- ओडीओसीयोजनया विश्वस्मिन् मिष्ठतां विकीरति मीरजापुरस्य रक्तपेडालड्डुकं,व्यापाराय मेलिष्यति नूतनम् उड्डयनम्

मीरजापुरम्, 14 जुलाईमासः (हि.स.)।माता विंध्यवासिनीधाम्नः श्रद्धायाः सह सम्बद्धः मीरजापुरस्य प्रसिद्धः रक्तपेडकः अधुना वैश्विकविपण्यां स्वकीयां विशिष्टपरिचितिं स्थापयितुं अग्रे सरति। योगीसर्वकारेण एकजनपदएकव्यञ्जन योजना अन्तर्गतं रक्तपेडालड्डुकं समाविष्टः अस्ति। अस्य उत्पादनस्य, ब्राण्डनिर्माणस्य तथा विपणनस्य नूतनदिशायां प्रवर्तनस्य प्रयासः कृतः अस्ति। अनेन केवलं एषा पारम्परिकमिष्टान्नवस्तु राष्ट्रियान्तरराष्ट्रीयविपण्योः स्थानं प्राप्स्यति, अपितु अस्य सह सम्बद्धानां शिल्पिनां, लघुउद्यमिनां तथा व्यापारिणाम् आयः अपि वर्धिष्यते।

विन्ध्याचलमण्डलस्य संयुक्तोद्योगायुक्तः वीरेन्द्रकुमारसिंहः अवदत् यत् योजनायाः अन्तर्गतं पञ्चविंशतिलक्षरूप्यकात् आरभ्य पञ्चकोटिरूप्यकपर्यन्तं परियोजनासु अनुदानस्य व्यवस्था कृता अस्ति। अनेन नवीनानां उद्योगैककानां स्थापना, पुरातनप्रतिष्ठानानाम् आधुनिकीकरणम् तथा उत्पादनक्षमतायाः वर्धनं भविष्यति। सम्प्रति जनपदे प्रायः पञ्चषष्टिः उद्योगैककाः सन्ति, येषु प्रायः चत्वारिशताधिकशतजनानां जीविका रक्तपेडकव्यापारेण सम्बद्धा अस्ति। उद्यमिभ्यः आर्थिकसाहाय्येन सह आधुनिकपुटीकरणम्, गुणवत्तानियन्त्रणम्, स्वच्छतामानदण्डानाम् अनुपालनम् तथा उत्पादस्य दीर्घकालसंरक्षणक्षमतावर्धनस्य प्रशिक्षणम् अपि प्रदास्यते, येन रक्तपेडकः दीर्घकालं सुरक्षितः तिष्ठेत् तथा देशविदेशविपणीषु सुकरतया प्रेषयितुं शक्येत।

श्रद्धातः उद्योगपर्यन्तं यात्रा

माता विंध्यवासिनीधामे दर्शनानन्तरं श्रद्धालवः बहुवर्षेभ्यः रक्तपेडकं प्रसादरूपेण स्वसह गृहम् नयन्ति। अधुना एषः पारम्परिकः मिष्टान्नविशेषः धार्मिकश्रद्धया सह मीरजापुरनिर्मित इति परिचयं वहन् वैश्विकविपण्यां प्रवेशाय सज्जः भवति। विशेषज्ञानां मते ओडीओसी योजनया स्थानीययुवभ्यः रोजगारस्य नूतनाः अवसराः सृज्यन्ते, शिल्पिनां कौशलं आधुनिकप्रौद्योगिक्याः साहाय्यं प्राप्स्यति तथा मीरजापुरस्य स्थानीयार्थव्यवस्थायाः नूतना दृढता भविष्यति।

ओडीओसी योजनायाः लाभाः

पञ्चविंशतिलक्षरूप्यकात् आरभ्य पञ्चकोटिरूप्यकपर्यन्तं परियोजनासु अनुदानस्य व्यवस्था।

नवीनोद्योगैककानां स्थापना तथा पुरातनव्यापारस्य विस्तारस्य प्रोत्साहनम्।

आधुनिकपुटीकरणस्य तथा गुणवत्तानियन्त्रणस्य प्रशिक्षणम्।

रक्तपेडकस्य दीर्घकालसंरक्षणक्षमतावर्धनस्य प्रौद्योगिकी।

राष्ट्रियान्ताराष्ट्रियविपणीषु प्रवेशाय सहयोगः।

Hindusthan Samachar / Dheeraj Maithani