जयपुरम्, ११ जुलाईमासः (हि.स.)। राज्यसर्वकारः उद्यमितायाः प्रोत्साहने, स्थानीय-उत्पादानां वैश्विक-परिचय-प्रदाने तथा राजस्थानं प्रमुख-औद्योगिक-राज्यरूपेण स्थापयितुं पूर्णतया प्रतिबद्धः अस्ति। एतदेव उद्देश्यम् अधिगम्य रीको-संस्थया सञ्चालिता प्रत्यक्ष-आवण्टन-योजना सरला, पारदर्शिनी तथा त्वरिता कृता अस्ति। अस्याः योजनायाः द्वादशं चरणं १५ जुलाईमासात्, २०२६ दिनाङ्कात् आरभ्यते।

राइजिङ्ग-राजस्थान-इन्वेस्टमेण्ट-समिट-कार्यक्रमस्य अन्तर्गतं राज्यसर्वकारेण सह एमओयू-सन्धिं निष्पादितवन्तः उद्यमिनः अस्याः योजनायाः लाभं प्राप्नुवन्ति। ये निवेशकाः अद्यापि एमओयू-सन्धिं न कृतवन्तः, ते अपि आवेदन-पत्रस्य तथा ईएमडी-धनराशेः समर्पणस्य अन्तिम-तिथेः पूर्वं एमओयू निष्पाद्य प्रत्यक्ष-आवण्टन-योजनायाः द्वादशतमे चरणे भागं ग्रहीतुं शक्नुवन्ति।

द्वादशतमे चरणे रीको-संस्थया प्रदेशस्य शताधिकेषु औद्योगिक-क्षेत्रेषु पञ्चसहस्राधिकाः औद्योगिक-तथा-लॉजिस्टिक-भूखण्डाः निवेशकेभ्यः उपलब्धाः क्रियन्ते। अस्मिन् चरणे नवीन-औद्योगिक-क्षेत्रे आईजीपी-बोरानाडा-विस्तारः इति स्थले चतुर्दश औद्योगिक-भूखण्डाः अपि आवण्टनार्थं समावेशिताः सन्ति।

अस्य चरणस्य ई-लॉटरी-प्रक्रिया ३१ जुलाईमासे २०२६ दिनाङ्के आयोजिता भविष्यति। येषां भूखण्डानां कृते केवलम् एकम् आवेदनं प्राप्तं भविष्यति, तेषां प्रत्यक्षम् आवण्टनं भविष्यति। यदि एकस्मिन् भूखण्डे एकाधिकानि आवेदनानि प्राप्स्यन्ते, तर्हि पूर्ण-पारदर्शितां सुनिश्चित्य ई-लॉटरी-प्रणाल्या भूखण्डानाम् आवण्टनं क्रियते। निवेशकानां वर्धमानाम् अभिरुचिं दृष्ट्वा प्रत्यक्ष-आवण्टन-योजनायाः वैधता-अवधिः ३१ दिसम्बरमास:, २०२६ पर्यन्तं विस्तारितः अस्ति।

रीको-संस्थायाः प्रबन्ध-निदेशकः सुरेश-कुमार-ओला अवदत् यत् उद्योग-वाणिज्य-मन्त्री कर्नल-राज्यवर्धन-सिंह-राठौडस्य अभिप्रायः अस्ति यत् प्रदेशे आधुनिक-आधारभूत-अवसंरचनया, निवेश-अनुकूल-नीतिभिः तथा पारदर्शी-प्रक्रियाभिः युक्तं औद्योगिक-वातावरणं विकसितं भवेत्, यत्र उद्योगाः सुकरतया स्थापयितुं विकसितुं च शक्येरन्। एतस्यैव ध्येयस्य पूर्त्यर्थं रीको-संस्था निरन्तरं सक्रियतया प्रतिबद्धतया च कार्यं करोति।

तेन उक्तं यत् प्रत्यक्ष-आवण्टन-योजनायाः अद्यावधि एकादश चरणाः सफलतया सम्पन्नाः सन्ति। एतेषु चरणेषु १,८४४ औद्योगिक-भूखण्डानाम् आवण्टनं कृतम्, येषां माध्यमेन प्रदेशे १८,००० कोटि-रूप्यकाधिकस्य निवेशस्य तथा ३७,००० अधिक-युवानां रोजगार-सृजनस्य मार्गः प्रशस्तः अभवत्। एतदतिरिक्तं ४६६ भूखण्डानाम् आवण्टनं सम्प्रति प्रक्रियाधीनम् अस्ति, येषां माध्यमेन २,१०० कोटि-रूप्यकाधिक-निवेशस्य सम्भावना वर्तते।

Hindusthan Samachar / Divya Ranjan