जयपुरम्, 14 जुलाईमासः (हि.स.)।

भाजपाप्रदेशाध्यक्षः मदनराठौडः राममन्दिरस्य बुटाटीधाम्नः चन्दास्वापहरणप्रकरणम् अधिकृत्य काङ्ग्रेसनेतॄणां वक्तव्येषु तीव्रं प्रत्युत्तरं दत्त्वा अवदत् यत् केचन जनाः सुनियोजितरीत्या धार्मिकश्रद्धां बाधितुं समाजे भ्रमं प्रसारयितुं च प्रयतन्ते। तेन आरोपः कृतः यत् अस्य पृष्ठतः विदेशीयशक्तीनाम् अपि भूमिका न निराकर्तुं शक्यते, याः समाजस्य केचन जनान् विपथं नीत्वा एतादृशानां क्रियाकलापानां प्रोत्साहनं कुर्वन्ति।

राठौडः अवदत् यत् बुटाटीधामप्रकरणे काङ्ग्रेसप्रदेशाध्यक्षस्य गोविन्दसिंहडोटासरस्य वक्तव्यं दुर्भाग्यपूर्णम् अस्ति। तेन उक्तं यत् बुटाटीधाम्नः प्रबन्धने काङ्ग्रेससम्बद्धाः जनाः पूर्वमेव सम्बद्धाः आसन् तथा तत्रत्यप्रबन्धनसमितेः अध्यक्षः काङ्ग्रेसपार्षदस्य पतिः अस्ति। एवं सति भाजपाविरुद्धम् आरोपान् कर्तुं कृतः प्रयासः काङ्ग्रेसस्य उपरि एव प्रतिकूलः अभवत्। तेन उक्तं यत् डोटासरः भाजपां परिवेष्टयितुं प्रयतमानः स्वयमेव आत्मदोषं कृतवान्।

भाजपाप्रदेशाध्यक्षः अवदत् यत् येषां जनानां मन्दिरैः तेषां परम्पराभिः च कदापि सम्बन्धः नासीत् ते अद्य निराधारान् आरोपान् कृत्वा समाजस्य धार्मिकभावनाः उद्दीपयितुं प्रयतन्ते। तेन उक्तं यत् सम्पूर्णस्य प्रकरणस्य अन्वेषणाय सर्वकारेण विशेषान्वेषणदलस्य गठनं कृतम् अस्ति तथा दोषिषु विरुद्धं कठोरकार्यवाही भविष्यति। श्रीरामजन्मभूमितीर्थक्षेत्रन्यासस्य महासचिवस्य चम्पतरायस्य बहुवर्षीयसमर्पणस्य उल्लेखं कुर्वन् तं बदनामकर्तुं क्रियमाणाः प्रयासाः अत्यन्तं दुर्भाग्यपूर्णाः इति अपि तेन उक्तम्।

राठौडः अवदत् यत् श्रद्धालवः श्रद्धया प्रेरिताः मन्दिरेषु दानं ददति, येन मन्दिराणां विकासः जनहिताय च अनेकानि कार्याणि सञ्चाल्यन्ते। अतः चन्दास्वापहरणमिव निराधारान् आरोपान् कृत्वा जनानाम् आस्थायाः आघातः कर्तुं न युक्तम्। इतिहासः साक्षी अस्ति यत् विदेशीयाक्रान्तारः प्रथमं भारतस्य श्रद्धायाः सांस्कृतिकविरासतायाः च उपरि आक्रमणम् अकुर्वन् तथा अद्यापि केचन शक्तयः तादृशीमेव मानसिकतां धारयन्त्यः समाजस्य श्रद्धायाः उपरि प्रहारं कर्तुं प्रयतन्ते। एतादृशानां शक्तीनां सविस्तरमन्वेषणं कृत्वा ताः प्रकाशे आनेष्यन्ते।

राठौडः प्रसूतिमहिलानां चिकित्सासमये जातां दुःखदघटनाम् अधिकृत्य अपि गाढं शोकं व्यक्तवान् तथा अवदत् यत् एषः अत्यन्तसंवेदनशीलः विषयः अस्ति। तेन उक्तं यत् राज्यसर्वकारः एतत् प्रकरणं गम्भीरतया गृह्णाति तथा भविष्ये एतादृशानां घटनानां पुनरावृत्तिं निवारयितुं आवश्यकानि पदानि स्वीकर्तुं प्रयतिष्यते।

---------------

Hindusthan Samachar / Dheeraj Maithani