रायपुरम्, 13 जुलाईमासः (हि.स.)।

विधानसभायाः वर्षासत्रस्य प्रथमदिवसस्य कार्यवाह्याः आरम्भः पण्डवानीगायिकायै डॉ. तीजनबाय्यै श्रद्धाञ्जलिम् अर्पयित्वा अभवत्। मुख्यमन्त्री डॉ. विष्णुदेवसायः, प्रतिपक्षनेता डॉ. चरणदासमहन्तः, संस्कृतिमन्त्री राजेशअग्रवालः, पूर्वमुख्यमन्त्री भूपेशबघेलः तथा वरिष्ठविधायकाः डॉ. तीजनबाय्याः योगदानम् अनुस्मृतवन्तः।

मुख्यमन्त्री विष्णुदेवसायः अवदत् यत् डॉ. तीजनबाय्याः पण्डवानीगायनस्य कापालिकशैलीं नवीनोन्नतिं प्रापयत् तथा स्वकीयया विलक्षणप्रतिभया लोककलायाः राष्ट्रीयाम् अन्तरराष्ट्रीयां च प्रतिष्ठां स्थापितवती। तस्याः प्रस्तुतिषु गायनस्य अभिनयस्य च अद्भुतः समन्वयः दृश्यते स्म। पात्राणां सजीवचित्रणम्, ओजस्विनी वाणी, प्रभावशालिनी प्रस्तुति च श्रोतॄन् मन्त्रमुग्धान् करोति स्म।

प्रतिपक्षनेता डॉ. चरणदासमहन्तः चर्चायां भागं गृह्णन् अवदत् यत् एषः सदसि प्रथमः अवसरः अस्ति, यदा वयं पद्मसम्मानेन सम्मानितायाः विभूतेः विषये चर्चा कुर्मः। डॉ. तीजनबाय्याः निधनं अस्माकं सर्वेषां कृते अपूरणीया क्षतिः अस्ति। अहं स्वविधायकदलस्य पक्षतः तस्यै श्रद्धाञ्जलिम् अर्पयामि।

संस्कृतिमन्त्री राजेशअग्रवालः अवदत् यत् डॉ. तीजनबाय्याः छत्तीसगढस्य गौरवं विश्वपटलस्य उपरि प्रतिष्ठापितवती। अहं स्वमन्त्रालयस्य पक्षतः तस्यै श्रद्धाञ्जलिम् अर्पयामि। पूर्वमुख्यमन्त्री भूपेशबघेलः अवदत् यत् डॉ. तीजनबाय्याः तादृशात् परिवारात् आगता आसीत्, यत्र शिक्षायाः अभावः आसीत्। सा अन्तरराष्ट्रीयस्तरे अस्य देशस्य गौरवं वर्धितवती। तस्याः जीवनकर्म अस्माकं सर्वेषां कृते प्रेरणादायकम् अस्ति।

संसदीयकार्यमन्त्री केदारकश्यपः अवदत् यत् डॉ. तीजनबाय्याः जीवनं अत्यन्तं संघर्षपूर्णम् आसीत्। तथापि कठिनपरिस्थितिषु अपि सा पण्डवानीगायनस्य माध्यमेन स्वकीयं विशिष्टं स्थानं निर्मितवती। तया छत्तीसगढस्य गौरवं वर्धितम्। तस्याः निधनं सम्पूर्णस्य लोककलाजगतः कृते महती क्षतिः अस्ति।

पण्डवानीगायिकायै डॉ. तीजनबाय्यै मन्त्री गजेन्द्रयादवः, विधायकः किरणसिंहदेवः, अनुजशर्मा, अनिलाभेडिया, कुँवरसिंहनिषादः, भईयालालकोरसेवाडा च अपि स्वविचारान् व्यक्तीकृत्य श्रद्धाञ्जलिम् अर्पितवन्तः। अनन्तरं सदने श्रद्धाञ्जल्यर्पणानन्तरं पञ्चनिमेषपर्यन्तं कार्यवाही स्थगिता कृता।

---------------

Hindusthan Samachar / Dheeraj Maithani