देहरादूननगरम्, ११ जुलाईमासः (हि.स.)। उत्तराखण्डस्य क्रीडामन्त्री रेखा आर्या अवदत् यत् राज्यसर्वकारस्य नूतनायां क्रीडानीत्यां विशेषवर्गीयक्रीडकाणां सर्वाङ्गीणविकासाय विशेष-प्रावधानानि विधास्यन्ते, येन ते उत्तमं प्रशिक्षणं, सुविधाः तथा प्रोत्साहनं प्राप्नुयुः।

शनिवासरे देहरादूने स्थिते हिमाद्रि आइस रिङ्क इति स्थले आयोजितस्य विशेष-ओलम्पिक- भारत-राष्ट्रीय-फिगर-तथा-स्पीड-स्केटिङ्ग-प्रतियोगितायाः उद्घाटन-समारोहे सम्बोधनं कुर्वन्ती सा अवदत् यत् विशेषवर्गीयक्रीडकाणाम् उन्नयनाय तेषां कृते च सर्वसम्भव-अवसरस्य प्रदानाय राज्य-सर्वकारः पूर्णतया प्रतिबद्धः अस्ति।

तया उक्तं यत् अस्यां राष्ट्रीयप्रतियोगितायां एकादश-राज्येभ्यः आगताः शताधिकाः क्रीडकाः सहभागित्वं कुर्वन्ति, येषाम् उत्साहः साहसं च प्रेरणादायकम् अस्ति। सा क्रीडकान् प्रोत्साहयन्ती तेषां उज्ज्वल-भविष्यस्य कृते शुभकामनाः अपि दत्तवती।

क्रीडामन्त्री अवदत् यत् विशेषवर्गीय-क्रीडकाणां सम्मुखे सामान्यक्रीडकेभ्यः अपेक्षया अधिकाः समस्याः भवन्ति। शारीरिक-मानसिकबाधाः अतिक्रम्य क्रीडायाः उच्चस्तरं प्राप्तुं स्वयमेव महती सिद्धिः अस्ति। एतेषां क्रीडकाणां कृते विशेषसंरक्षणं, आधुनिकसुविधाः तथा अतिरिक्तप्रोत्साहनम् अत्यावश्यकम् अस्ति।

सा अवदत् यत् अधिकांशराज्यानां क्रीडानीतिषु विशेषवर्गीयक्रीडकाणां कृते पृथक् सुदृढानि प्रावधानानि न सन्ति, किन्तु उत्तराखण्डः अस्मिन् विषये नूतनं प्रयत्नं करिष्यति। नूतनायां क्रीडानीत्यां एतेषां क्रीडकाणां कल्याणाय, विशेष-प्रशिक्षणाय, आर्थिकसाहाय्यार्थं च व्यापकं प्रावधानानि भविष्यन्ति।

तया विश्वासः व्यक्तः यत् अस्यां प्रतियोगितायां सहभागिनः क्रीडकाः २०२९ तमे वर्षे भविष्यमाणासु स्पेशल-ओलम्पिक-विश्वक्रीडासु देशस्य प्रदेशस्य च यशः वर्धयिष्यन्ति। सा अवदत् यत् सर्वकारः तेषां सिद्धतायै सर्वसम्भवं सहयोगं प्रदास्यति।

अस्मिन् अवसरे इण्डियन-आइस-स्केटिङ्ग-फेडरेशन-अध्यक्षः अमिताभ: शर्मा, स्पेशल-ओलम्पिक-भारतस्य क्षेत्रीय-निदेशकः डी.बी.एस.रावतः, परिषद्सदस्यः राजेश्वरः, क्रीडाविभागस्य अधिकारिणः, विभिन्नराज्येभ्यः आगताः प्रशिक्षकाः, अभिभावकाः तथा क्रीडाप्रेमिणः उपस्थिताः आसन्।

Hindusthan Samachar / Divya Ranjan