नवदिल्ली, १४ जुलाईमासः (हि.स.)। दिल्ली-राज्यस्य मुख्यमन्त्री रेखा-गुप्ता मङ्गलवासरे राष्ट्रमण्डल-टेबल-टेनिस-चैम्पियनशिपस्पर्धाया: आधिकारिक-शुभङ्करस्य ‘मयूरः’ इत्यस्य अनावरणम् अकरोत्। सा उक्तवती यत् राष्ट्रमण्डल-टेबल-टेनिस-चैम्पियनशिप २७ जुलाईमासात् २ अगस्तमास-पर्यन्तं नवदिल्लीस्थिते त्यागराज-क्रीडाङ्गणे आयोज्यते। अस्मिन् पञ्चविंशति-राष्ट्रमण्डल-देशानां श्रेष्ठाः क्रीडकाः स्वप्रतिभां प्रदर्शयिष्यन्ति।

नवदिल्लीस्थिते ललित-आतिथ्यगृहे आयोजिते अस्मिन् समारोहे दिल्ली-राज्यस्य क्रीडामन्त्री आशीष-सूदः, राष्ट्रमण्डल-टेबल-टेनिस-सङ्घस्य अध्यक्षः विवेक-कोहली, शिक्षाविभागस्य अतिरिक्त-निदेशकः नितिन-जिन्दलः, टेबल-टेनिस-फेडरेशन-ऑफ-इण्डिया इत्यस्य पदाधिकारीणः, क्रीडकाः, प्रशिक्षकाः च उपस्थिताः आसन्।

क्रीडामन्त्री आशीष-सूदः उक्तवान् यत् मुख्यमन्त्रिण्याः नेतृत्वे दिल्ली-सर्वकारः क्रीडाक्षेत्रं नूतन-उच्चतां नेतुं प्रतिबद्धः अस्ति। सः अवदत् यत् अद्य केवलं ‘मयूरः’ इति आधिकारिक-शुभङ्करस्य अनावरणस्य अवसरः न, अपितु दिल्ली-राज्यस्य क्रीडा-भविष्यस्य नूतन-दृष्टेः उद्घाटनस्य अपि प्रतीकः अस्ति। सः उक्तवान् यत् दिल्ली केवलं भारतस्य राजधानी न, अपितु देशस्य ‘क्रीडा-राजधानी’ रूपेण तथा भविष्ये वैश्विक-क्रीडा-केन्द्ररूपेण स्वपरिचयं स्थापयितुं अग्रे सरति।

सूदः अवदत् यत् २७ जुलाईमासात् २ अगस्तमास-पर्यन्तं त्यागराज-क्रीडाङ्गणे आयोज्यमानायां अस्यां चैम्पियनशिप-स्पर्धायां पञ्चविंशति-राष्ट्रमण्डल-देशानां श्रेष्ठाः क्रीडकाः स्वप्रतिभां प्रदर्शयिष्यन्ति। अस्मिन् काले विश्वस्य क्रीडाप्रेमिणां तथा अन्ताराष्ट्रिय-क्रीडा-समुदायस्य दृष्टिः दिल्ली-नगरस्य उपरि भविष्यति। सः उक्तवान् यत् एषा स्पर्धा दिल्ली-राज्यस्य अन्तिमं लक्ष्यं न, अपितु बृहत् यात्रायाः आरम्भः अस्ति।

क्रीडामन्त्री अवदत् यत् प्रधानमन्त्री नरेन्द्रमोदिनः मार्गदर्शने तथा मुख्यमन्त्रिण्याः रेखा-गुप्तायाः नेतृत्वे दिल्ली-सर्वकारः भविष्यस्य राष्ट्रमण्डल-क्रीडाः, एशियाई-क्रीडाः, विश्व-चैम्पियन-शिपस्पर्धा तथा अन्यानि प्रमुखानि अन्ताराष्ट्रिय-क्रीडा-आयोजनानि आयोजयितुं राजधानीं सज्जां करोति। सः उक्तवान् यत् सर्वकारस्य उद्देश्यं केवलं क्रीडा-स्पर्धानाम् आयोजनं न, अपितु सुदृढस्य विश्वस्तरीय-क्रीडा-पारिस्थितिक-तन्त्रस्य निर्माणम् अपि अस्ति।

सः अवदत् यत् दिल्ली-सर्वकारः तादृशं वातावरणं निर्माति, यत्र कस्यापि परिवारस्य बालकः यदि क्रीडकः भवितुम् इच्छति, तर्हि तस्मै विश्वस्तरीया क्रीडावसंरचना, अन्ताराष्ट्रिय-स्तरस्य प्रशिक्षणम्, क्रीडा-विज्ञानस्य सुविधाः तथा उत्तमानि अभ्यास-साधनानि उपलब्धानि भविष्यन्ति। सर्वकारः क्रीडकाणां स्वप्न-साकारार्थं सर्वावश्यक-सहयोगं प्रदातुं कटिबद्धः अस्ति।

आशीष-सूदः अवदत् यत् दिल्ली-सर्वकारः क्रीडाक्षेत्रस्य संवर्धनार्थं पञ्च ‘सेण्टर्-ऑफ्-एक्सीलेन्स्’ संस्थाः विकसितुं गच्छति। तासु जलतरणम्, एथलेटिक्स, मल्लयुद्धम् तथा टेबल-टेनिस इत्यादयः क्रीडाविशेषाः समाविष्टाः भविष्यन्ति। एतानि केन्द्राणि केवलं प्रशिक्षण-केन्द्राणि न भविष्यन्ति, अपितु दिल्ली-राज्यस्य भावि-क्रीडा-प्रतिभानां निर्माणाय सुदृढ-व्यवस्थारूपेण कार्यं करिष्यन्ति। सः अवदत् यत् अद्य दिल्ली राष्ट्रमण्डल-टेबल-टेनिस-चैम्पियनशिपस्पर्धाया: आयोजनं करोति, भविष्ये च एतानि केन्द्राणि तादृशान् क्रीडकान् निर्मास्यन्ति, ये राष्ट्रमण्डल-क्रीडासु, एशियाई-क्रीडासु, ओलम्पिक-क्रीडासु तथा विश्व-चैम्पियनशिप-स्पर्धाया: भारतस्य प्रतिनिधित्वं कृत्वा त्रिरङ्गस्य गौरवं वर्धयिष्यन्ति।

सूदः अवदत् यत् विश्वस्तरीय-क्रीडा-आयोजनानां आयोजनं तथा विश्वस्तरीय-क्रीडकानां निर्माणम् इति दिल्ली-सर्वकारस्य द्विविध-रणनीतेः अङ्गम् अस्ति। सर्वकारस्य लक्ष्यं केवलं पदक-प्राप्तिः न, अपितु तादृशान् विजेतॄन् निर्मातुं यैः अग्रिमवंश: प्रेरित: भविष्यति। सः अवदत् यत् चैम्पियनशिपस्य आधिकारिक-शुभङ्करः ‘मयूरः’ केवलं प्रतीकं न, अपितु आत्मविश्वासस्य, उत्कृष्टतायाः, दृढ-सङ्कल्पस्य, क्रीडा-भावनायाः तथा भारतीय-संस्कृतेः प्रतिनिधिः अस्ति। भारतीय-परम्परायां मयूरः गौरवस्य, ऊर्जायाः, सौन्दर्यस्य च प्रतीकः मन्यते। अयं शुभङ्करः विश्वस्य विभिन्न-देशेभ्यः आगच्छतां क्रीडकाणां स्वागतं करिष्यति तथा युवभ्यः एतत् सन्देशं दास्यति यत् भारतीय-मूल्यानि वैश्विक-उत्कृष्टतया सह अग्रे वर्धितुं शक्नुवन्ति।

Hindusthan Samachar / Divya Ranjan