नालंदा, बिहारशरीफम् 12 जुलाईमासः (हि.स.)।

राजगीरस्थिते तपस्वी जगजीवनसरस्वतीविद्यामन्दिरे हसनपुरे रविवासरे भारतीशिक्षासमितेः शिशुशिक्षाप्रबन्धसमितेः बिहारस्य च तत्त्वावधाने सप्तत्रिंशत्तमा क्षेत्रीया तैक्वाण्डो मुष्टियुद्धप्रतियोगिता शुभारब्धा।

द्विदिवसीयायां अस्यां प्रतियोगितायां प्रायः त्रिशतं क्रीडकाः सहभागित्वं कुर्वन्ति। प्रतियोगितायाः उद्घाटनं बिहारक्रीडाविश्वविद्यालयस्य राजगीरस्थितस्य कुलपतिः शिशिरसिन्हः, कुलसचिवः रजनीकान्तः, विद्याभारतीबिहारस्य सहमन्त्री प्राध्यापकः डाक्टर राणापुरुषोत्तमकुमारसिंहः तथा क्षेत्रीयक्रीडाप्रमुखः फणीश्वरनाथः संयुक्तरूपेण दीपप्रज्वलनेन अकुर्वन्।

विद्यालयस्य प्राचार्यः अनन्तकुमारसिंहः आगतान् अतिथीन् स्वागतमकरोत्। अस्मिन् विषये फणीश्वरनाथः अवदत् यत् वर्षद्विसहस्रनवतितः प्रभृति विद्याभारत्यै एसजीएफआई संस्थायां सहभागितायाः मान्यता प्राप्ता अस्ति तथा संस्थायाः क्रीडकाः राष्ट्रिये अन्तरराष्ट्रीये च स्तरे निरन्तरम् उत्कृष्टं प्रदर्शनं कुर्वन्ति।

एसजीएफआई प्रतियोगितासु विद्याभारती देशव्यापि पञ्चमस्थानम् अधितिष्ठति। मुख्यातिथिः शिशिरसिन्हः अवदत् यत् क्रीडा शारीरिकमानसिकविकासयोः सर्वाधिकप्रभावी माध्यमम् अस्ति। रजनीकान्तः क्रीडाः अनुशासनस्य नेतृत्वक्षमतायाः दलभावनायाश्च विकासकारिण्यः इति उक्त्वा क्रीडकान् बिहारक्रीडाविश्वविद्यालयस्य भ्रमणाय आमन्त्रितवान्।

प्राध्यापकः डाक्टर राणापुरुषोत्तमकुमारसिंहः भारतीयशिक्षायाः पञ्चकोशीयपरम्परायाः उल्लेखं कृत्वा क्रीडकान् अनुशासनपालनाय राष्ट्रसेवायै उत्कृष्टप्रदर्शनाय च प्रेरितवान्। उद्घाटनसमारोहोत्तरं प्रतियोगिता उत्साहपूर्णे वातावरणे प्रारब्धा।

Hindusthan Samachar / Dheeraj Maithani