Enter your Email Address to subscribe to our newsletters
बलरामपुरम्, ११ जुलाईमासः (हि.स.)। लौहपुरुषस्य भारतरत्नस्य सरदार-वल्लभभाई-पटेलस्य १५०तम-जयंत्याः तथा राष्ट्रियैकतादिवसस्य अवसरे शनिवासरे रामानुजगञ्ज-थानापरिसरे वृक्षारोपण-कार्यक्रमः आयोजितः। अस्मिन् कार्यक्रमे आरक्षक-अधिकारिणः, आरक्षक-सैनिका:, स्थानीय-पत्रकाराश्च संयुक्तरूपेण फलच्छायादातृण: वृक्ष-पादपान् आरोप्य पर्यावरणसंरक्षणस्य राष्ट्रियैकतायाश्च सन्देशं प्रदत्तवन्तः।
जनपदस्य रामानुजगञ्ज-थानापरिसरे लौहपुरुषस्य भारतरत्नस्य सरदार-वल्लभभाई-पटेलस्य १५०तम-जयंत्याः राष्ट्रियैकतादिवसस्य च निमित्तं वृक्षारोपण-कार्यक्रमः सम्पन्नः। अस्य कार्यक्रमस्य उद्देश्यं जनान् पर्यावरण-संरक्षणं प्रति जागरूकान् कर्तुं राष्ट्रियैकतायाः सामाजिक-सहभागितायाश्च भावनां प्रोत्साहयितुं च आसीत्।
अयं कार्यक्रमः आरक्षक-अधीक्षकस्य वैभव-बेङ्कर-महोदयस्य निर्देशनस्य, अतिरिक्त-आरक्षक-अधीक्षकस्य विश्व-दीपक-त्रिपाठी-महोदयस्य मार्गदर्शनस्य तथा रामानुजगञ्ज-थाना-प्रभारी-निरीक्षकस्य अजय-साहू-महोदयस्य नेतृत्वस्य अन्तर्गतं सम्पन्नः। कार्यक्रमे थानापरिसरे आम्र-, पनस-, अमरूद-प्रभृतयः विविधाः फलच्छाया-दातार: वृक्षपादपाः आरोपिताः। उपस्थितैः सर्वैः एतेषां पादपानां नियमित-परिपालनस्य हरितिम-वर्धनस्य च सङ्कल्पः कृतः।
अस्मिन्नवसरे थानाप्रभारी-निरीक्षकः अजय-साहू अवदत् यत्, “वृक्षाः केवलं पर्यावरणस्य सन्तुलनस्य साधनं न सन्ति, अपितु अग्रिम-वंशानां कृते स्वच्छ-सुरक्षित-भविष्यस्य दृढाधारोऽपि सन्ति।” सः सर्वान् अधिकाधिकं वृक्षान् रोपयितुं तेषां संरक्षणं च कर्तुम् आह्वानम् अकरोत्।
कार्यक्रमे आरक्षक-विभागेन सह स्थानीय-पत्रकाराः अपि सक्रियतया सहभागितां कृतवन्तः। आरक्षक-विभागस्य माध्यम-प्रतिनिधीनां च संयुक्त-वृक्षारोपणेन पर्यावरणसंरक्षणे सामूहिक-उत्तरदायित्वस्य सन्देशः प्रसारितः। आरोपितेषु पादपेषु फलच्छायादातार: वृक्षाः समाविष्टाः, ये भविष्ये जनानां हिताय उपयोगिनः भविष्यन्ति।
कार्यक्रमे उपनिरीक्षकः निर्मल-राजवाड़े, प्रशिक्षु-उपनिरीक्षकः चन्दूलाल-जैनः, प्रशिक्षु-उपनिरीक्षिका किरण, प्रधान-आरक्षकः इनायत-मुल्ला-खानः, पङ्कज-पोर्ते, आरक्षकः राजू-कुजूरः, महिला-आरक्षिका विजेता-कुजूरः, तेजबल-सिंहः तथा अन्ये थानाकर्मचारिणः उपस्थिताः आसन्।
Hindusthan Samachar / Divya Ranjan