– सूरजपुर-जनपद-चिकित्सालये षट् सफलाः सम्पूर्ण-कटि-सन्धि-प्रतिस्थापन-शल्यक्रियाः, रोगिभ्यः महन्नगरगमनस्य आवश्यकता न भविष्यति

रायपुरम्, १५ जुलाईमासः (हि.स.)। छत्तीसगढे स्वास्थ्यसुविधानां विकेन्द्री-करणस्य तथा जनपद-चिकित्सालयान् आधुनिक-चिकित्सा-सेवाभिः सशक्तीकर्तुं प्रयत्नस्य दिशि अन्यद् एक: महत्त्वपूर्ण: उपलब्धि: अभवत्। सूरजपुर-जनपद-चिकित्सालयेन सफलतापूर्वकं षट् सम्पूर्ण-कटि-सन्धि-प्रतिस्थापन-शल्यक्रियाः सम्पन्नाः कृत्वा एतत् सिद्धं कृतम् यत् अधुना जटिल-अस्थि-शल्यचिकित्सायाः अत्याधुनिकाः सेवाः अपि जनपद-स्तरे उपलब्धाः भवन्ति।

अनेन उपलब्धिना केवलं सूरजपुर-जनपदस्य एव न, अपितु समीपवर्तिनां जनपदानाम् रोगिणः अपि लाभान्विताः भविष्यन्ति। अधुना तेषां महर्घ-चिकित्सार्थं रायपुरं वा अन्यानि महन्नगराणि प्रति गन्तुं आवश्यकता न भविष्यति। अनेन रोगिणां समयस्य, धनस्य तथा अनावश्यक-क्लेशस्य अपि संरक्षणं भविष्यति।

मुख्य-चिकित्सा-स्वास्थ्याधिकारी डॉ. कपिलदेव-पैकरा तथा शल्यचिकित्सक: डॉ. अजय-मरकाम: इत्येतयोः नेतृत्वे अस्थिरोग-विशेषज्ञौ डॉ. अजय-साहू तथा डॉ. अमन-गुप्तः एताः जटिल-शल्यक्रियाः सफलतापूर्वकम् अकुरुताम्। संवेदनाहार-विशेषज्ञौ डॉ. विकास-भगत: तथा डॉ. अनिल-कुमारः अपि शल्यक्रियाणां सफलतायां महत्त्वपूर्णां भूमिकाम् अवहताम्।

अस्याः सिद्धेः नर्सिङ्ग-विभागस्य तथा शल्यकक्षस्य सम्पूर्णदलस्य अपि उल्लेखनीयं योगदानम् आसीत्। समर्पित-सामूहिक-प्रयत्नेन आधुनिक-चिकित्साव्यवस्थया च सर्वाः शल्यक्रियाः सफलाः अभवन्।

शल्यक्रियाणाम् अनन्तरं सर्वे रोगिणः स्वस्थाः सन्ति तथा चिकित्सकीय-पर्यवेक्षणे शीघ्रं स्वास्थ्यलाभं प्राप्नुवन्ति। एषा सफलता एतस्य प्रमाणम् अस्ति यत् राज्यसर्वकारेण जनपद-चिकित्सालयेषु विशेषज्ञ-चिकित्सकानां, आधुनिक-उपकरणानां तथा उन्नत-स्वास्थ्य-अधोसंरचनायाः कृते कृतस्य निवेशस्य सकारात्मकः परिणामः अधुना सामान्य-नागरिकान् प्रति प्राप्नोति।

स्वास्थ्यविशेषज्ञानां मते जनपद-चिकित्सालयेषु सम्पूर्ण-कटि-सन्धि-प्रतिस्थापन-शल्यचिकित्सायाः उपलब्धतया विशेषतः आर्थिकदृष्ट्या दुर्बलाः, ग्रामीण-प्रदेशेषु तथा दूरस्थ-क्षेत्रेषु निवसन्तः रोगिणः अधिकं लाभं प्राप्स्यन्ति। अनेन गम्भीर-अस्थिरोगाणां चिकित्सायाः सुलभता वर्धिष्यते तथा स्वास्थ्यसेवासु जनानां विश्वासः अपि दृढीभविष्यति।

मुख्य-चिकित्सा-स्वास्थ्याधिकारी डॉ. कपिलदेव-पैकरा सम्पूर्ण-चिकित्सा-दलस्य, नर्सिङ्ग-कर्मचारिणां तथा सहयोगि-कर्मचारिणां अभिनन्दनं कृत्वा बुधवासरे अवदत् यत् भविष्येऽपि सूरजपुर-जनपद-चिकित्सालये आधुनिकानां गुणवत्तापूर्ण-स्वास्थ्यसेवानां निरन्तरं विस्तारः करिष्यते, येन प्रदेशस्य नागरिकाः स्वजनपदे एव उत्कृष्टं विशेषज्ञ-चिकित्सोपचारं प्राप्नुयुः।

Hindusthan Samachar / Divya Ranjan