नवदेहली, १५ जुलाईमासः (हि.स.)। राष्ट्रीय-स्वयंसेवक-सङ्घस्य सरसंघचालकः डॉ. मोहन-भागवतः देशस्य मातृशक्त्या सह ‘मातृत्व-विमर्श’ इति विषये विस्तृतं संवादं करिष्यति। जुलाईमासस्य २४ दिनाङ्के अन्ताराष्ट्रिय-अम्बेडकर-केन्द्रे विश्वमाङ्गल्यसभया आयोजिते अस्मिन् संवाद-कार्यक्रमे देशस्य विभिन्न-प्रदेशेभ्यः प्रायः सप्तशतं प्रतिनिधयः उपस्थिताः भविष्यन्ति।

बुधवासरे कांस्टीट्यूशन-क्लब-इत्यत्र आयोजितायां पत्रकार-वार्तायां विश्व-माङ्गल्यसभायाः राष्ट्रीय-सङ्गठन-मन्त्री डॉ. वृषाली-जोशी अवदत् यत् आगामि-वर्षाणां कृते युगानुकूल-मातृत्वम् इति विषये सरसंघचालकस्य मोहन-भागवतः महिलाभिः सह एतादृशः व्यापकः संवादः आयोज्यते। अयं कार्यक्रमः प्रायः द्वे सार्ध-द्वि-होरा यावत् चलिष्यति। अस्मिन् अवसरे डॉ. मोहन-भागवतः मातृत्वम्, परिवारः, समाज-निर्माणम्, राष्ट्रजीवने महिलानां भूमिका च इत्यादिषु विषयेषु स्वविचारान् प्रस्तोष्यति। कार्यक्रमस्य महत्त्वपूर्णोऽंशः प्रश्नोत्तर-सत्रमपि भविष्यति, यस्मिन् उपस्थिताः महिलाः प्रत्यक्षतया सरसंघचालकं प्रश्नान् प्रष्टुं स्वविचारान् च निवेदयितुं शक्नुवन्ति।

सा अवदत् यत् राष्ट्रीय-स्वयंसेवक-सङ्घस्य शताब्दी-वर्षे आयोजितः अयं कार्यक्रमः विशेष-ऐतिहासिक-महत्त्वं धारयति। सङ्घस्य अद्यावधि पञ्च-सरसंघचालकानां कार्यकाले प्रथमवारम् एतादृशः अवसरः भविष्यति, यदा सरसंघचालकः देशस्य प्रबुद्ध-मातृशक्त्या सह ‘मातृत्व-विमर्श’ इति विषये मुक्तं विस्तृतं च संवादं करिष्यति।

तया उक्तं यत् देहल्याः अम्बेडकर-भवने आयोजिते अस्मिन् कार्यक्रमे देहली-सहितम् उत्तर-भारतस्य विभिन्न-राज्येभ्यः प्रायः सप्तशतात् अष्टशतं यावत्य: महिला-प्रतिनिधयः सहभागिन्यः भविष्यन्ति। तासु शिक्षाक्षेत्रस्य, समाजसेवायाः, संस्कृतेः, साहित्यस्य, चिकित्सायाः, न्यायस्य, प्रशासनस्य, उद्योगस्य तथा अन्येषां विविध-क्षेत्राणां प्रबुद्ध-महिलाः समाविष्टाः भविष्यन्ति।

सा अवदत् यत् अस्यैव क्रमस्य अन्तर्गतं हैदराबाद-नगरेऽपि समरूपः कार्यक्रमः आयोज्यते, यस्मिन् प्रायः त्रयोदशशतं प्रतिनिधीनां सहभागितायाः सम्भावना वर्तते। एतेषां संवाद-कार्यक्रमाणाम् उद्देश्यं समाजे मातृत्वस्य भूमिकायाः, परिवार-व्यवस्थायाः, संस्कार-निर्माणस्य, राष्ट्र-निर्माणे महिलानां योगदानस्य च विषये व्यापक-विमर्शं प्रवर्तयितुम् अस्ति।

डॉ. वृषाली-जोशी अवदत् यत् अयं संवादः समाजस्य विविध-वर्गीयाभिः महिलाभिः सह सार्थक-चर्चायाः मञ्चं प्रदास्यति तथा मातृत्वस्य सामाजिक-सांस्कृतिक-राष्ट्रीय-आयामेषु व्यापक-विमर्शं प्रोत्साहयिष्यति।

तया अपि उक्तं यत् अधुना सङ्घटनस्य कार्यं देशस्य त्रयस्त्रिंशत्-प्रान्तेषु प्रवर्तते। अस्मिन् सङ्घटने त्रिसहस्र-पञ्चशतानि दायित्ववत्य: कार्यकर्त्र्यः तथा षट्-लक्षाधिकाः महिलाः सम्बद्धाः सन्ति। सम्प्रतिकाले देहली-सहितं त्रयोविंशति-प्रान्तेषु महिला-अधिवेशनानि आयोजितानि, येषु प्रायः पञ्चत्रिंशत्-सहस्रं महिलानां सहभागिता अभवत्। एतेषां संवादानाम् आधारेण सङ्गठनेन अग्रिम-वर्षेषु ‘युगानुकूल-मातृत्वम्’ इति विषये विविध-उपक्रमैः कार्यं कर्तुं निश्चयः कृतः।

/ अंशु गुप्ता