-आदित्य बिड़ला समूहकंसारीगुड़ा एल्यूमिना रिफाइनरी विस्तारे व्ययीकरिष्यन्ति ₹12,000कोटिरूप्यकाणि

भुवनेश्वरम्, 11 जुलाईमासः (हि.स.)। आदित्यबिडलासमूहेन ओडिशाराज्यस्य रायगडाजिले काशीपुरतहसीले स्थितायाः कंसारीगुडाग्रीनफील्डएल्यूमिनारिफाइनरीपरियोजनायाः विस्तारार्थम् अतिरिक्तद्वादशसहस्रकोटिरूप्यकाणां निवेशस्य प्रस्तावः प्रस्तुतः। अनेन विस्तारेण परियोजनायां कुलनिवेशः वर्धमानः प्रायः विंशतिसहस्रकोटिरूप्यकपरिमाणं प्राप्स्यति।

अस्मिन् निवेशप्रस्तावे शनिवासरे मुख्यमन्त्रिणः मोहनचरणमाझिनः आदित्यबिडलासमूहस्य अध्यक्षस्य कुमारमङ्गलम्बिडलस्य च मध्ये सम्पन्नायां सभायां विस्तरेण चर्चा अभवत्। सभायां ओडिशाराज्ये समूहस्य वर्तमानानां प्रस्तावितानां च औद्योगिकपरियोजनानां प्रगतिः समीक्षिता तथा तासां शीघ्रक्रियान्वयनार्थम् आवश्यकसहयोगस्य विषये विचारविमर्शः कृतः।

हिन्दाल्कोइण्डस्ट्रीज् लिमिटेडद्वारा निर्मीयमाणायाः अस्याः एल्यूमिनारिफाइनरीपरियोजनायाः प्रारम्भिकक्षमता प्रतिवर्षं दशलक्षटनपरिमिता निर्धारिता आसीत्, यस्याः कृते प्रायः अष्टसहस्रकोटिरूप्यकाणां निवेशः प्रस्तावितः आसीत्। नवीनविस्तारप्रस्तावस्य अन्तर्गतं प्रतिवर्षं विंशतिलक्षटनपरिमिता अतिरिक्तक्षमता संयोजिता भविष्यति, येन रिफाइनरीपरियोजनायाः कुलक्षमता प्रतिवर्षं त्रिंशल्लक्षटनपरिमिता भविष्यति।

राज्यसर्वकारस्य अनुसारम् अस्याः विस्तारपरियोजनायाः फलस्वरूपं प्रत्यक्षतया परोक्षतया च बृहद्प्रमाणे रोजगारावकाशाः सृज्यन्ते। सहैव स्थानीयोद्योगानां सेवाप्रदातॄणां अधोवर्तीविनिर्माणैककानां च प्रोत्साहनम् अपि भविष्यति।

मुख्यमन्त्री मोहनचरणमाझी निवेशप्रस्तावस्य स्वागतं कृत्वा उक्तवान् यत् ओडिशाराज्यस्य समृद्धानां खनिजसम्पदां लाभः राज्ये एव मूल्यसंवर्धनस्य उन्नतविनिर्माणस्य गुणवत्तापूर्णरोजगारस्य च रूपेण दृश्यः भवेत्। सः उक्तवान् यत् एल्यूमिनियमक्षेत्रं राज्यस्य औद्योगिकविकासनीतेः प्रमुखाधारः अस्ति तथा च सर्वकारः एल्यूमिनारिफाइनिंग् प्राथमिकएल्यूमिनियमोत्पादनस्य अधोवर्तीविनिर्माणस्य च वैश्विकस्तरीयम् औद्योगिकपारिस्थितिकतन्त्रं विकसितुं प्रतिबद्धः अस्ति।

मुख्यमन्त्री परियोजनायाः समयबद्धक्रियान्वयनार्थं राज्यसर्वकारस्य पक्षतः भूमेः आधारभूतसंरचनायाः विद्युतः जलस्य वैधानिकस्वीकृतीनां अन्येषां आवश्यकसुविधानां च प्रदाने सर्वथा सहयोगस्य आश्वासनम् अपि दत्तवान्।

सभायाम् आदित्यबिडलासमूहस्य एल्यूमिनियम एल्यूमिना रसायन सीमेण्ट नवीकरणीयऊर्जा वस्त्र परिधानक्षेत्रेषु प्रचलितानां प्रस्तावितानां च निवेशानां समीक्षा अपि कृता। तदतिरिक्तं ताम्रशोधनस्य ताम्रसंयुक्तस्तरपत्राणां मुद्रितपरिपथफलकानां तकनीकीवस्त्राणां वर्णकानां आभूषणनिर्माणस्य उन्नतएल्यूमिनियमोत्पादानां च क्षेत्रेषु भविष्यकालीननिवेशावकाशानां विषये अपि चर्चा अभवत्।

कंसारीगुडाएल्यूमिनारिफाइनरीपरियोजनायाः प्रस्तावितविस्तारेण ओडिशाराज्यस्य देशे धातुक्षेत्रे खनिजप्रसंस्करणे मूल्यसंवर्धितविनिर्माणे च प्रमुखकेन्द्ररूपेण स्थितिः अधिकं सुदृढा भविष्यतीति अपेक्षा अस्ति।

--------------

Hindusthan Samachar / Dheeraj Maithani