जयपुरम्, 13 जुलाईमासः (हि.स.)। राजस्थानविधानसभायाः पञ्चसप्ततिवर्षपूर्त्यवसरे जुलैमासस्य पञ्चदशे दिने प्रथमवारं ‘विधायीगौरवयात्रा’ इत्यस्याः अन्तर्गतं वर्तमानपूर्वविधायकानां ऐतिहासिकः समागमः आयोजयिष्यते। विधानसभाध्यक्षः वासुदेवदेवनानी सोमवासरे अवदत् यत् एषः अमृतमहोत्सवस्य प्रथमः विशेषकार्यक्रमः भविष्यति, यस्मिन् वर्तमानाः पूर्वविधायकाः, राजस्थानराज्यात् निर्वाचिताः लोकसभाराज्यसभासांसदाश्च सहभागिनः भविष्यन्ति। तेन एषः राजस्थानविधानसभायाः इतिहासे अभूतपूर्वः गौरवपूर्णश्च आयोजनः इति निरूपितः।

देवनानी अवदत् यत् समारोहस्य उद्घाटनं प्रातः दशवादने भविष्यति तथा समापनसमारोहः सायं चतुर्वादने आयोजयिष्यते। उद्घाटनसमारोहस्य मुख्यातिथिः लोकसभाध्यक्षः ओमबिर्ला भविष्यति, समापनसमारोहस्य मुख्यातिथिश्च उपराष्ट्रपतिः सी. पी. राधाकृष्णन् भविष्यति। अस्मिन् कार्यक्रमे राज्यपालः हरिभाऊबागडे, मुख्यमन्त्री भजनलालशर्मा च विशिष्टातिथिरूपेण उपस्थितौ भविष्यतः।

अमृतमहोत्सवस्य अन्तर्गतं आयोजिते अस्मिन् विशेषसमागमे विधानसभायाः पञ्चसप्ततिवर्षीयस्य विधायीयस्य प्रवासस्य विषये विमर्शः भविष्यति। पृथक् द्वयोः सत्रयोः पूर्ववर्तमानयोः षोडश अनुभवीविधायकाः राज्ये पारितेषु चतुर्विंशतिमहत्त्वपूर्णविधेयकेषु स्वविचारान् प्रस्तोष्यन्ति। अस्मिन् समारोहे शतवर्षीयः पूर्वविधायकः पण्डितरामकिशनः सहिताः अनेके वरिष्ठपूर्वविधायकाः अपि सहभागिनः भविष्यन्ति।

विधानसभाध्यक्षः अवदत् यत् एषः कार्यक्रमः केवलं समारोहः न, अपितु लोकतान्त्रिकपरम्पराणां विधायीयोपलब्धीनां जनसेवायाः संकल्पस्य च उत्सवः अस्ति। कार्यक्रमे पूर्वविधानसभाध्यक्षानां, उपाध्यक्षानां, वरिष्ठतमविधायकानां च विशेषसम्मानः विधास्यते। एषः समागमः अनुभवस्य, परम्परायाः, नवाचारस्य, महिलाशक्तेः, युवाशक्तेः, जनविश्वासस्य च समन्वयस्य साक्षी भविष्यति।

देवनानी अवदत् यत् जयपुरं समागच्छतां पूर्वविधायकानां निवासातिथ्यादिसर्वव्यवस्थाः विधानसभा सचिवालयेन कृताः सन्ति। सम्पूर्णस्य कार्यक्रमस्य प्रत्यक्षप्रसारणं राजस्थानविधानसभायाः आधिकारिकयूट्यूबमार्गे भविष्यति, येन प्रदेशस्य सर्वे जनाः अस्मिन् ऐतिहासिके आयोजने सहभागीभवितुं शक्नुवन्ति।

---------------

हिन्दुस्थान समाचार / Dheeraj Maithani