अररिया 15 जुलाईमासः(हि.स.)।

काङ्ग्रेसदलस्य अनुसूचितजातिविभागेन अल्पसंख्यकविभागेन च संयुक्ततत्त्वावधानेन आगामिनि जुलैमासस्य २७ तमे दिने देहल्यां जन्तरमन्तरस्थले घोषिते राष्ट्रियान्दोलने अररियाजनपदतः शतशः काङ्ग्रेसकार्यकर्तारः सहभागिनः भविष्यन्ति। अस्य आन्दोलनस्य नेतृत्वं काङ्ग्रेसस्य अनुसूचितजातिविभागस्य राष्ट्रियाध्यक्षः राजेन्द्रपालगौतमः तथा काङ्ग्रेसस्य अल्पसंख्यकविभागस्य राष्ट्रियाध्यक्षः राज्यसभासदस्यश्च इमरानप्रतापगढी संयुक्तरूपेण करिष्यतः।

काङ्ग्रेसस्य अल्पसंख्यकविभागस्य अररियाजनपदाध्यक्षः सैफ अली खान बुधवासरे अवदत् यत् वर्तमानकेन्द्रसर्वकारस्य कार्यकाले दलितानां, आदिवासिनां, मुसलमानानां च विरुद्धम् अत्याचारहिंसाभेदभावादीनां घटनानां निरन्तरवृद्धिः अभवत्। एतेषां विषयाणां विषये देशव्यापिजनमतस्य निर्माणाय, सामाजिकन्यायस्य, समतायाः, संविधानस्य संरक्षणस्य च स्वरं प्रबलं कर्तुमिदं राष्ट्रियान्दोलनम् आयोज्यते।

तेन उक्तं यत् बिहारराज्यात्, विशेषतः सीमाञ्चलप्रदेशस्य अररिया, पूर्णिया, कटिहार, किशनगञ्जादिभ्यः जनपदेभ्यः बहुसंख्यकाः काङ्ग्रेसकार्यकर्तारः, दलिताः, मुसलमानाः, युवानः, सामाजिकन्याये श्रद्धां धारयन्तश्च जनाः आन्दोलनभागित्वाय देहलीं गमिष्यन्ति।

सैफ अली खान जनपदस्य समस्तान् काङ्ग्रेसजनान्, अनुसूचितजातिविभागस्य, अल्पसंख्यकविभागस्य पदाधिकारिणः, सामाजिकसङ्गठनानि, संविधाने श्रद्धां धारयन्तः नागरिकांश्च अधिकाधिकसंख्यया जन्तरमन्तरस्थलं समागत्य आन्दोलनस्य सफलतां सुनिश्चितीकर्तुम् आह्वानम् अकरोत्।

Hindusthan Samachar / Dheeraj Maithani