डूंगरपुरम्, 15 जुलाईमासः (हि.स.)।

जनपदस्य गेंजीग्रामे आयोजिते ग्रामीणसेवाशिविरे मानवता सामाजिकसमरसता सामूहिकसहयोगस्य च अत्यन्तं प्रेरणादायकम् उदाहरणं समुपस्थितम्। ग्रामे पञ्चायत्याः समीपे आवासीयभूमेः अनुपलब्धेः तथा पट्टाप्रदानस्य प्राविधिकविवशतायाः मध्ये समाजस्य प्रबुद्धनागरिकैः प्रशासनिकाधिकारिभिः च सहकार्येण अत्यन्तनिर्धनस्य भूमिहीनस्य स्वच्छताकर्मकरपरिवारस्य निवासस्वप्नं साकारं कृतम्। मानवीयसंवेदनाभिः परिपूर्णस्य अस्य अनुकरणीयप्रयत्नस्य समग्रक्षेत्रे प्रशंसा क्रियते।

प्राप्तसूचनानुसारं शिविरस्य समये यदा अस्य भूमिहीनस्वच्छताकर्मकरपरिवारस्य आवाससमस्या पुरतः समुपस्थिता तदा पञ्चायत्स्तरे शासकीयभूमेः अनुपलब्धत्वात् पट्टाप्रदानं सम्भवं नासीत्। अस्मिन् विषमे समये शिविरप्रभारी पूर्वबीडीओ मोहनयादवस्य प्रेरणया तहसीलदारः प्रवीणमीणस्य मार्गदर्शनेन च समाधानस्य मार्गः अन्विष्टः।

ग्रामस्य एव संवेदनशीलनागरिकः राजेन्द्रगौतमलखारा अनुकरणीयमानवीयसंवेदनायाः परिचयं दत्त्वा सूरजमलसादात् क्रीतायाः स्वभूमेः एकम् आवासीयभूमिखण्डम् उक्तपीडितपरिवाराय निःशुल्कं दातुं घोषणा अकरोत्।

भूमिखण्डदानानन्तरं भूमेः वैधानिकप्रक्रियायाः सम्पन्नतायै प्रशासनिकाधिकारिणः ग्रामवासिनश्च तत्क्षणमेव सहायतार्थं अग्रे आगतवन्तः।

तहसीलदारः प्रवीणमीणः अपि संवेदनशीलतां प्रदर्शयन् स्थल एव भूमिपञ्जीकरणव्ययार्थं स्वपक्षतः द्विसहस्रमेकशतं रूप्यकाणां आर्थिकसहाय्यस्य घोषणाम् अकरोत्। तस्य अस्य प्रेरणादायकप्रयत्नस्य अनन्तरं शिविरे उपस्थिताः ग्रामवासिनः प्रबुद्धनागरिकाश्च एकस्वरेण अवशिष्टं पञ्जीकरणव्ययं परस्परसहयोगेन वहितुं सङ्कल्पम् अकुर्वन्। येन पीडितपरिवारस्य उपरि किमपि आर्थिकभारः न भवेत् तथा भूमिः विधिवत् तेषां नाम्नि हस्तान्तरिता भवेत्।

अस्य ऐतिहासिकस्य भावपूर्णस्य च क्षणस्य साक्षिणः भवितुं शिविरे बहुसंख्यकाः ग्रामवासिनः प्रबुद्धनागरिकाश्च उपस्थिताः आसन्। उपस्थितैः सर्वैः ग्रामवासिभिः एतत् त्वरितरक्षणकार्यं सामाजिकसमरसतायाः उत्कृष्टम् उदाहरणम् इति कथयित्वा उक्तं यत् एतादृशाः प्रयत्नाः समाजे परस्परभ्रातृत्वस्य अन्त्योदयभावनायाश्च अधिकं सुदृढीकरणं कुर्वन्ति।

---------------

Hindusthan Samachar / Dheeraj Maithani