–छत्तीसगढ-पर्यटन-मण्डलस्य अभिनव-मण्डपाय राष्ट्रिय-सम्मानम्

रायपुरम्, १३ जुलाईमासः (हि.स.)। कोलकाता-२०२६ इत्यत्र आयोजिते ‘ट्रैवल एण्ड टूरिज्म फेयर’ मध्ये छत्तीसगढ-पर्यटनेन स्वस्य प्रभावशालि-उपस्थित्या राष्ट्रियस्तरे पुनरेकां उल्लेखनीयां सिद्धिम् अर्जितवती। त्रिदिवसीयस्य अस्य प्रतिष्ठितस्य पर्यटन-मेलापकस्य सफल-समापने छत्तीसगढ-पर्यटन-मण्डलं देशस्य एकविंशति-राज्यानां सहभागितायां स्वस्य आकर्षक-सृजनात्मक-प्रभावशाली-मण्डपस्य कृते ‘बेस्ट डेकोरेशन ऑफ स्टॉल एण्ड अपीयरन्स’ इति सम्मानेन सम्मानितम्।

एतत् सम्मानं राज्यस्य समृद्ध-सांस्कृतिक-परम्परायाः, जनजातीय-जीवनस्य, प्राकृतिक-पर्यटनस्य, धार्मिक-धरोहराणां तथा आधुनिक-पर्यटन-दृष्टेः राष्ट्रिय-मञ्चे प्रभावी-प्रस्तुतीकरणस्य सफल-प्रयत्नानां महत्त्वपूर्णा मान्यता अस्ति।

जुलाईमासस्य १० तः १२ दिनाङ्कपर्यन्तं कोलकातानगरस्य विश्व-बङ्गला-प्राङ्गणे आयोजिते देशस्य प्रतिष्ठिते पर्यटन-व्यापार-मेलापके छत्तीसगढ-पर्यटन-मण्डलस्य मण्डपः त्रिष्वपि दिवसेषु आगन्तुकानां, पर्यटन-विशेषज्ञानां, पर्यटन-सञ्चालकानां तथा निवेशकानां प्रमुखम् आकर्षणकेन्द्रम् अभवत्। बस्तर-जनजातीय-संस्कृतिः, चित्रकोट-तीरथगढ-जलप्रपातौ, काङ्गेर-घाटी-राष्ट्रीय-उद्यानम्, सिरपुरम्, भोरमदेवः, धार्मिक-पर्यटनम्, पर्यावरण-पर्यटनम्, पर्यटन-विश्रामगृहाणि तथा राज्यस्य विविधाः पर्यटन-परिपथाः आधुनिक-प्रस्तुतीकरणेन प्रदर्शिताः, येषां व्यापकः प्रशंसाभावः अभवत्।

आयोजनस्य अवधौ छत्तीसगढ-पर्यटन-मण्डलस्य अध्यक्षा नीलू-शर्मा, छत्तीसगढ-शासनस्य पर्यटन-विभागस्य सचिवः एस भारतीदासनः तथा छत्तीसगढ-पर्यटन-मण्डलस्य प्रबन्ध-सञ्चालकः विवेक-आचार्यः राष्ट्रिय-अन्ताराष्ट्रिय-पर्यटन-सञ्चालकैः, ट्रैवल-संस्थाभिः, होटल-समूहैः, पर्यटन-विशेषज्ञैः तथा निवेशकैः सह अनेकासु महत्त्वपूर्णासु बी-टू-बी-सभासु सहभागिताम् अकुर्वन्।

एतासु सभासु पर्यटन-निवेशः, संयुक्त-पर्यटन-संकुलानां विकासः, विपणन-सहयोगः, नूतन-पर्यटन-विपणान् प्रति प्रवेशः तथा छत्तीसगढे पर्यटकानां सङ्ख्यावृद्धेः सम्भावनाः इति विषयेषु विस्तृता चर्चा अभवत्।

अस्मिन् मेलापके छत्तीसगढ-पर्यटन-मण्डलेन सह राज्यस्य तथा अन्येषां राज्यानां प्रायः अष्टाविंशतिः पञ्जीकृताः पर्यटन-सञ्चालकाः, होटल-सञ्चालकाः, होम-स्टे-सञ्चालकाः तथा पर्यटन-उद्यमिनः सक्रिय-सहभागिताम् अकुर्वन्।

उद्घाटन-अवसरे गोवा-राज्यस्य पर्यटन-मन्त्री रोहन ए. खंवटे, उत्तराखण्डस्य पर्यटनमन्त्री सतपाल-महाराजः, पश्चिम-बङ्गस्य पर्यटनमन्त्री डॉ. शङ्कर-घोषः तथा थाइलैण्ड-देशस्य महावाणिज्य-दूता सुश्री सिरीपोर्न तांतीपन्याथेप इत्यादयः विशिष्ट-अतिथयः छत्तीसगढ-मण्डपस्य अवलोकनम् अकुर्वन्। सर्वेऽपि अतिथयः राज्यस्य प्राकृतिक-सौन्दर्यस्य, जन-जातीय-संस्कृतेः, धार्मिक-धरोहराणां तथा पर्यटन-विकासस्य सम्भावनानां प्रशंसां कृत्वा छत्तीसगढं उदीयमान-पर्यटन-गन्तव्यरूपेण निरूपितवन्तः।

छत्तीसगढ-पर्यटन-मण्डलस्य अध्यक्षा नीलू-शर्मा अवदत् यत् मुख्यमन्त्रिणः विष्णुदेव-सायस्य तथा पर्यटन-संस्कृति-मन्त्रिणः राजेश-अग्रवालस्य नेतृत्वे राज्यं पर्यटन-क्षेत्रे निरन्तरं नूतनाः उपलब्धीः प्राप्नोति। तया उक्तं यत् टीटीएफ इव राष्ट्रीय-मञ्चाः राज्यस्य पर्यटन-सम्भावनाः देशस्य विश्वस्य च पुरतः प्रभावी-रीत्या प्रस्तोतुं महत्त्वपूर्णं माध्यमम् सन्ति।

छत्तीसगढ-शासनस्य पर्यटन-संस्कृति-विभागस्य सचिवः एस भारतीदासनः अवदत् यत् राष्ट्रीय-अन्ताराष्ट्रिय-मञ्चेषु छत्तीसगढस्य प्रभावी-सहभागितया राज्ये पर्यटन-निवेशे, पर्यटक-सङ्ख्यायां तथा निजी-क्षेत्रस्य सहभागितायां सकारात्मक-वृद्धिः भविष्यति।

छत्तीसगढ-पर्यटन-मण्डलस्य प्रबन्ध-सञ्चालकः विवेक-आचार्यः अवदत् यत् पर्यटन-मण्डलं राज्यस्य पर्यटन-उत्पादान् राष्ट्रिय-वैश्विक-विपणयोः प्रापयितुं निरन्तरं कार्यं करोति।

Hindusthan Samachar / Divya Ranjan