-कृषि प्रधान राज्यात् टेक्नोलॉजी पावरहाउस इत्येतत् यावत् : 'एमपी टेक ग्रोथ कॉन्क्लेव 3.0' इत्येन रचितं मध्यप्रदेशस्य हाई-टेक भविष्यस्य कलेवरम्

भोपालम्, 13 जुलाईमासः (हि.स.)।

मध्यप्रदेशस्य मुख्यमन्त्री डा मोहनयादवः अवदत् यत् प्रदेशः प्रौद्योगिक्याः उच्चप्रौद्योगिकिनिवेशस्य च प्रमुखकेन्द्रं भवति। देशविदेशानां अग्रणीसंस्थानां, निवेशकानां, नीतिनिर्मातॄणां, शिक्षणसंस्थानानां च सहभागितया एतदपि सूचितं यत् आगामिवर्षेषु प्रदेशस्य विकासयात्रा प्रौद्योगिक्या नवोन्मेषेण च नवीनाः उन्नतयः प्राप्स्यति। अस्मिन् अवसरे प्रदेशस्य प्रौद्योगिकीविकासयात्रायाः आधारेण निर्मितलघुचलच्चित्रस्य प्रदर्शनम् अभवत्। मुख्यमन्त्री डा मोहनयादवः सोमवासरे एमपी टेक ग्रोथ कॉन्क्लेव ३.० इति कार्यक्रमस्य शुभारम्भावसरे एतानि वचनानि उक्तवान्। कार्यक्रमे मुख्यमन्त्रिणा एकशताष्टसप्ततिदशमलवसप्ततिः कोटिरूप्यकाणां निवेशेन स्थापितानां विंशति औद्योगिकैककानां लोकार्पणं कृतम्, येषां माध्यमेन एकसहस्रं द्विशतानि एकोनत्रिंशत् नूतनरोजगाराः सृज्यन्ते।

अस्मिन् अवसरे गूगल प्ले संस्थायाः भारतप्रमुखेन एमपीएसईडीसी संस्थया च मध्ये महत्त्वपूर्णसहमतिपत्रस्य आदानप्रदानम् अभवत्। स्पेनदेशस्य बार्सिलोनानगरस्थितस्य सबमर इण्डिया प्राइवेट लिमिटेड संस्थायाः मुख्यकार्यनिर्वाहकः पैट्रिक स्मेट्स इत्यादयः विविधकम्पनीनां प्रतिनिधयः मध्यप्रदेशे उद्योगस्थापनार्थं आवंटनपत्राणि प्राप्तवन्तः।

मुख्यमन्त्री डा मोहनयादवः अवदत् यत् मध्यप्रदेशः भारतस्य प्रौद्योगिकीयार्थव्यवस्थायाः महत्त्वपूर्णचालकशक्तिः भवितुं सज्जः अस्ति। देशविदेशानां अग्रणीकम्पनीनां, निवेशकानां, नीतिनिर्मातॄणां, शिक्षणसंस्थानानां च सहभागिता सूचयति यत् आगामिवर्षेषु प्रदेशस्य विकासयात्रा प्रौद्योगिक्या नवोन्मेषेण च नूतनशिखराणि प्राप्स्यति।

चत्वारिंशत्सहस्रकोटिरूप्यकाणां निवेशस्य पञ्चत्रिंशत्सहस्ररोजगारसृजनस्य च लक्ष्येन सम्मेलनस्य शुभारम्भः अभवत्। अस्य महत्त्वपूर्णा उपलब्धिः भविष्यस्य निवेशसम्भावनानां विस्तृता रूपरेखा अस्ति। मुख्यमन्त्री अवदत् यत् त्रिदिवसीयकार्यक्रमे एकपञ्चाशत् विविधगतिविधयः आयोजयिष्यन्ते, येषां माध्यमेन प्रदेशे प्रायः चत्वारिंशत्सहस्रकोटिरूप्यकाणां निवेशः पञ्चत्रिंशत्सहस्राधिकरोजगारसृजनं च सम्भाव्यते।

तेन उक्तं यत् एषः आयोजनः मध्यप्रदेशं वैश्विकक्षमताकेन्द्राणां, दत्तांशकेन्द्राणां, अर्धचालकउद्योगस्य च सुदृढकेन्द्रत्वेन प्रतिष्ठापयितुं निर्णायकं पदं भविष्यति। एते एव क्षेत्राणि आगामिदशके वैश्विकार्थव्यवस्थायाः दिशां निर्धारयिष्यन्ति।

मुख्यमन्त्री अवदत् यत् गतद्वादशवर्षेषु भारतं विश्वस्य अतिशीघ्रविकासशीलासु अर्थव्यवस्थासु स्वस्थानं स्थापितवान्। अस्मिन् राष्ट्रीयविकासक्रमे मध्यप्रदेशः अपि तीव्रगत्या अग्रे गच्छति। पूर्वं कृषिप्रधानार्थव्यवस्थया प्रसिद्धः प्रदेशः अधुना ड्रोननिर्माणे, रक्षोपकरणनिर्माणे, प्रक्षेपास्त्रनिर्माणे च स्वस्थानं सुदृढं करोति। एषः परिवर्तनः सूचयति यत् प्रदेशः पारम्परिकोद्योगैः सह अत्याधुनिकविनिर्माणस्य डिजिटलप्रौद्योगिकीनां च प्रमुखकेन्द्रं भवति।

मुख्यमन्त्री स्वविदेशयात्राणां उल्लेखं कुर्वन् अवदत् यत् बार्सिलोनायात्रायाः अनन्तरं स्पेन, अमेरिका, कनाडा इत्येतेषां देशानां कम्पनीभिः प्रायः द्विशताष्टाविंशतिः कोटिरूप्यकाणां निवेशः मध्यप्रदेशे कृतः। तेन उक्तं यत् वर्षे २०२५ बार्सिलोनानगरे एकगीगावाटक्षमतायुक्तस्य कृत्रिमबुद्धिमत्तादत्तांशकेन्द्रस्य स्थापनार्थं महत्त्वपूर्णसमझौतापत्रं सम्पन्नम् आसीत् तथा अधुना सम्बन्धितकम्पनीप्रतिनिधयः भोपालनगरम् आगतवन्तः। अनेन वैश्विकनिवेशकानां मध्यप्रदेशे विश्वासः निरन्तरं वर्धते इति स्पष्टं भवति।

तेन उक्तं यत् कृत्रिमबुद्धिमत्तादत्तांशकेन्द्राणि, विज्ञाननगरम्, डिजिटलाधारसंरचना, नवोन्मेषाधारितपरियोजनाश्च आगामिकाले प्रदेशस्य नूतना परिचयरेखा भविष्यन्ति।

अस्मिन् अवसरे प्रौद्योगिकीनिवेशस्य प्रवर्धनार्थं राज्यसर्वकारेण सूचना प्रौद्योगिकी उद्यानानां विस्तारस्य अपि घोषणा कृता। इन्दौरनगरस्य सुपरकोरिडोरक्षेत्रे प्रायः त्रिलक्षवर्गफुटपरिमिते क्षेत्रे आधुनिकसूचनाप्रौद्योगिकीउद्यानं विकसितं भविष्यति, यत्र कम्पनीभ्यः तत्क्षणोपयोगिसुविधा प्रदास्यते। भोपालसूचनाप्रौद्योगिकीउद्यानस्य प्रायः चतुर्लक्षवर्गफुटपर्यन्तं विस्तारः भविष्यति, येन डिजिटलसेवाकम्पन्यः अत्याधुनिकसुविधाभिः सह कार्यं कर्तुं शक्नुयुः। तदतिरिक्तं भोपालस्य कोलाररोडक्षेत्रे पञ्चएकडपरिमितभूमौ नूतनसूचनाप्रौद्योगिकीउद्यानं निर्मास्यते। ग्वालियरनगरे अपि एतादृशी विकासयोजना प्रस्ताविता अस्ति। एताभिः परियोजनाभिः प्रदेशे सूचना प्रौद्योगिकीसंस्थानां विस्तारः भविष्यति तथा स्थानीययुवभ्यः स्वराज्ये एव उत्तमरोजगारावकाशाः उपलब्धाः भविष्यन्ति।

सम्मेलने फुजियामापावर, सीटीआरएलएस डेटासेन्टर्स, न्योबोल्ट लिमिटेड, केन्स टेक्नोलॉजीस इत्यादीनां प्रतिष्ठितकम्पनीनां सहभागिता सूचयति यत् मध्यप्रदेशः अधुना वैश्विकनिवेशकानां प्राथमिकतासूचौ समाविष्टः अस्ति। तेन सह आईआईएम इन्दौर तथा आईआईएसईआर इत्यादीनां प्रतिष्ठितसंस्थानानां सहभागिता उद्योगस्य, अनुसन्धानस्य, कौशलविकासस्य च एकं संयुक्तमञ्चं प्रदत्तवती। प्रौद्योगिकीप्रदर्शिन्यां नवीनतमडिजिटलसमाधानानां अत्याधुनिकप्रौद्योगिकीनां च प्रदर्शनम् अपि निवेशकानां आकर्षणस्य प्रमुखकेन्द्रम् अभवत्।

एमपी टेक ग्रोथ कॉन्क्लेव इत्यस्य पूर्वद्वौ संस्करणौ प्रदेशस्य कृते उल्लेखनीयौ स्तः। प्रथमसंस्करणे विंशतिसहस्रकोटिरूप्यकेभ्यः अधिकानां निवेशप्रस्तावानां प्राप्तिः अभवत्, येषां माध्यमेन प्रायः पञ्चसप्ततिसहस्रजीविकासृजनस्य सम्भावना आसीत्। द्वितीयसंस्करणे द्वादशसहस्रकोटिरूप्यकेभ्यः अधिकः निवेशः प्राप्तः तथा प्रायः अष्टचत्वारिंशत्सहस्रयुवभ्यः जीविकासम्भावनाः उत्पन्नाः। एताभिः सफलताभिः तृतीयसंस्करणस्य प्रति उद्योगजगतः विश्वासः अधिकं सुदृढः अभवत्।

---------------

Hindusthan Samachar / Dheeraj Maithani