भुवनेश्वरनगरम्, १४ जुलाईमासः (हि.स.)। ओडिशा-राज्यस्य उपमुख्यमन्त्री पर्यटनमन्त्री च प्रभाती-परिडा मङ्गल-वासरे भुवनेश्वरस्थिते पर्यटन-भवने आयोजितायां पत्रकार-वार्तायां ‘वरिष्ठ-नागरिक-तीर्थयात्रा-योजना २०२६–२७’ इत्यस्याः दिशानिर्देश-पुस्तिकायाः विमोचनम् अकरोत्। अनेन सह राज्य-सर्वकारेण वरिष्ठ-नागरिकाणां कृते सञ्चाल्यमानायाः प्रमुख-तीर्थयात्रा-योजनायाः क्रियान्वयन-प्रक्रिया औपचारिकरूपेण प्रारब्धा।

पत्रकार-वार्तायां उपमुख्यमन्त्री प्रभाती-परिडा उक्तवती यत् वरिष्ठ-नागरिक-तीर्थयात्रा-योजना राज्यसर्वकारस्य तस्याः प्रतिबद्धतायाः प्रतीका अस्ति, यस्याः माध्यमेन वरिष्ठ-नागरिकेभ्यः देशस्य विविधेषु पवित्र-धार्मिक-स्थलेषु सम्मानेन, सुरक्षया, सर्वकारीय-सहयोगेन च तीर्थयात्रा कारयितुं प्रयत्नः क्रियते।

तया उक्तं यत् योजनायाः प्रारम्भात् अद्यावधि ४५,५५५ अधिकाः वरिष्ठ-नागरिकाः अस्याः योजनायाः लाभं प्राप्य देशस्य विविध-प्रमुख-तीर्थस्थलानां यात्रां कृतवन्तः, यत् अस्याः योजनायाः व्यापक-स्वीकृतिं सफलतां च प्रदर्शयति। सा अवदत् यत् २०२६–२७ वर्षस्य कृते योजनायाः आवेदन-प्रक्रिया १५ जुलाईमासात् १४ अगस्तमासपर्यन्तम् प्रवर्तिष्यते। पात्राः वरिष्ठ-नागरिकाः yatra.odisha.gov.in इति पटलस्य माध्यमेन अन्तर्जाल-रूपेण आवेदनं कर्तुं शक्नुवन्ति। अधिसूचित-दिशानिर्देशानुसारम् ऑफलाइन-माध्यमेन अपि आवेदनस्य सुविधा उपलब्धा भविष्यति।

प्रकाशितेषु दिशानिर्देशेषु योजनायाः पात्रता, आवेदन-प्रक्रिया, चयन-विधिः तथा अन्ये सञ्चालन-सम्बद्धाः प्रावधानाः विस्तरेण निर्दिष्टाः सन्ति।

Hindusthan Samachar / Divya Ranjan