देहरादूनम्, 13 जुलाईमासः (हि.स.)। मुख्यमन्त्री पुष्करसिंहधामी सोमवासरे उक्तवान् यत् देहरादूने निर्माणाधीना साइन्ससिटी आगामिवर्षेषु केवलम् उत्तराखण्डस्य न, अपितु सम्पूर्णस्य भारतस्य विद्यार्थिनां, शोधकर्तृणां वैज्ञानिकानां च कृते विज्ञानस्य, नवाचारस्य, अनुसन्धानस्य च अग्रणीकेन्द्रं भविष्यति। तेन यूकॉस्टपरिसरे स्टार्टअपकेन्द्रस्य विकासार्थं भूमेः उपलब्धतायाः अपि घोषणा कृता। सोमवासरे उत्तराखण्डराज्यविज्ञानप्रौद्योगिकीपरिषदः परिसरे साइन्ससिटीपरियोजनायाः निर्माणकार्याणां निरीक्षणानन्तरं विज्ञानप्रौद्योगिकीनवाचारनीतिपरिसंवादम् सम्बोधयन् मुख्यमन्त्री उक्तवान् यत् राज्यसर्वकारः विज्ञानाधारितज्ञानार्थव्यवस्थायाः विकासाय दृढसंकल्पितः अस्ति। तेन विज्ञानसेतुपरिकल्पनायाः अन्तर्गतं सामुदायिकविज्ञानरेडियो विज्ञानवाणी ८८.८ मेगाहर्ट्ज, विज्ञानदृश्यम् तथा विज्ञानधारा इत्येतयोः अपि लोकार्पणं कृतम्।

धामी उक्तवान् यत् वर्तमानकालः कृत्रिमबुद्धिमत्तायाः, दत्तांशविज्ञानस्य, ड्रोनप्रौद्योगिक्याः, सेमीकण्डक्टरप्रौद्योगिक्याः, जैवप्रौद्योगिक्याः च उद्भवमानप्रौद्योगिकीनां कालः अस्ति। उत्तराखण्डेन एतेषु क्षेत्रेषु केवलं परिवर्तनस्य स्वीकरणं न, अपितु नेतृत्वमपि कर्तव्यम्। तेन उक्तं यत् राज्यसर्वकारः प्रौद्योगिक्याः, अनुसन्धानस्य, नवाचारस्य च प्रोत्साहनार्थं सुदृढं पारिस्थितिकतन्त्रं विकसितुं प्रयतते।

मुख्यमन्त्री धामी उक्तवान् यत् राज्यस्य प्रथमा विज्ञानप्रौद्योगिकीनवाचारनीतिः प्रवर्तिता अस्ति, यस्याः उद्देश्यं युवानः केवलं रोजगारान्वेषिणः न, अपितु नवाचारमाध्यमेन रोजगारसर्जकाः भवेरन् इति अस्ति। तेन उक्तं यत् सर्वकारः साइन्सएण्डइनोवेशनसेन्टर, स्टेमप्रयोगशाला, डिजिटलग्रन्थालयः, पेटेण्टसूचनाकेन्द्रम्, चलप्रयोगशालाः तथा कृत्रिमबुद्धिमत्ता, रोबोटिक्स, ड्रोनप्रौद्योगिकी इत्यादीनां भाविप्रौद्योगिकीनां प्रोत्साहनं करोति।

तेन उक्तं यत् उत्तराखण्डस्य भौगोलिकचुनौत्याः समाधानं स्थानीयसंसाधनानां वैज्ञानिकानुसन्धानस्य च माध्यमेन अन्वेष्टुं शक्यते। राज्यस्य जैवविविधता, औषधीयवनस्पतयः, जलस्रोतांसि, जैविककृषिः च वैज्ञानिकदृष्ट्या संयोज्य उत्तराखण्डं विकासस्य आदर्शप्रतिमानरूपेण विकसितुं शक्यते।

मुख्यमन्त्री उक्तवान् यत् सिलक्यारासुरङ्गउद्धारअभियानं ब्रिक्सदेशानां सम्मेलने सर्वोत्तमकार्यप्रणालीरूपेण प्रस्तुतम्। अस्यैव दृष्ट्या राज्यसर्वकारेण प्रतिवर्षं अष्टाविंशतितमे नवम्बरमासदिने आपदाप्रबन्धनदिवसः आचरितुं निर्णयः कृतः।

अस्मिन् कार्यक्रमे मन्त्रिमण्डलमन्त्री प्रदीपबत्रा, विधायकः सहदेवसिंहपुण्डीर, यूकॉस्टमहानिदेशकः प्रोफेसर दुर्गेशपन्तः, विभिन्नविश्वविद्यालयानां कुलपतयः, वैज्ञानिकाः तथा अन्ये गणमान्यजनाः उपस्थिताः आसन्।----------

Hindusthan Samachar / Dheeraj Maithani