जलपाईगुड़ी, 14 जुलाईमासः (हि.स.)। श्रावणमासस्य अवसरः अस्मिन् वर्षे जलपेशमन्दिरेण सह जटिलेश्वरमन्दिरम् अपि विशेषाकर्षणस्य केन्द्रं भविष्यति। राज्यसर्वकारस्य पहलया सम्पूर्णश्रावणमासे अत्र श्रावणीमहोत्सवः आयोजयिष्यते। प्रशासनतः प्राप्तसूचनानुसारं प्रत्येकं रविवासरसायंकालात् सोमवासरपर्यन्तं विशेषपूजा, जलाभिषेकः तथा सांस्कृतिककार्यक्रमाः आयोजयिष्यन्ते। श्रद्धालूनां सुविधार्थं व्यापकव्यवस्थाः अपि क्रियमाणाः सन्ति।

अद्यतनकाले मयनागुडीक्षेत्रस्य विधायकः डलिमचन्द्ररायः, प्रखण्डविकासाधिकारी सौमेनदासः तथा मन्दिरसमितेः सदस्याः संयुक्तोपवेशनं कृत्वा महोत्सवस्य सज्जतायाः समीक्षा अकुर्वन्। उपवेशने निर्णयः कृतः यत् मन्दिरपरिसरे मञ्चनिर्माणं कृत्वा सांस्कृतिककार्यक्रमाः आयोजयिष्यन्ते तथा सम्पूर्णः परिसरः आकर्षकदीपप्रकाशेन अलङ्करिष्यते। जलपेशमन्दिरात् जटिलेश्वरमन्दिरपर्यन्तं मार्गे पेयजलस्य व्यवस्था अपि क्रियते। श्रद्धालूनां रात्रिविश्रामार्थं मन्दिरपरिसरस्थितकक्षाणां स्वच्छीकरणं तथा अन्यसुविधानां व्यवस्थापनकार्यं द्रुतगत्या प्रचलति।

विधायकः डलिमचन्द्ररायः अवदत् यत् प्रतिवर्षं जटिलेश्वरमन्दिरे बहवः श्रद्धालवः आगच्छन्ति, तथापि अस्य मन्दिरस्य यथोचितप्रसिद्धिः न अभवत्। अस्मिन् वर्षे राज्यसर्वकारः एतत् महोत्सवं बृहदाकारस्य आयोजनेन अस्मै नूतनां परिचितिं प्रदातुं प्रयतते।

प्रशासनस्य कथनानुसारं श्रावणीमहोत्सवस्य सफलं सुव्यवस्थितं च आयोजनं सुनिश्चितीकर्तुं सर्वाः आवश्यकव्यवस्थाः शीघ्रतया सम्पाद्यन्ते। अस्याः पहलायाः परिणामस्वरूपं मयनागुडीक्षेत्रे धार्मिकपर्यटनस्य अपि संवर्धनं भविष्यतीति अपेक्षा व्यक्ता अस्ति।

Hindusthan Samachar / Dheeraj Maithani