नव दिल्ली, 10 जुलाईमासः (हि.स.)।

उपराष्ट्रपतिः सीपी राधाकृष्णन् उक्तवान् यत् वन्दे मातरम् मातृभूमिं प्रति प्रेम पवित्रे राष्ट्रियकर्तव्ये परिवर्तितवान् तथा स्वतन्त्रतासङ्ग्रामकाले असंख्यान् सेनानीन् साहसेन त्यागेन आशया च प्रेरितवान्। सः उक्तवान् यत् सरदार वल्लभभाई पटेलः न केवलं देशीरियासतानाम् अपितु देशवासिनां हृदयानाम् अपि एकीकरणं कृतवान् तथा एकस्य राष्ट्रस्य एकस्य संविधानस्य च सामूहिकराष्ट्रियभविष्यस्य सुदृढाम् आधारशिलां स्थापितवान्।

उपराष्ट्रपतिः शुक्रवासरे शिमलास्थेन इण्डियन इन्स्टिट्यूट आफ एडवान्स्ड स्टडी आईआईएएस इत्यनेन आयोजितायाः वन्दे मातरम् इत्यस्य यात्रा इति विषयकायाः स्थायिप्रदर्शन्याः उद्घाटनं तथा सरदार पटेलस्य दृष्टिः एकीकरणम् एकजुटता संघवादश्च इति विषयकस्य अन्तरराष्ट्रियसङ्गोष्ठ्याः उद्घाटनसत्रं च आभासीयमाध्यमेन सम्बोधयन् आसीत्।

सः उक्तवान् यत् वन्दे मातरम् केवलं गीतं न अपितु भारतस्य स्वतन्त्रचेतनायाः प्रतीकम् अस्ति। अनेन देशभक्तेः भावना जने जने प्रसारिता तथा स्वतन्त्रतान्दोलनाय नवीना ऊर्जा प्रदत्ता। सः उक्तवान् यत् अद्यापि एतत् गीतं राष्ट्रं प्रति समर्पणस्य आत्मगौरवस्य राष्ट्रियैकतायाश्च प्रेरणास्रोतः अस्ति।

सरदार वल्लभभाई पटेलं प्रति श्रद्धाञ्जलिं समर्पयन् उपराष्ट्रपतिः उक्तवान् यत् सः देशीरियासतानां सफलतापूर्वकं विलयं कृत्वा आधुनिकभारतस्य राजनैतिकं प्रशासनिकं च एकीकरणं साकारितवान्। तस्य दूरदर्शिना नेतृत्वेन भारतं सुदृढराष्ट्ररूपेण सङ्गठितराष्ट्ररूपेण च प्रतिष्ठापयितुं निर्णायिका भूमिका निर्व्यूढा।

सः उक्तवान् यत् वास्तविकदेशभक्तिः केवलं शब्देषु सीमिता न भवेत् अपितु सत्यनिष्ठायाः उत्कृष्टकार्यसंस्कृतेः राष्ट्रियैकतां प्रति समर्पणस्य च रूपेण प्रतिदिनम् अस्माकम् आचरणे दृश्येत। सः नागरिकान् आहूतवान् यत् ते वन्दे मातरम् इत्यस्य शाश्वतसन्देशं सरदार पटेलस्य राष्ट्रनिर्माणादर्शांश्च अग्रे नयन्तः एकीकृतस्य आत्मविश्वासयुक्तस्य समावेशिनश्च भारतस्य निर्माणाय स्वसङ्कल्पं अधिकं सुदृढं कुर्युः।

अस्मिन् अवसरे भारतीय उच्च अध्ययन संस्थानेन वन्दे मातरम् इत्यस्य यात्रा इति विषयिका स्थायिप्रदर्शनी उद्घाटिता तथा सरदार पटेलस्य राष्ट्रियैकतायाः एकीकरणस्य भारतीयसङ्घीयव्यवस्थासम्बद्धायाश्च दृष्टेः विषये केन्द्रितायाः अन्ताराष्ट्रियसङ्गोष्ठ्याः शुभारम्भः अपि अभवत्।

-------------

Hindusthan Samachar / Dheeraj Maithani