भोपालम्, १३ जुलाईमासः (हि.स.)। मध्यप्रदेशस्य राजधान्यां भोपाले अद्य एमपी टेक ग्रोथ कॉन्क्लेव ३.० इति कार्यक्रमस्य आयोजनं भविष्यति। अस्मिन् सम्मेलने अर्धचालक-प्रौद्योगिकी, दत्तांशकेन्द्राणि तथा वैश्विकक्षमताकेन्द्रेषु निवेशविषये विस्तृतः विमर्शः भविष्यति। सम्मेलने देश-विदेशयोः प्रमुखाः प्रौद्योगिकीसंस्थाः, निवेशकाः तथा नीतिविशेषज्ञाः एकस्मिन् मञ्चे समागमिष्यन्ति।

जनसम्पर्काधिकारिणी जूहीश्रीवास्तवः अवदत् यत् एमपी टेक ग्रोथ कॉन्क्लेव ३.० कार्यक्रमस्य उद्घाटनं मुख्यमन्त्री डॉ. मोहनयादवः करिष्यति। सः राज्य-सर्वकारस्य प्रौद्योगिकीआधारित-औद्योगिक-विकासस्य दृष्टिकोणं प्रस्तोष्यति तथा उद्योगप्रतिनिधिभिः सह पृथक् पृथक् सभाः कृत्वा निवेशः, परियोजनानां क्रियान्वयनम् तथा भावीसहयोगस्य सम्भावनाः इत्यादिषु चर्चां करिष्यति। मुख्यमन्त्री सम्मेलनपरिसरे आयोजितां प्रदर्शनीमपि अवलोकयिष्यति।तया उक्तं यत् विज्ञान-प्रौद्योगिकीविभागेन आयोजितस्य अस्य सम्मेलनस्य उद्देश्यम् उच्चविकासयुक्तेषु प्रौद्योगिकीक्षेत्रेषु निवेशस्य संवर्धनं तथा वैश्विकक्षमता-केन्द्राणां, दत्तांशकेन्द्राणां, अर्धचालक-क्षेत्रस्य च विकासेन मध्यप्रदेशं भारतस्य प्रमुखनिवेशगन्तव्येषु प्रतिष्ठापयितुम् अस्ति। सम्मेलने प्रदेशस्य प्रौद्योगिकी-विकासयात्रायाः विशेषप्रस्तुतिः भविष्यति। अग्रणीसंस्थानां विशेषज्ञाः वैश्विकक्षमता-केन्द्रविस्तारः, दत्तांशकेन्द्र-विकासः तथा अर्धचालक-तन्त्रस्य अवसराणां विषये स्वविचारान् प्रस्तोष्यन्ति। कार्यक्रमे विविधाः रणनैतिक-सहभागितायाः तथा सन्धयः अपि विनिमीयन्ते, ये राज्यस्य प्रौद्योगिकी-परिस्थितितन्त्रं सुदृढं कर्तुं महत्त्वपूर्णां भूमिकां निर्वहिष्यन्ति।

जनसम्पर्काधिकारिण्याः अनुसारं सम्मेलने अर्धचालक-वैश्विकक्षमताकेन्द्र- दत्तांशकेन्द्रविषयकाः गोलमेजचर्चाः आयोजयिष्यन्ते। तासु वरिष्ठोद्योग-प्रतिनिधयः, नीतिनिर्मातारः, शिक्षाविदश्च राज्ये निवेशस्य सम्भावनाः, कुशलमानव-संसाधनम्, औद्योगिक-आधारसंरचना, नीतिगतसहयोगः तथा भाव्यावश्यकताः इत्यादिषु विचारविमर्शं करिष्यन्ति। चर्चायाः प्रमुखविषयेषु मध्यप्रदेशे समन्वितस्य इलेक्ट्रॉनिक्स-अर्धचालकतन्त्रस्य विकासः, राज्यस्य भारतस्य अग्रणीवैश्विक-क्षमताकेन्द्रगन्तव्यरूपेण प्रतिष्ठापनम् तथा डिजिटलाधारसंरचनायाः सुदृढीकरणं समाविष्टम् अस्ति।

तया अपि उक्तं यत् सम्मेलने देश-विदेशयोः अग्रणीप्रौद्योगिकीसंस्थानां, उद्योगसङ्घानां, निवेशकानां, नवोद्यमानां, नवोन्मेषपोषणकेन्द्राणाम्, अनुसन्धान-शैक्षणिकसंस्थानां तथा नीतिविशेषज्ञानां प्रतिनिधयः सहभागं करिष्यन्ति। सीटीआरएलएस डेटासेण्टर्स, केन्स टेक्नोलॉजीस्, फुजियामा पावर, न्योबोल्ट लिमिटेड् इत्यादीनां प्रतिष्ठितसंस्थानां प्रतिनिधयः विविधप्रौद्योगिकीक्षेत्रेषु निवेश-सहयोगयोः सम्भावनानां विषये स्वविचारान् प्रस्तोष्यन्ति। प्रमुखशैक्षणिक-संस्थानानि अपि नवोन्मेषः, अनुसन्धानम्, कौशलविकासः तथा उद्योग-शैक्षणिक-सहयोगः इत्यादिविषयेषु आयोजितेषु सत्रेषु सहभागं करिष्यन्ति।

तया सूचितं यत् एमपी टेक ग्रोथ कॉन्क्लेव इत्यस्य पूर्वद्वयं संस्करणं प्रदेशे प्रौद्योगिकीक्षेत्रे निवेशाय नूतनां गतिम् अददात्। प्रथमसंस्करणे विंशतिसहस्र-कोटिरूप्यकाधिकमूल्यानि निवेशप्रस्तावाः प्राप्ताः, येभ्यः प्रायः पञ्चसप्ततिसहस्राणि रोजगारावसराः सृजिताः। द्वितीयसंस्करणे द्वादशसहस्र-कोटिरूप्यकाधिकनिवेशः प्राप्तः, यस्मात् प्रायः अष्टचत्वारिंशत्सहस्रं रोजगारावसराः अभवन्। तृतीय-संस्करणस्य उद्देश्यम् एतां निवेशयात्रां नूतनशिखरं नेतुं तथा रणनीतिक-प्रौद्योगिकीक्षेत्रेषु उद्योगानां सहभागितां अधिकं सुदृढां कर्तुम् अस्ति।

Hindusthan Samachar / Dheeraj Maithani