सतना, 14 जुलाईमासः (हि.स.)।आषाढामावास्यायाः पावनावसरे मध्यप्रदेशस्य उत्तरप्रदेशस्य च सीमायां स्थितायां धर्मनगऱ्यां चित्रकूटे मङ्गलवासरे श्रद्धाभक्त्योः विराट्सङ्गमः दृष्टः। प्रशासनस्य अनुसारेण द्विलक्षाधिकैः श्रद्धालुभिः भगवानः कामतानाथस्य दर्शनं कृत्वा कामदगिरेः परिक्रमा कृता। समग्रदिने मन्दिरपरिसरे, रामघाटे तथा प्रमुखधार्मिकस्थलेषु श्रद्धालूनां विशालः जनसमूहः समुपस्थितः आसीत्।

सोमवासरस्य रात्रेः आरभ्य एव श्रद्धालूनां चित्रकूटागमनम् आरब्धम्। मङ्गलवासरे ब्रह्ममुहूर्ते श्रद्धालुभिः मन्दाकिनीनद्यां पवित्रस्नानं कृतम्। ततः परं ते मत्स्यगजेन्द्रनाथमहाराजस्य दर्शनं कृत्वा भगवानः कामतानाथस्य दर्शनपूजनानन्तरं कामदगिरेः परिक्रमा कृत्वा पुण्यम् अर्जितवन्तः। समग्रतीर्थक्षेत्रे दिवसभरं जय कामतानाथ तथा जय श्रीराम इति जयघोषाः प्रतिध्वनिताः।

कामदगिरिपरिक्रमायाः अतिरिक्तं बहुसंख्यकाः श्रद्धालवः हनुमानधारा, सतीअनुसूयाआश्रमः, गुप्तगोदावरी, स्फटिकशिला, भरतमिलापः तथा अन्येषु प्रमुखधार्मिकस्थलेषु गत्वा दर्शनं कृतवन्तः। देशस्य विविधप्रदेशेभ्यः आगतैः श्रद्धालुभिः चित्रकूटस्य मार्गाः, घाटाः तथा मन्दिरपरिसराः दिवसभरं परिपूर्णाः आसन्।

मेलायाः निमित्तं प्रशासनस्य व्यापकाः सुरक्षाप्रबन्धाः कृताः। प्रमुखचतुष्पथेषु, मन्दिरेषु तथा परिक्रमामार्गे अतिरिक्तपुलिसबलस्य नियुक्तिः कृता। चित्रकूटनगरपरिषदः नियन्त्रणकक्षात् समग्रमेलाव्यवस्थायाः निरन्तरं निरीक्षणं कृतम्, प्रशासनिकाधिकारिणः च विभिन्नस्थलानां भ्रमणं कृत्वा व्यवस्थाः परीक्षितवन्तः।

तथापि विशालजनसमूहस्य अपेक्षया मूलभूतसुविधाः पर्याप्ताः नासन्। अनेकस्थलेषु पेयजलस्य समुचितव्यवस्था नासीत्, अतः श्रद्धालवः जलार्थम् इतस्ततः भ्रमितवन्तः। चलितशौचालयानां न्यूनतया विशेषतः महिलाश्रद्धालुभ्यः कठिनतां सोढवती। उष्णार्द्रवातावरणम्, दीर्घाः पङ्क्तयः तथा सीमितसुविधाः अपि श्रद्धालूनां कष्टानि अवर्धयन्।

श्रद्धालवः अवदन् यत् अन्तरराष्ट्रीयपरिचितिं धारयति चित्रकूटं यत्र प्रत्यमावास्यां लक्षाधिकाः श्रद्धालवः आगच्छन्ति। अतः पेयजलस्य, शौचालयानां, स्वच्छतायाः तथा विश्रामव्यवस्थायाः अधिकं सुदृढः प्रबन्धः करणीयः। तैः भविष्यत्सु मेलेषु व्यवस्थाः अधिकं सुदृढाः कर्तुम् आग्रहः कृतः।

अस्य विषये नगरपरिषदः मुख्यनगरपालिकाधिकारी अङ्कितसोनी अवदत् यत् यदि कुत्रचित् काचित् न्यूनता अभवत् तर्हि तस्याः निवारणाय प्रयत्नः करिष्यते। तेन उक्तं यत् नगरपरिषदः निरन्तरं प्रयतते यत् श्रद्धालुभ्यः सर्वाः आवश्यकसुविधाः सम्यक् प्रदीयेरन्।

Hindusthan Samachar / Dheeraj Maithani