नव दिल्ली, 12 जुलाईमासः (हि.स.)।केन्द्रीयश्रमरोजगारमन्त्री मनसुखमाण्डवियः जुलाईमासस्य चतुर्दशतमे दिने देशव्यापिरूपेण कर्मचारीराज्यबीमायोजनया सम्बद्धानां सप्त स्वास्थ्यपरियोजनानाम् उद्घाटनं करिष्यति। तेलङ्गानाराज्यस्य सनतनगरस्थिते ईएसआईसी चिकित्सालये आयोजिते कार्यक्रमे प्रायः षट्षष्ट्यधिकषट्शतकोटिरूप्यकमूल्यानां परियोजनानां शुभारम्भः भविष्यति। एताभिः परियोजनाभिः देशव्यापिनः प्रायः त्रिपञ्चाशल्लक्षाधिकपञ्चलक्षबीमितव्यक्तयः लाभार्थिनश्च आधुनिकस्वास्थ्यसेवानां लाभं प्राप्स्यन्ति।

श्रमरोजगारमन्त्रालयस्य अनुसारं मनसुखमाण्डवियः सनतनगरस्थितस्य ईएसआईसी चिकित्सालयस्य नूतनस्य बाह्यरोगिविभागस्य प्रत्यक्षम् उद्घाटनं करिष्यति। तेन सह अन्यासां षण्णां परियोजनानां आभासीयम् उद्घाटनमपि करिष्यति। तासु असमराज्यस्य बेलटोलास्थितः उन्नतः द्विशतशय्यायुक्तः ईएसआईसी चिकित्सालयः तमिलनाडुराज्यस्य श्रीपेरम्बदूरस्थितः शतशय्यायुक्तः चिकित्सालयः आन्ध्रप्रदेशस्य राजमहेन्द्रवरस्थितः ईएसआईएस चिकित्सालयः गुजरातराज्यस्य सुरेन्द्रनगरस्थितम् ईएसआई औषधालयं शाखाकार्यालयं च राजस्थानस्य कोटानगरस्य उद्योगनगरस्थितम् ईएसआई औषधालयं शाखाकार्यालयं च तथा राजस्थानस्य भवानीमण्डीस्थितम् ईएसआई औषधालयं समाविष्टानि सन्ति। अस्मिन् कार्यक्रमे केन्द्रीयराज्यमन्त्री शोभाकरन्दलाजे अपि उपस्थिता भविष्यति।

सनतनगरस्थितस्य नूतनस्य बाह्यरोगिविभागस्य निर्माणं द्विशतैकादशकोटित्रयोदशलक्षरूप्यकव्ययेन त्रिचत्वारिंशत्सहस्रषट्शतैकादशवर्गमीटरपरिमिते क्षेत्रे कृतम् अस्ति। अस्मिन् सामान्यचिकित्सया सह विविधविशेषज्ञविभागाः आयुषसेवाः रेडियोलोजी योगसेवा पुनर्वासकेन्द्रं शताशीतिसामान्यशय्याः पञ्चविंशतिः सघनचिकित्साशय्याः तथा विंशतिः नवजातसघनचिकित्साशय्याः उपलब्धाः भविष्यन्ति। एतत् केन्द्रं तेलङ्गानाराज्यस्य द्वादशलक्षत्रिंशत्सहस्राधिकबीमितव्यक्तिभ्यः लाभार्थिभ्यश्च आधुनिकचिकित्सासेवाः प्रदास्यति।

कार्यक्रमस्य अवसरे मनसुखमाण्डवियः निर्माणकार्ये योगदानं दत्तवतां श्रमिकाणां सम्मानं करिष्यति तथा च ईएसआई लाभार्थिभ्यः नकदराशिलाभान् अपि वितरिष्यति।

---------------

Hindusthan Samachar / Dheeraj Maithani