चेन्नई, 14 जुलाईमासः (हि.स.)। तमिलनाडुराज्यसरकारः राज्यस्य स्वास्थ्यसेवाः अधिकाः सुदृढाः आधुनिकाश्च जनसहभागित्याधारिताश्च कर्तुं दिशि मङ्गलवासरे महत्त्वपूर्णां पहलं कृत्वा ‘नलम् टीएन’ इति योजनां तस्याश्च आधिकारिकजालपुटस्य शुभारम्भम् अकरोत्। मुख्यमन्त्री जोसेफविजय-महोदयः चेन्नैनगरे स्टेटकॉलेजे आयोजिते समारोहे योजनायाः जालपुटम् उद्घाटितवान् तथा च तस्याः आधिकारिकचिह्नम् अपि प्रकाशितवान्। अस्मिन् अवसरे तेन नवनियुक्तेभ्यः चिकित्सकेभ्यः स्वास्थ्यकर्मिभ्यश्च नियुक्तिपत्राणि वितीर्य सेवाभावेन संवेदनशीलतया च स्वकर्तव्यपालनाय प्रेरणा प्रदत्ता।

समारोहे मुख्यमन्त्री विजय-महोदयः कुलम् ७५१ सहायकचिकित्साधिकारिभ्यः १३९३ स्वास्थ्यनिरीक्षकेभ्यश्च सहितं २१४४ स्वास्थ्यकर्मिभ्यः नियुक्त्यादेशान् प्रदत्तवान्। कार्यक्रमस्य मध्ये भावस्पर्शी दृश्यं तदा दृष्टम् यदा एका दिव्याङ्गा महिला चिकित्सिका मञ्चम् उपगन्तुं नाशकत्। एतत् दृष्ट्वा मुख्यमन्त्री स्वयम् मञ्चात् अवतीर्य तस्याः समीपम् अगच्छत् तथा च तस्यै नियुक्तिपत्रं समर्पितवान्। मुख्यमन्त्रिणः अस्य संवेदनशीलस्य व्यवहारस्य समारोहे उपस्थितैः जनैः प्रशंसा कृता।

राज्यसरकारस्य अनुसारेण ‘नलम् टीएन’ योजनायाः उद्देश्यं राजकीयचिकित्सालयानां मूलभूतावसंरचनायाः सुदृढीकरणम् आधुनिकचिकित्सासुविधानां विस्तारः रोगिभ्यः गुणवत्तापूर्णचिकित्सायाः उपलब्धिकरणं च अस्ति। योजनायाः अन्तर्गतं चिकित्सालयेषु स्वच्छानां आधुनिकशौचालयानां निर्माणम्, प्राकारव्यवस्थायाः निर्माणम्, चिकित्सकानां परिचारिकाणां च कृते आवाससुविधानां विकासः, डायलिसिसयन्त्राणां सङ्ख्यायाः वर्धनम्, कर्कटरोगचिकित्सार्थम् अत्याधुनिकोपकरणानाम् उपलब्धिकरणं च प्राथमिकतया समाविष्टम् अस्ति।

मुख्यमन्त्री अस्मिन् अवसरे उक्तवान् यत् राज्यसरकारः स्वास्थ्यक्षेत्रं नवीनोच्चतां नेतुं दृढसङ्कल्पा अस्ति। तेन उक्तं यत् उत्तममूलभूतावसंरचना आधुनिकप्रौद्योगिकी च यथा आवश्यके स्तः तथा चिकित्साकर्मिणां संवेदनशीलतापि गुणवत्तापूर्णस्वास्थ्यसेवानां आधारशिला अस्ति। तेन नवनियुक्तेभ्यः अधिकारिभ्यः स्वास्थ्यकर्मिभ्यश्च अपेक्षा व्यक्ता यत् ते रोगिषु मानवीयदृष्टिकोणम् अवलम्ब्य पूर्णनिष्ठया समर्पणेन च कार्यं कुर्वन्तु।

अस्मिन् अवसरे राज्यस्य स्वास्थ्य मन्त्री अरुणराज-महोदयः उक्तवान् यत् स्वास्थ्यनिरीक्षकाः समाजं सङ्क्रामकरोगेभ्यः अन्येभ्यश्च व्याधिभ्यः सुरक्षितं कर्तुं महत्त्वपूर्णां भूमिकां निर्वहन्ति। तेन उक्तं यत् राजकीयचिकित्सालयेषु आगच्छन्तः अधिकांशरोगिणः आर्थिकदृष्ट्या दुर्बलवर्गसम्बद्धाः भवन्ति ये चिकित्सार्थं सरकारे विश्वासं कृत्वा आगच्छन्ति। अतः चिकित्सकानां स्वास्थ्यनिरीक्षकाणां च उत्तरदायित्वं केवलं चिकित्सासेवाप्रदानपर्यन्तं न सीमितम्, अपितु तेषां व्यवहारः संवेदनशीलता च जनविश्वासस्य दृढीकरणेऽपि महत्त्वपूर्णा स्तः।

स्वास्थ्यमन्त्री उक्तवान् यत् दरिद्राणां आवश्यकतायुक्तानां च रोगिणां प्रति आत्मीयता, सहानुभूतिः, सम्मानभावश्च एव सरकारस्य महत्तमा परिचायकः अस्ति। स्वास्थ्यकर्मिभिः स्वकर्तव्यपालनं सेवाभावेन, प्रामाणिकतया, समर्पणेन च कर्तव्यम्, येन प्रत्येकस्मै नागरिकाय सम्मानजनकाः गुणवत्तापूर्णाश्च स्वास्थ्यसेवाः उपलब्धाः भवेयुः।

स्वास्थ्यमन्त्री अवदत् यत् ‘नलम् टीएन’ संस्थायाः माध्यमेन स्वास्थ्यक्षेत्रस्य विकासे समाजस्य सक्रियसहभागिता सुनिश्चिता भविष्यति। तेन उक्तं यत् निगमसंस्थाभ्यः, उद्योगसमूहेभ्यः, स्वैच्छिकसंस्थाभ्यः, सामान्यनागरिकेभ्यश्च राजकीयचिकित्सालयानां विकासे योगदानस्य अवसरः प्रदास्यते। एतदर्थं विकसितस्य ‘नलम् टीएन’ जालपुटस्य माध्यमेन सम्पूर्णा दानप्रक्रिया पारदर्शिनी उत्तरदायिनी च भविष्यति, येन प्रत्येकस्य योगदानस्य विनियोगः निर्धारितोद्देश्याय एव सुनिश्चितः भविष्यति।

अन्ते तेन जनान् प्रति आह्वानं कृतं यत् विवाहेषु, जन्मदिवसेषु, वर्षगाँठसमारोहेषु, अन्येषु शुभावसरेषु च राजकीयचिकित्सालयानां विकासार्थं ‘नलम् टीएन’ संस्थायाः माध्यमेन आर्थिकसहयोगः क्रियताम्। तस्य मते जनसहभागितया राजकीयस्वास्थ्यव्यवस्था अधिका सशक्ता भविष्यति तथा राज्यस्य प्रत्येकं नागरिकं प्रति उत्तमाः, सुलभाः, आधुनिकाश्च चिकित्सासुविधाः शीघ्रमेव प्रापयितुं लक्ष्यं सफलतां गमिष्यति।-------------

Hindusthan Samachar / Dheeraj Maithani