Enter your Email Address to subscribe to our newsletters
देहरादूननगरम्, ११ जुलाईमासः (हि.स.)। मुख्यमन्त्री पुष्करसिंहधामी शनिवासरे देहरादून-जनपदस्य सहसपुरक्षेत्रे आयोजिते जनसेवा-शिविरे जनानां समस्याः श्रुत्वा तासां त्वरितसमाधानार्थं सम्बन्धिताधिकारिभ्यः स्थले एव आवश्यकनिर्देशान् प्रदत्तवान्।
राज्यसर्वकारस्य अनुसारं ‘जन-जनस्य सर्वकारः, जन-जनस्य द्वारे’ इत्यस्य अभियानस्य अन्तर्गतं चतुर्थ-जुलाईमासात् आरभ्य सम्पूर्णप्रदेशे जनसेवा-शिविराणि आयोज्यन्ते। एतेषां शिविराणां लाभं अद्यावधि पञ्चषष्टिसहस्राधिकाः जनाः प्राप्तवन्तः।
शनिवासरे आयोजिते शिविरे मुख्यमन्त्री उक्तवान् यत् अस्य अभियानस्य उद्देश्यं शासनस्य जनतायाश्च मध्ये विद्यमानां दूरतां न्यूनीकर्तुं नागरिकाणां समस्याः समयबद्धरीत्या समाधातुं च अस्ति। सः अधिकारिणः जनहितसम्बद्धानां प्रकरणानां प्राथमिकतया निस्तारणं कर्तुम् आदिष्टवान्।
शिविरस्य समये सहसपुरनिवासिनी बबलीदेवी मुख्यमन्त्रिणं सिवन-यन्त्रस्य प्रदाने विनयपूर्वकम् अनुरोधं कृतवती। मुख्यमन्त्रिणः निर्देशानन्तरं सम्बन्धित-अधिकारिणः तस्यै तस्मिन्नेव दिने गृहे सिवन-यन्त्रं प्रदत्तवन्तः, येन तस्याः स्वरोजगाराय सहायता प्राप्ता।
मुख्यमन्त्री शिविरे मार्ग-विद्युत्-श्मशानभूमि-मुक्तव्यायामशाला तथा अन्यजनसुविधासम्बद्धाः सूचना: अपि श्रुतवान् तथा अधिकारिभ्यः निर्धारित-कालसीमायाः अन्तर्गतं तासां समाधानं कर्तुं निर्देशान् प्रदत्तवान्। सः अवदत् यत् सर्वकारस्य उद्देश्यं केवलं योजनानां निर्माणं न, अपितु तासां लाभं समाजस्य अन्तिमव्यक्तिपर्यन्तं प्रापयितुम् अस्ति। एतस्यैव भावनायाः अनुसारेण प्रशासनाय जनमध्यं गत्वा तेषां समस्याः प्रभावीरीत्या समाधातुं निर्देशाः प्रदत्ताः।
सर्वकारस्य अनुसारं चतुर्थ-जुलाईमासात् आरभ्य सञ्चाल्यमानेऽस्मिन् अभियाने प्रदेशस्य विभिन्नेषु जनसेवा-शिविरेषु बहुसंख्यकेभ्यः नागरिकेभ्यः शासकीय-योजनानां सेवाश्च लाभः प्रदीयते।
Hindusthan Samachar / Divya Ranjan