशिक्षाधिकारी डॉ. भागीरथसिंह परमार, एसआरके फाउण्डेशनस्य पदाधिकारिणः, विभिन्नविद्यालयानां प्राचार्याः, शिक्षकाः तथा बहुसंख्यकाः विद्यार्थिनः उपस्थिताः आसन्।

---------------

Hindusthan Samachar / Dheeraj Maithani