जम्मूः, 12 जुलाईमासः (हि.स.)। शिवसेना हिन्दुस्तानस्य एकः प्रतिनिधिमण्डलः जम्मूकश्मीरप्रदेशाध्यक्षस्य पण्डितराजेशकेसरिमहोदयस्य नेतृत्वे रविवासरे जम्मूनगरस्य ओल्डमण्डीस्थितं श्रीराममन्दिरम् अगच्छत्, यत्र प्रवर्तमानायाः श्रीअमरनाथयात्रायाः सन्दर्भे आयोजिते कार्यक्रमे सहभागित्वम् अकरोत्। अस्मिन् अवसरे पण्डितराजेशकेसरिमहोदयेन महामण्डलेश्वरस्य श्री १००८ रमेश्वरदासजीमहाराजस्य वर्ष १९८२ तः निरन्तरं सन्तानाम् अमरनाथयात्रिकाणां च सेवायां प्रदत्तस्य योगदानस्य प्रशंसा कृता। तेन उक्तं यत् श्रीराममन्दिरे यात्रिकाणां सन्तानां च कृते निवासभोजनादीनां आवश्यकसुविधानां निःस्वार्थव्यवस्था क्रियते, येन एतत् मन्दिरं स्वस्य सेवापरम्परया देशव्यापिनीं विशिष्टां परिचितिं प्राप्तवान् अस्ति।

पण्डितकेसरिमहोदयेन चिन्ता व्यक्तीकृता यत् गतवर्षेषु शासनस्य पक्षतः सन्तसेवायै मन्दिराय आटकं तण्डुलाः शर्करा च इत्यादयः आवश्यकाः खाद्यसामग्रीः प्रदीयन्ते स्म, किन्तु अस्मिन् वर्षे अद्यावधि राशनसामग्री न प्रदत्ता। तेन एतत् दुर्भाग्यपूर्णम् इति उक्त्वा जम्मूकश्मीरशासनस्य विशेषतः खाद्यनागरिकपूर्तिउपभोक्तृकार्यविभागस्य मन्त्रिणः समक्षं प्रार्थना कृता यत् सन्तानां श्रद्धालूनां च कस्यापि प्रकारस्य असुविधायाः परिहारार्थम् आवश्यकाः खाद्यसामग्रीः शीघ्रं प्रदीयन्ताम्।

कार्यक्रमस्य समये शिवसेना हिन्दुस्तानस्य पदाधिकारीणः सन्तश्च बम बम भोले इति जयघोषान् अकुर्वन् तथा श्रीअमरनाथयात्रायाः शान्तिपूर्णसफलसञ्चालनाय प्रार्थनाम् अकुर्वन्। प्रतिनिधिमण्डलेन सर्वेषां श्रद्धालूनां सुरक्षितयात्रायै शुभकामनाः अपि प्रदत्ताः। पण्डितराजेशकेसरिमहोदयेन उपराज्यपालस्य मनोजसिन्हामहोदयस्य नेतृत्वे जम्मूकश्मीरप्रशासनेन श्रीअमरनाथयात्रायै कृतानां व्यवस्थापनानां सुरक्षाप्रबन्धानां च प्रशंसा कृता। तेन उक्तं यत् एतेषां प्रयासानां फलतः यात्रायाः सफलसञ्चालनं सुनिश्चितम् अभवत्।

Hindusthan Samachar / Dheeraj Maithani