- उद्योगसभासु, सन्धिपत्रेषु, निवेशसंवादेषु च विशेषः केन्द्रबिन्दुः

भोपालनगरम्, १६ जुलाईमासः (हि.स.)। मध्यप्रदेशस्य मुख्यमन्त्री डॉ. मोहनयादवः अद्य गुरुवासरे नवदिल्लीप्रवासे भविष्यति। सः अत्र भारतमण्डपे आयोजिते भारत-टेक्स-२०२६ इत्यस्मिन् देश-विदेशयोः प्रमुखैः वस्त्रोद्योगनिवेशकैः, उद्योग-प्रतिनिधिभिः तथा वैश्विकचिह्न-प्रतिनिधिभिः सह संवादं कृत्वा मध्यप्रदेशे निवेशस्य नवीनान् अवकाशान् प्रवर्धयिष्यति।

जनसम्पर्काधिकारी बबीता मिश्रा इत्यनया प्रदत्तायाः सूचनायाः अनुसारं मुख्यमन्त्री निवेश-उद्योगजगत्सम्बद्धेषु विविधेषु कार्यक्रमेषु सहभागं करिष्यति। सः राज्यस्य उद्योगहितैषी-नीतयः, आधुनिकाम् औद्योगिकाधारसंरचनाम् तथा वस्त्रोद्योग-वस्त्रनिर्माणक्षेत्रयोः उपलब्धाः व्यापकाः निवेशसम्भावनाः राष्ट्रीय-अन्ताराष्ट्रियोद्योगजगतः पुरतः प्रस्तोष्यति। एकैकसाक्षात्कारे, गोलमेजपरिचर्चासु, सन्धिपत्रेषु तथा निवेशसंवादेषु माध्यमेन वस्त्रोद्योग-वस्त्रनिर्माण-पादुकानिर्माणक्षेत्रेषु नवीननिवेशाकर्षणाय विस्तृता चर्चा भविष्यति।

सा अवदत् यत् मुख्यमन्त्री डॉ. यादवः भारतमण्डपे भारत-टेक्स-२०२६ प्रदर्शनस्य अवलोकनं करिष्यति तथा मध्यप्रदेशमण्डपस्य निरीक्षणमपि करिष्यति। अस्मिन् मण्डपे राज्यस्य उद्योगहितैषी-नीतयः, आधुनिकाः औद्योगिक-आधारसंरचनाः, कौशलविकास-कार्यक्रमाः, धारजनपदे विकसितं पीएम-मित्र-उद्योगोद्यानम्, वस्त्रोद्योगस्य सम्पूर्णा मूल्यशृङ्खला च वैश्विकोद्योगजगतः पुरतः प्रभावकरूपेण प्रदर्क्ष्यन्ते। मुख्यमन्त्री पत्रकारप्रतिनिधिभिः सह अपि संवादं करिष्यति।

जनसम्पर्काधिकारिणः अनुसारं मुख्यमन्त्री डॉ. यादवः भारत-टेक्स-२०२६ इत्यस्मिन् वस्त्रोद्योग-वस्त्रनिर्माणक्षेत्रस्य प्रमुखैः उद्योगपतिभिः सह आयोजितायां गोलमेजपरिचर्चायां सहभागं करिष्यति। अस्यां परिचर्चायां मध्यप्रदेशस्य वस्त्रोद्योग-वस्त्रनिर्माणपरितन्त्रस्य, निवेश-सम्भावनानां, निर्यातसंवर्धनस्य, वैश्विक-स्पर्धाक्षमतायाः, सततविनिर्माणस्य, रसद-व्यवस्थायाः तथा कौशलविकासस्य विषये विचारविमर्शः भविष्यति। केन्द्रीयवस्त्रमन्त्री गिरिराजसिंहः अपि गोलमेजपरिचर्चां सम्बोधयिष्यति। अस्यां सभायां शताधिकाः उद्योगपतयः, निवेशकाः तथा उद्योगसङ्घटनानां प्रतिनिधयः सहभागं करिष्यन्ति। कार्यक्रमे डिक्सन-टेक्नोलॉजीस-उपाध्यक्षः प्रबन्धनिदेशकश्च अतुललालः, टोपन-संस्थायाः मुख्यकार्यनिर्वाहकाधिकारी मनोहरकुमारः, हेलियॉन-संस्थायाः मुख्यकार्यनिर्वाहकाधिकारी केदारलेले, भारते ब्राजीलदेशस्य राजदूतः केनेथफेलिक्सः हैजिन्स्की दा नोब्रेगा च उपस्थिताः भविष्यन्ति।

मुख्यमन्त्री डॉ. यादवः देश-विदेशयोः प्रमुखवस्त्रोद्योग-वस्त्रनिर्माणनिर्माणीनां प्रतिनिधिभिः सह एकैकसाक्षात्कारः अपि करिष्यति। एतासु सभासु नवीननिवेशः, उत्पादनक्षमताविस्तारः, निर्यातवृद्धिः, रोजगारसृजनम् तथा प्रौद्योगिकीसहयोगः इत्यादिषु विषयेषु विस्तृतचर्चा भविष्यति। ततः परं मुख्यमन्त्री द लीला इत्यस्मिन् आतिथ्यगृहे मध्यप्रदेशे निवेशस्य अवसराः इति विषये आयोजितम् अन्तःक्रियात्मकसत्रं सम्बोधयिष्यति। अस्मिन् सत्रे राज्यस्य औद्योगिक-सम्भावनाभिः सह नवीकरणीय-ऊर्जा-पर्यटन- तथा अन्येषु उदयमानक्षेत्रेषु निवेशस्य अवसराणां प्रस्तुतीकरणानि भविष्यन्ति।

एतस्मिन् अवसरे मुख्यमन्त्री निवेशकानां पुरतः मध्यप्रदेशस्य ताः विशेषताः अपि प्रकाशयिष्यति, याभिः राज्यं देशस्य अग्रणीषु वस्त्रोद्योगनिवेशगन्तव्येषु प्रतिष्ठितम् अस्ति। राज्ये कार्पासोत्पादनात् आरभ्य सूत्रनिर्माणम्, वस्त्रवयनम्, तन्तुवयनम्, रञ्जनम्, परिष्करणम् तथा वस्त्रनिर्माणम् इत्यन्तं सम्पूर्णा वस्त्रोद्योगमूल्यशृङ्खला उपलब्धा अस्ति। देशस्य बृहत्तमस्य जैविककर्पास-उत्पादकराज्यत्वेन मध्यप्रदेशस्य परिचयः, कृषिक्षेत्रात् परिधानपर्यन्तम् इति अवधारणायाः आधारेण विकसितं वस्त्रोद्योगपरितन्त्रं तथा धारजनपदे विकसितं पीएम-मित्र-उद्योगोद्यानं वैश्विकनिवेशकानां विशेष-आकर्षणकेन्द्रम् अस्ति। वस्त्रोद्योग-वस्त्रनिर्माण-पादुकानिर्माणक्षेत्रे उपलब्धानां विविधानाम् औद्योगिक-प्रोत्साहनानां निवेशसुविधानां च विषये अपि उद्योगजगता सह सूचना सहभागी करिष्यते।

अस्मिन् अवसरे अपैरल एक्सपोर्ट प्रमोशन काउन्सिल, मैनमेड एण्ड टेक्निकल टेक्सटाइल्स एक्सपोर्ट प्रमोशन काउन्सिल तथा कॉटन टेक्सटाइल्स एक्सपोर्ट प्रमोशन काउन्सिल् इत्येताभिः संस्थाभिः सह सन्धिपत्रेषु हस्ताक्षराणि प्रस्तावितानि सन्ति। एतदतिरिक्तं विविधैः राष्ट्रीय-अन्ताराष्ट्रियव्यापार-उद्योग-सङ्घटनैः सह औद्योगिकसहयोगस्य, निवेशसंवर्धनस्य, कौशलविकासस्य तथा निर्यातप्रोत्साहनस्य वर्धनार्थम् अपि सन्धिपत्राणि सम्पन्नानि भविष्यन्ति।

Hindusthan Samachar / Divya Ranjan