कोलकातानगरम्, १५ जुलाईमासः (हि.स.)। जर्मनी-देशस्य सुहल-नगरे आयोजितायां आईएसएसएफ-कनिष्ठ-विश्व-निशानेबाजी-चैम्पियनशिप-स्पर्धायां विश्व-अभिलेखं संस्थाप्य इतिहासं रचितवान् आसनसोल-नगरस्य युवा-लक्ष्यभेदक: अभिनव-सावः पश्चिम-बङ्गाल-सर्वकारेण सम्मानितः। बुधवासरे राज्यस्य क्रीडामन्त्री डॉ. इन्द्रनील-खाँ कोलकाता-स्थिते न्यू-सेक्रेटेरिएट-कार्यालये तम् सम्मानितवान्। अस्मिन् अवसरे अभिनवस्य मातापितरौ अपि उपस्थितौ आस्ताम्।

सम्मान-समारोहे मन्त्री डॉ. इन्द्रनील-खाँ अभिनवस्य उपलब्धीनां प्रशंसां कृत्वा अवदत् यत् अभिनवः केवलं बङ्गालस्य न, अपितु सम्पूर्ण-भारतस्य गौरवम् अस्ति। तेन आश्वासनं दत्तं यत् राज्य-सर्वकारः अभिनवस्य ओलम्पिक-पदक-प्राप्तेः लक्ष्यस्य सिद्ध्यर्थं सर्वथा सहयोगं करिष्यति।

अभिनव-सावः जर्मनी-देशस्य सुहल-नगरे आयोजितायां १०-मीटर-एयर-राइफल-मिक्स्ड-दल-स्पर्धायां स्वीयया युग्मसहभागिन्या साम्भव्या सह ५०५.८ अङ्कान् प्राप्तवान् तथा च नूतनं विश्व-अभिलेखं स्थापितवान्। अस्याः स्पर्धायाः पूर्वः विश्व-अभिलेखः ४९९.९ अङ्काः आसन्। लक्ष्यभेदम् इव अत्यन्त-स्पर्धात्मक-क्रीडायां प्रायः षडङ्कानां भेदेन अभिलेख-भङ्गः महती उपलब्धिः मन्यते।

एतत् अभिनवस्य सप्तदशम् अन्ताराष्ट्रिय-पदकम् अस्ति। सः वर्ष २०२२ प्रभृति: भारतीय-लक्ष्यभेदक-दलस्य सदस्यः अस्ति। केवलं दश-वर्षीयः सन् सः राष्ट्रीय-कीर्तिमान् लक्ष्यभेदक: अभवत्। चतुर्दश-वर्षीयावस्थायामेव जर्मनी-देशस्य सुहल-नगरे स्वस्य प्रथमम् अन्ताराष्ट्रिय-पदकं विजित्य भारतस्य यशः वर्धितवान्। ततः प्रभृति सः कनिष्ठ-विश्व-कप्, विश्व-चैम्पियनशिप् तथा एशियाई-चैम्पियनशिप्-प्रतियोगितासु निरन्तरं भारताय पदकानि जेष्यति स्म।

वर्ष २०२५ तमे कजाकिस्तान-देशे आयोजितायाम् एशियाई-निशानेबाजी-चैम्पियनशिप्-प्रतियोगितायां द्वौ स्वर्ण-पदकौ विजित्य तस्मै तत्कालीन-मुख्यमन्त्रिणा अपि अभिनन्दनं प्रदत्तम्।

सम्मान-समारोहस्य अवसरे अभिनव-सावः मन्त्री डॉ. इन्द्रनील-खाँ प्रति कृतज्ञतां प्रकटितवान्। मन्त्री अवदत् यत् अभिनव-सावम् इव प्रतिभाशालिनः क्रीडकाः देशस्य युवभ्यः प्रेरणास्रोतांसि सन्ति तथा च तस्य विश्व-अभिलेखः भारतीय-क्रीडा-जगतः कृते गौरवस्य विषयः अस्ति।

Hindusthan Samachar / Divya Ranjan