भावनगरम्, 13 जुलाईमासः (हि.स.)। गुजरातराज्यस्य भावनगरजनपदस्य सिहोरविकासखण्डस्य शिवानी सखीमण्डलेन ग्रामीणमहिलानां प्रतिभायाः आत्मनिर्भरत्वस्य च अद्वितीयं परिचयं प्रदर्श्य अन्तरराष्ट्रीयस्तरे उल्लेखनीया उपलब्धिः प्राप्ता।

केरलराज्यस्य कोच्चिनगरे आयोजिते अन्तरराष्ट्रीय सरसमेले शिवानी सखीमण्डलेन स्थापितायाः प्रदर्शनीशालायाः देशविदेशेभ्यः आगतेभ्यः आगन्तुकेभ्यः उत्साहवर्धका प्रतिक्रिया प्राप्ता। एषा उपलब्धिः सिहोरक्षेत्रस्य समग्रभावनगरजनपदस्य च गौरवस्य विषयः अभवत्। ब्रिक्स महिला वाणिज्यसङ्घस्य ब्राजीलदेशीयशाखायाः अध्यक्षा मोनिकामोन्टेइरो अपि प्रदर्शनीशालां दृष्ट्वा ग्रामीणमहिलानाम् आर्थिकसशक्तीकरणाय क्रियमाणानां प्रयत्नानां प्रशंसाम् अकरोत्। तया उक्तं यत् एते प्रयत्नाः महिलाभ्यः केवलं स्वरोजगारं न प्रददति, अपितु वैश्विकविपण्यां प्रवेशस्य नवान् अवसरान् अपि प्रददति।

एतदतिरिक्तं मेलाकाले चीनदेशस्य उच्चस्तरीयप्रतिनिधिमण्डलम् अपि शिवानी सखीमण्डलस्य प्रदर्शनीशालां समुपागत्य महिलाभिः निर्मितानां विविधहस्तशिल्पकलाकृतीनां स्थानीयोत्पादानां च अवलोकनम् अकरोत्। प्रतिनिधिमण्डलेन महिलानां कौशलस्य सृजनशीलतायाः परिश्रमस्य च प्रशंसा कृता। उत्पादानां निर्माणप्रक्रियायाः गुणवत्तायाः तथा तेषां पृष्ठभूमौ विकसितस्य स्वरोजगारप्रतिमानस्य विषये विस्तृता सूचना अपि प्राप्ता।

शिवानी सखीमण्डलस्य एषा उपलब्धिः दर्शयति यत् यदि ग्रामीणमहिलाभ्यः समुचितं मार्गदर्शनं प्रशिक्षणं विपण्याः सुलभता च प्रदीयते तर्हि ताः स्वप्रतिभया अन्तरराष्ट्रीयस्तरे अपि विशिष्टां परिचितिं निर्मातुं समर्थाः भवन्ति।

लोकल टू ग्लोबल इति अवधारणां साकारयन्ती शिवानी सखीमण्डला गुजरातराज्यस्य राष्ट्रस्य च गौरवं वर्धितवती। एषा सफलता अन्येषां सखीमण्डलानां ग्रामीणमहिलानां च प्रेरणास्रोतः अस्ति तथा च महिलासशक्तीकरणस्य क्षेत्रे नवीनां दिशं प्रदर्शयति।

---------------

Hindusthan Samachar / Dheeraj Maithani