शिमला, 14 जुलाईमासः(हि.स.)।

पूर्वमुख्यमन्त्री तथा पूर्वकेन्द्रीयमन्त्री शान्ताकुमारः उक्तवान् यत् पञ्चायतनिर्वाचनस्य प्रारम्भिकपरिणामाः हिमाचलप्रदेशे भारतीयजनतापक्षस्य समर्थनार्थं जनमतस्य स्पष्टं संकेतं प्रदर्शयन्ति। तेन उक्तं यत् अधुना यावत् अष्टजिलापरिषदां परिणामाः प्रकाशिताः सन्ति, तेषु सप्तसु जिलापरिषत्सु भाजपासमर्थिताः प्रत्याशिनः निर्वाचिताः अभवन्। तस्य मते एते परिणामाः वर्षे २०२७ तमे विधानसभानिर्वाचने भारतीयजनतापक्षस्य शासनस्थापनस्य सूचकाः सन्ति।

शान्ताकुमारः मङ्गलवासरे शान्तिपूर्णतया लोकतान्त्रिकरीत्या च सम्पन्नेषु पञ्चायतनिर्वाचनेषु प्रदेशस्य जनतां शासनं च अभिनन्दितवान्। तेन उक्तं यत् प्राप्तसूचनानुसारं सम्पूर्णप्रदेशे अपि भारतीयजनतापक्षसमर्थिताः बहवः सदस्याः पञ्चायतराजसंस्थासु निर्वाचिताः सन्ति। तेन सर्वेभ्यः निर्वाचितप्रतिनिधिभ्यः शुभकामनाः प्रदत्ताः तथा ते सत्यनिष्ठया, पारदर्शितया जनसेवाभावेन च स्वस्वक्षेत्राणां विकासं कुर्वन्तु इति अपेक्षा व्यक्ता।

स्वस्य राजनैतिकजीवनस्य उल्लेखं कुर्वन् शान्ताकुमारः अवदत् यत् तेन अपि स्वसार्वजनिकजीवनस्य आरम्भः गढजमूलाग्रामपञ्चायत्यां पञ्चरूपेण कृतः। ततः सः पञ्चायतसमितेः सदस्यः, जिलापरिषदः सदस्यः, विधानसभासदस्यः, लोकसभासदस्यश्च अभवत्। तेन उक्तं यत् पञ्चायताः लोकतन्त्रस्य सुदृढतमः आधारः सन्ति तथा जननेतॄणां निर्माणम् अपि अत्रैव भवति।

शान्ताकुमारः पुनरुक्तवान् यत् पञ्चायतराजनिर्वाचनानि केवलं स्थानीयसंस्थानां निर्वाचनानि न सन्ति, अपितु तानि प्रदेशस्य राजनैतिकदिशायाः जनभावनायाश्च प्रतिबिम्बानि भवन्ति। तस्य अभिप्रायेण वर्तमानपरिणामाः एतत् सूचयन्ति यत् प्रदेशे भारतीयजनतापक्षस्य प्रति जनविश्वासः निरन्तरं दृढतरः भवति।

---------------

Hindusthan Samachar / Dheeraj Maithani