चिकित्सामहाविद्यालयपरिसरे हरिशङ्करीवृक्षस्य रोपणम् आत्मचित्रग्रहणं च

झान्सी, १२ जुलाईमासःउत्तरप्रदेशशासनस्य उपमुख्यमन्त्री केशवप्रसादमौर्यः रविवासरे झान्सीस्थिते चिकित्सामहाविद्यालयपरिसरे आयोजितस्य एक पेड़ मां के नाम इति वृक्षारोपणमहाभियानस्य शुभारम्भम् अकरोत्। अस्मिन् अवसरे सः समाजवादीदलम् तथा तस्य राष्ट्रियाध्यक्षम् अखिलेशयादवं प्रति तीक्ष्णं राजनैतिकमाक्रमणं कृत्वा अवदत् यत् वर्तमानः समाजवादीदलः वास्तविकार्थे नमाजवादीदलम् अभवत्।

चिकित्सामहाविद्यालयपरिसरे आयोजितस्य कार्यक्रमस्य अनन्तरं माध्यमप्रतिनिधिभिः सह संवादे उपमुख्यमन्त्री अखिलेशयादवस्य सनातनसम्बद्धवक्तव्यस्य प्रतिक्रियां दत्त्वा अवदत् यत् वास्तविकाः समाजवादिनः सनातनधर्मानुयायिनः भवितुमर्हन्ति किन्तु अखिलेशयादवस्य नेतृत्वे विद्यमानं समाजवादीदलम् तुष्टीकरणराजनीतिम् आचरति। तेन आरोपः कृतः यत् समाजवादीदलम् अपराधिनः दुष्टान् माफियासमूहान् भ्रष्टाचारं च संरक्षणं ददाति।

केशवप्रसादमौर्यः अवदत् यत् वर्षे २०१४ प्रभृति प्रधानमन्त्री नरेन्द्रमोदिनः नेतृत्वे देशे विकासस्य दरिद्रकल्याणस्य च राजनीति प्रोत्साहिता अभवत्। तेन दावीकृतं यत् भारतीयजनतापक्षः निरन्तरं सुदृढः भवति यदा समाजवादीदलस्य काङ्ग्रेसदलस्य च जनाधारः निरन्तरं क्षीयते। सः अवदत् यत् वर्षस्य २०२७ विधानसभानिर्वाचनस्य परिणामप्रकाशनानन्तरं समाजवादीदलम् केवलं सैफईपर्यन्तमेव सीमितं भविष्यति। भगवान्रामसम्बद्धे आदित्यठाकुरस्य वक्तव्यविषये पृष्टे उपमुख्यमन्त्री अवदत् यत् आदित्यठाकुरः अद्यापि बालकः अस्ति अतः तस्य वक्तव्ये अधिका टिप्पणी न समीचीना।

वृक्षारोपणमहाभियानविषये भाषमाणः सः एतत् महाभियानं महायज्ञः इति अभिधत्ते। सः अवदत् यत् प्रधानमन्त्री नरेन्द्रमोदिनः आह्वानेन उत्तरप्रदेशस्य सर्वेषु पञ्चसप्ततिजिलेषु एककाले वृक्षारोपणकार्यक्रमः आयोज्यते। प्रदेशे अद्य पञ्चत्रिंशत्कोटिवृक्षारोपणस्य लक्ष्यं निर्धारितम् अस्ति। तेन उक्तं यत् गतनववर्षेषु अधुना यावत् द्व्यर्बुदपञ्चत्रिंशत्कोटिवृक्षाः रोपिताः। सः जनान् पर्यावरणसंरक्षणाय आगामिसन्ततेः उत्तमभविष्याय च एक पेड़ मां के नाम इति अभियानान्तर्गतं न्यूनातिन्यूनम् एकं वृक्षं रोपयितुं तस्य संरक्षणस्य च सङ्कल्पं कर्तुम् अपि प्रार्थितवान्।

Hindusthan Samachar / Dheeraj Maithani