पटनानगरम्, ११ जुलाईमासः (हि.स.)। बिहारस्य मुख्यमन्त्री सम्राट चौधरी शनिवासरे राज्यस्य अत्याधुनिकस्य डिजिटल-तथा-कर्गदरहित-पञ्जीकरण-व्यवस्थायाः अन्तर्गतं गृहपञ्जीकरणम्, भूमिसम्बद्धम् अन्तर्जाल-परीक्षणम्, कर्गदरहितं पञ्जीकरणम् तथा जी.आई.एस.-प्रौद्योगिकी-आधारित-स्थलनिरीक्षणम् इति चतस्रः नूतनाः सेवाः उद्घाटितवान्। अस्मिन् अवसरे सः अवदत् यत् बिहारप्रदेशः डिजिटल-प्रशासनस्य दिशि तीव्रगत्या अग्रे गच्छति तथा च नूतनया व्यवस्थया भूमिपञ्जीकरण-प्रक्रिया अधिका सरला, सुरक्षिता, पारदर्शिनी विश्वसनीया च भविष्यति।

मुख्यमन्त्री पञ्चसप्ततिवर्षाधिक-वयस्कानां नागरिकानां कृते प्रारब्धायाः गृहपञ्जीकरणसेवायाः निमित्तं चलत्-पञ्जीकरण-एककयानानि हरितध्वजं प्रदर्श्य प्रेषितवान्। कार्यक्रमे दृक्श्राव्यमाध्यमेन राज्यस्य प्रथमस्य डिजिटल-गृहपञ्जीकरणलाभार्थिनः त्र्यशीतिवर्षीयस्य अवधेशकुमारस्य पञ्जीकरणप्रक्रियायाः प्रत्यक्षप्रदर्शनम् अपि कृतम्। अस्मिन् अवसरे मद्यनिषेध-उत्पाद-निबन्धनविभागेन विकसितायाः कर्गदरहितपञ्जीकरणप्रणाल्याः विषये लघुचलचित्रम् अपि प्रदर्शितम्।

मुख्यमन्त्री अवदत् यत् वृद्धजनानां सुविधां दृष्ट्वा गृहपञ्जीकरणसेवायाः निर्धारित-वयोमर्यादा परिवर्तिता। पूर्वम् एषा सेवा केवलम् अशीतिवर्षाधिकवयस्केभ्यः नागरिकेभ्यः प्रस्ताविता आसीत्, किन्तु अधुना सा पञ्चसप्ततिवर्षाधिकवयस्केभ्यः अपि उपलब्धा भविष्यति। तेन उक्तं यत् सर्वकारस्य उद्देश्यं सामान्यनागरिकाणाम् ‘सुगमजीवनम्’ वर्धयितुं तथा शासकीयसेवान् अधिकाः सरलाः, पारदर्शिन्यः समयबद्धाश्च कर्तुम् अस्ति।

मुख्यमन्त्री अवदत् यत् राज्यात् बहिः निवसमानेभ्यः बिहारवासिभ्यः अपि पारिवारिकविभाजनादिकार्यार्थं तथा भूमिसम्बद्धकार्येषु आवेदनाधारित-डिजिटल-पञ्जीकरणस्य सुविधा प्रदास्यते। सर्वेषु पञ्जीकरणकार्यालयेषु आगच्छतां जनानां कृते आवश्यकमूलभूतानां सुविधानां सुनिश्चिती-करणाय अपि निर्देशाः दत्ताः।

सम्राट चौधरी अवदत् यत् नूतनव्यवस्थायां भूमिक्रय-विक्रयात् पूर्वं जी.आई.एस.-प्रौद्योगिक्या तथा अन्तर्जाल-सत्यापनद्वारा भूमेः वास्तविकस्थितेः पुष्टि: क्रियते। अनेन क्रेतृणां हितानि सुरक्षितानि भविष्यन्ति, भूमिविवादाः न्यूनाः भविष्यन्ति, व्यवहारेषु पारदर्शिता विश्वासश्च वर्धिष्यते। तेन उक्तं यत् पञ्जीकरण-सम्बद्धानि सर्वाणि अभिलेख-पत्राणि अधुना आवेदनकर्तृभ्यः व्हाट्सएप तथा ई-मेल माध्यमेन अपि प्रेषितानि भविष्यन्ति।

मुख्यमन्त्री अवदत् यत् १५ जुलाईमासात् आरभ्य बिहारस्य विभिन्नेषु प्रखण्डेषु २१३ नूतनाः स्नातकमहाविद्यालयाः प्रारभ्यन्ते, येन दूरस्थग्रामीणक्षेत्रेष्वपि उच्चशिक्षायाः विस्तारः भविष्यति। तेन उक्तं यत् डिजिटल-बिहारनिर्माणस्य दिशि कर्गद-रहितपञ्जीकरणप्रणाली महत्त्वपूर्णः ऐतिहासिकः च प्रयत्नः अस्ति।

कार्यक्रमे मुख्यमन्त्री डिजिटल-पञ्जीकरणप्रणालीं विकसितवन्तं सेवाप्रदायकसंस्थायाः सम्बद्धान् जनान् सम्मानितवान्। तस्य आगमनसमये जीविका-दीदी-समूहस्य महिलाभिः स्वागतगीतम् प्रस्तुतम्। स्थानीयजन-प्रतिनिधिभिः, मद्यनिषेध-उत्पाद-निबन्धनविभागस्य अधिकारिभिः तथा जनपदप्रशासनस्य अधिकारिभिः पुष्पगुच्छं स्मृतिचिह्नं च समर्प्य मुख्यमन्त्रिणः स्वागतं कृतम्।

Hindusthan Samachar / Divya Ranjan