– चण्डीगढ-जालन्धर-रेलस्थानकयोरपि विस्फोटनस्य संचेतना, रवनीतसिंह-बिट्टू इत्यस्मै अपि प्राणहानिसंचेतना प्रदत्ता

चण्डीगढम्, १३ जुलाईमासः (हि.स.)। प्रधानमन्त्रिणः नरेन्द्रमोदिनः चण्डीगढ-पञ्जाब-प्रवासात् पूर्वं सुरक्षाभिकरणानि उच्चसतर्कतायाम् आगतानि। चण्डीगढ-मोहालीनगरयोः स्थितानां अनेकान् विद्यालयान् प्रति पुनरेकवारं संचेतनापूर्णः ई-मेल प्रेषितः। तस्मिन् १७ जुलाईमासे चण्डीगढे जालन्धरे च पृथक्-पृथक् स्थानेषु बम-विस्फोटान् कर्तुं संचेतना प्रदत्ता।

प्रधानमन्त्री नरेन्द्रमोदी १७ जुलाईमासे पञ्जाबम् आगमिष्यति, तदा जालन्धर-कैन्ट्-रेलस्थानकस्य उद्घाटनकार्यक्रमः प्रस्तावितः अस्ति। तस्मात् पूर्वं प्राप्ते संचेतनापूर्णे ई-मेलसंदेशे चण्डीगढ-मोहालीनगरयोः विद्यालयानां अतिरिक्तं मोहाली-नगराध्यक्षकार्यालयमपि लक्ष्यं कर्तुम् उक्तम्। तदतिरिक्तं जालन्धर-चण्डीगढ-रेलस्थानकयोः आईईडी-विस्फोटान् कर्तुं संचेतना अपि प्रदत्ता। ई-मेलसन्देशे केन्द्रीय-रेल-राज्यमन्त्रिणः रवनीतसिंह-बिट्टू इत्यस्मै अपि प्राणहानेः संचेतना प्रदत्ता। सहैव पञ्जाबप्रदेशस्य जनान् प्रधानमन्त्रिणः नरेन्द्रमोदिनः सभायां न सहभागिनः भवितुम् संचेतना अपि प्रदत्ता।

संचेतनाप्राप्तेः अनन्तरं आरक्षबलं सुरक्षाभिकरणानि च प्रकरणं गम्भीरतया गृहीत्वा अन्वेषणम् आरब्धवन्तः। विद्यालयानां तथा अन्येषां संवेदनशीलस्थानानां सुरक्षाव्यवस्थायां विशेषसतर्कता वर्धिता अस्ति।

उल्लेखनीयं यत् विगतदिनेषु चण्डीगढ-मोहालीनगरयोः विद्यालयेभ्यः अनेकेषु अवसरेषु एवंविधानि संचेतनापूर्णानि ई-मेल-पत्राणि प्राप्तानि। निरन्तरं प्राप्यमाणानां संचेतनानां कारणात् सुरक्षा-भिकरणानि पूर्वमेव उच्चसतर्कतायाम् सन्ति।

Hindusthan Samachar / Divya Ranjan