नव दिल्ली, 11 जुलाईमासः (हि.स.)।भारतीयनौसेनायाः सामुद्रिकबेडे अद्य अपरः उन्नतः स्टेल्थफ्रिगेटः महेन्द्रगिरिः समावेशितः। रक्षामन्त्री राजनाथसिंहः विशाखापत्तनमे महेन्द्रगिरिं तस्मिन् समये नौसेनायां समावेशितवान् यस्मिन् भारतस्य पूर्वसामुद्रिकतटस्य सामरिकं सामुद्रिकं च महत्त्वं निरन्तरं वर्धते। महेन्द्रगिरेः नौसेनायां समावेशेन हिन्दमहासागरप्रदेशे भारतस्य पर्यवेक्षणक्षमता सञ्चालनपरिधिश्च पर्याप्तरूपेण वर्धिष्यते। अयं फ्रिगेटः नौसेनायाः पूर्वबेडे स्थाप्यते।

प्रोजेक्ट सत्रह ए वर्गस्य षष्ठः स्टेल्थफ्रिगेटः महेन्द्रगिरिः केवलम् एकं जलयानं नास्ति अपितु मेक इन इण्डिया इति भावनायाः अस्माकं स्वदेशीयनौकानिर्माणकेन्द्राणां अभियान्त्रिकक्षमतायाश्च षट्सहस्र षट्शत सप्ततिटनपरिमितम् मूर्तस्वरूपम् अस्ति। भारतीयनौसेनायाः युद्धपोतविन्यासविभागेन स्वकीयरीत्या विनिर्मितः मुम्बईनगरस्थितेन मझगांव डाक शिपबिल्डर्स लिमिटेड संस्थया निर्मितश्च अयं फ्रिगेटः पूर्वविन्यासेभ्यः एकपीढीपर्यन्तम् उन्नतः अस्ति। पञ्चसप्ततिशताधिकस्वदेशीयसामग्रीयुक्तम् एतत् जलयानं द्विशताधिकसूक्ष्म लघु मध्यमोद्यमेषु विस्तृतस्य स्वदेशीयौद्योगिकपरितन्त्रस्य परिपक्वतां प्रकाशयति। संयुक्तडीजल अथवा गैस प्रणोदनसंयन्त्रेण सञ्चालितः महेन्द्रगिरिः उच्चवेग उच्चधैर्ययुक्तबहुपयोगितायै बहुआयामीयसमुद्रीयसञ्चालनाय च विनिर्मितः अस्ति।

अस्य जलयानस्य आयुधसमूहः विश्वस्तरीयः अस्ति। तस्मिन् अतिध्वनिवेगयुक्ताः पृष्ठतः पृष्ठं प्रहारक्षमाः प्रक्षेपास्त्राणि मध्यमदूरप्रहारिणः पृष्ठतः आकाशं प्रहारक्षमाः प्रक्षेपास्त्राणि विशेषश्च पनडुब्बीप्रतिरोधियुद्धसमूहः समाविष्टः अस्ति। एतानि सर्वाणि तन्त्राणि अत्याधुनिकेन युद्धप्रबन्धनप्रणाल्या सम्यक् एकीकृतानि सन्ति येन चालकदलम् अत्यन्तं सूक्ष्मतया सर्वान् संकटान् प्रत्युत्तरं दातुं समर्थम् अस्ति। अस्य स्टेल्थफ्रिगेटस्य लचीला अभियानरचना उच्चतीव्रतायुक्तयुद्धात् आरभ्य मानवीयसहायतायै आपद्राहतकार्यपर्यन्तं सर्वेषु कार्येषु उपयुक्ता अस्ति। भारतीयनौसेना युद्धसज्जा एकबद्धा विश्वसनीया आत्मनिर्भरशक्तिरूपेण निरन्तरं प्रबलतां गच्छति। महेन्द्रगिरिः उदयमानस्य सामुद्रिकबलस्य राष्ट्रस्य नीलसीमानां दृढरक्षकस्य च उज्ज्वलभविष्याय सज्जः अस्ति।

नौसेनायाः कप्तानः विवेकमधवालः अवदत् यत् अस्माकं नौसेना फारसखाडीप्रदेशे भवतु अथवा मलक्कासङ्कटे हिन्दमहासागरे निरन्तरं स्वसन्निधिं धारयति। यदा यदा कश्चन संकटः समुपतिष्ठति तदा तदा निर्गमनाभियानम् अस्तु मानवीयसहायताप्रदानम् अस्तु वा अस्माकं नौसेना सर्वदा अग्रे तिष्ठति। अस्माकं नौसेना भारतस्य मूल्यानां प्रतिबद्धतायाश्च प्रतीकम् अस्ति। आईएनएस महेन्द्रगिरेः समावेशेन अस्माकं नौसेनायाः शक्तिः मूल्यानि प्रतिबद्धता च अधिकं सुदृढा भविष्यन्ति। अस्माभिः केवलं स्वकीयान् समुद्रतटान् सुरक्षितान् कर्तुमेव न पर्याप्तम् अपितु महत्त्वपूर्णान् सामुद्रिकमार्गान् सङ्कीर्णसमुद्रमार्गान् डिजिटलाधारसंरचनां च सुरक्षितां कर्तुमपि आवश्यकम्।

भारतीयनौसेनया गतवर्षात् आरभ्य अद्यपर्यन्तं द्वादश जलयानानि एकः पनडुब्बीपोतः एकं वायुयानस्क्वाड्रनं च समावेशितम्। स्वस्य प्रबलयुद्धक्षमताभिः सह महेन्द्रगिरिः भारतस्य वर्धमानस्य आत्मनिर्भरत्वस्य प्रतीकः अस्ति। अस्मिन् जलयाने पञ्चसप्ततिशताधिकस्वदेशीयसामग्री अस्ति। अस्य मञ्चस्य निर्माणं समानवर्गीयजलयानेभ्यः प्रायः पञ्चदशप्रतिशतं न्यूनकाले सम्पन्नम्। पूर्वघाटप्रदेशस्थितायाः राजसीयायाः महेन्द्रगिरिपर्वतश्रेण्याः नाम्ना नामितः भारतीयनौसेनायाः अयं युद्धपोतः महेन्द्रगिरिः वास्तवमेव अद्वितीयः अस्ति। इदानीं सः विशिष्टां परम्परां निर्मातुं भारतस्य सामुद्रिकइतिहासे अपरम् गौरवपूर्णम् अध्यायं योजयितुं सज्जः अस्ति।

Hindusthan Samachar / Dheeraj Maithani