प्रयागराजः, १२ जुलाईमास: (हि.स.)। उत्तरप्रदेशस्य औद्योगिकविकासमन्त्री नन्दगोपालगुप्तः 'नन्दी' रविवासरे जनान् अधिकाधिक-वृक्षारोपणं कृत्वा प्रकृति-संरक्षण-अभियाने सम्मिलितुं आह्वानम् अकरोत्। सः अवदत् यत् अग्रिम-वंशानां कृते स्वच्छस्य, हरितस्य, समृद्धस्य च उत्तरप्रदेशस्य निर्माणम् अस्माकं सर्वेषां सामूहिकम् उत्तरदायित्वम् अस्ति।

'एकः वृक्षः मातुः नाम्ना' इत्यस्य अभियानस्य अन्तर्गतं प्रयागराजस्य बलिदानी-चन्द्रशेखर-आजाद-उद्याने वृक्षारोपणं कृत्वा सः पर्यावरणसंरक्षणस्य सन्देशम् अददात्। मन्त्री नन्दी अवदत् यत् प्रकृतेः प्रति स्वकीयं दायित्वं निर्वहन्तः प्रत्येकं जनः अधिकाधिकान् वृक्षान् रोपयितुं तेषां संरक्षणस्य च सङ्कल्पं कुर्यात्।

सः युवभ्यः सह सर्वेभ्यः नागरिकेभ्यः अपि अस्य जनाभियानस्य सहभागिनः भवितुम् आह्वानम् अकरोत्। तेन उक्तं यत् सामूहिक-प्रयत्नैः एव स्वच्छ-हरित-समृद्ध-प्रदेशस्य स्वप्नं साकारं भविष्यति। सः अवदत् यत् हरिशङ्करी-परम्परायां वट-अश्वत्थ-पाकड-वृक्षाणां रोपणं सहैव क्रियते। एते वृक्षाः पर्यावरण-सन्तुलनस्य संरक्षणे प्राणवायोः उपलब्धौ च महत्त्वपूर्णां भूमिकां निर्वहन्ति इति मान्यता अस्ति।

प्रधानमन्त्रिणः नरेन्द्रमोदिनः आह्वानेन प्रवर्तमाने 'एकः वृक्षः मातुः नाम्ना' अभियाने रविवासरे मुख्यमन्त्रिणः योगी-आदित्यनाथस्य नेतृत्वे प्रदेशव्यापि पञ्चत्रिंशत्-कोटि-वृक्षाणां रोपणं क्रियते। तस्यैव क्रमस्य अन्तर्गतं प्रयागराजे द्व्यशीतिलक्ष-पञ्चाशत्सहस्र-वृक्षारोपणस्य लक्ष्यम् उत्तरप्रदेश-सर्वकारस्य औद्योगिकविकासमन्त्री नन्द-गोपालगुप्तः 'नन्दी' ऐतिहासिके बलिदानी-चन्द्रशेखर-आजाद-उद्याने वृक्षारोपणेन शुभारब्धवान्।

कार्यक्रमस्य प्रारम्भे मन्त्री नन्दी अमर-बलिदानी-चन्द्रशेखर-आजादस्य प्रतिमायाः समक्षं पुष्पाञ्जलिं समर्प्य श्रद्धाञ्जलिम् अर्पितवान्। ततः परं 'वृक्षारोपण-महायज्ञः–२०२६' इत्यस्य अन्तर्गतं हरिशङ्करी-वृक्षस्य रोपणं कृत्वा पर्यावरणसंरक्षणस्य हरित-उत्तरप्रदेश-निर्माणस्य च सङ्कल्पं सुदृढीकृतवान्।

अस्मिन् अवसरे फाफामऊ-विधायकः गुरुप्रसाद-मौर्यः, जनपदाधिकारी मनीष-वर्मा, मुख्य-वनसंरक्षकः मनोज-कुमारः, प्रभागीय-वनाधिकारी अरविन्द-यादवः, एडीआईओएस नीरज-केसरी, मण्डलीय-सूचनाधिकारी इन्द्रमणि-पाण्डेयः, उद्यान-अधीक्षकः, सिविल-डिफेन्स-अधिकारी राकेश-तिवारी, समाजसेवी रविः, कार्यक्रम-सञ्चालकः डॉ.प्रभाकर-त्रिपाठी, गोरखा-राइफल्स-सैनिकाः, स्काउट-गाइड-संस्थायाः छात्राः छात्र्यश्च, अन्ये च बहवः जनाः उपस्थिताः आसन्।

Hindusthan Samachar / Divya Ranjan