देहरादूननगरम्, १२ जुलाईमासः (हि.स.)। पूर्वः चीफ-ऑफ-डिफेन्स-स्टाफ जनरल अनिलचौहानः (सेवानिवृत्तः) अवदत् यत् भविष्ययुद्धेषु प्रौद्योगिकी, संयुक्त-सैन्यसामर्थ्यं तथा बहु-आयामी-रणनीतिः निर्णायिकां भूमिकां निर्वहिष्यन्ति। परिवर्तमानस्य युद्ध-स्वरूपस्य अनुरूपं सशस्त्रबलानां निरन्तरं सज्जीकरणं नूतनप्रौद्योगिकीनां स्वीकृतिश्च कालस्य आवश्यकता अस्ति।

रविवासरे सैनिकसंस्थाने गढीकैण्ट्-क्षेत्रे ऑल-इण्डिया-गोरखा-एक्स-सर्विसमैन-वेल्फेयर-एसोसिएशन इत्यस्य प्रयत्नेन आयोजिते सम्मान-अभिनन्दन-समारोहे सम्बोधयन् जनरल अनिलचौहानः अवदत् यत् सः सप्तचत्वारिंशद्वर्षीयां सैन्यसेवां सम्पन्न्य सेवानिवृत्तः अभवत्। तस्य सी.डी.एस.-पदस्य कार्यकालः अत्यन्तं समस्यापूर्णः आसीत्। सः उक्तवान् यत् सैनिकः सर्वदा युद्धं न करोति, अपितु अधिकांशकालं युद्धस्य सिद्धतायै, रणनीतिनिर्माणाय तथा विविधविकल्पानां समन्वयाय प्रयत्नशीलः भवति। युद्धे विजयः एव लक्ष्यं भवति, पराजयः तु कदापि विकल्पः न भवति।

तेन उक्तं यत् मे-मासे २०२५ तमे वर्षे पाकिस्तानेन सह अभवद् यः संघर्षः, तस्मिन् भारतस्य सफलता महती उपलब्धिः आसीत्। ‘ऑपरेशन-सिन्दूर’ संयुक्तसैन्यसञ्चालनस्य, एकीकरणस्य तथा समन्वितरणनीतेः उत्कृष्टम् उदाहरणम् आसीत्, यस्य सिद्धता त्रिवर्षेभ्यः पूर्वमेव आरब्धा आसीत्। अस्मिन् अभियाने जलसेना, स्थलसेना, वायुसेना, अन्तरिक्षक्षेत्रस्य तथा साइबरक्षेत्रस्य सामर्थ्यानां प्रभावी उपयोगः कृतः। अस्य अभियानस्य सफलता भारतीय-सशस्त्रबलानां कृते अत्यन्तं सन्तोषजनका अभवत्।

जनरल चौहानः अवदत् यत् भविष्ययुद्धेषु नूतनप्रौद्योगिकीनां ग्रहणम् अनिवार्यं भविष्यति। प्रत्येकं युद्धं भिन्नं भवति, तदनुसारमेव नूतना रणनीतिः विकसितव्या भवति। सेनायाः निरन्तरं नूतनप्रौद्योगिकी-अधिगमः परिवर्तमान-परिस्थितीनाम् अनुरूपम् आत्मानं परिवर्तयितुं च आवश्यकता वर्तते। परिवर्तनं प्रकृतेः नियमः अस्ति, सैन्यव्यवस्था अपि अस्मात् नियमात् पृथक् न भवितुमर्हति। देशवासिनां सशस्त्रबलानि प्रति विश्वासः स्नेहश्च तेषां महत्तमः धरोहरः अस्ति। एतत् सम्मानं केवलं व्यक्तेः कृते न, अपितु संस्थायै भवति। अतः प्रत्येकं सैनिकेन स्वकर्तव्यं, अनुशासनम्, प्रामाणिकता, निष्ठा च सर्वोच्चप्राथमिकतया पालनीयाः।

सः पुनरवदत् यत् देशे सामरिकचिन्तनस्य संवर्धनस्य आवश्यकता वर्तते तथा अस्मिन् विषये उत्तराखण्डेन सह अन्येभ्यः राज्येभ्यः अपि स्वरः उत्थापनीयः। हिमालयस्य आध्यात्मिक-सांस्कृतिक-परम्परा शताब्दीभ्यः देशाय दिशां प्रददाति, उत्तराखण्डात् निर्गतं चिन्तनं सम्पूर्णदेशाय नूतनां दृष्टिं प्रदातुं शक्नोति। सम्यक्-असम्यक्-निर्णयं मनुष्यस्य अन्तर्मनः एव करोति। सेनायां, राजनीतौ अथवा अन्यस्मिन् क्षेत्रे नेतृत्वे विश्वासं निधाय नैतिकमूल्यानाम् अनुरूपं कार्यं करणीयम्। सः अवदत् यत् सेवानिवृत्तेः अनन्तरं देहरादूनं स्वस्य स्थायिनिवासरूपेण स्वीकृतवान् तथा भविष्येऽपि उत्तराखण्डेन तत्रत्यजनैश्च सह सम्बद्धः स्थास्यति।

समारोहे ऑल-इण्डिया-गोरखा-एक्स-सर्विसमैन-वेल्फेयर-एसोसिएशन इत्यनेन जनरल अनिलचौहानः सम्मानितः। अस्मिन् अवसरे राज्यमन्त्री गोरखाकल्याणपरिषदः अध्यक्षा ज्योतिकोटिया, संस्थायाः अध्यक्षः कर्नलः आर.एस.क्षेत्री, उत्तराखण्ड-एक्स-सर्विसमैन-लीग इत्यस्य अध्यक्षः मेजर-जनरल एम.एल.असवालः (सेवानिवृत्तः), मेजर-जनरल शम्मीसभरवालः (सेवानिवृत्तः), लेफ्टिनेण्ट्-जनरल ए.के.सिंहः (सेवानिवृत्तः) तथा बहवः पूर्वसैनिकाः गणमान्यजनाश्च उपस्थिताः आसन्।

Hindusthan Samachar / Divya Ranjan