काठमाण्डूनगरम्, १६ जुलाईमासः (हि.स.)। नेपालस्य उपराष्ट्रपतिः रामसहाय-प्रसाद-यादवः कतरदेशस्य अमीरः शेख-तमीम-बिन-हमद-अल-थानी इत्यनेन सह दोहानगरे शिष्टाचार-साक्षात्कारम् अकरोत्। उपराष्ट्रपति-कार्यालयस्य अनुसारं कतर-भ्रमणस्य अवसरे दोहानगरस्थिते लुसैल-प्रासादे उभयोः नेत्र्योः मध्ये उच्चस्तरीया सभाऽभवत्।

उपराष्ट्रपतिः यादवः कतारदेशस्य पूर्व-अमीरस्य शेख-हमद-बिन-खलीफा-अल-थानी इत्यस्य निधनस्य उपलक्ष्ये नेपाल-सर्वकारस्य तथा नेपाली-जनतायाः पक्षतः श्रद्धाञ्जलिं संवेदनाञ्च प्रकटयितुं कतारदेशम् आगतः। साक्षात्कारस्य समये सः अमीर-शेख-तमीमम्, राजपरिवारं तथा कतरदेशस्य जनतां प्रति गभीरां संवेदनां प्रकटितवान् तथा च अस्मिन् दुःखकाले धैर्यं शक्तिञ्च प्राप्नुयुः इति प्रार्थितवान्।

अस्मिन् अवसरे उपराष्ट्रपतिः यादवः नेपालस्य राष्ट्रपतेः रामचन्द्र-पौडेलस्य पक्षतः प्रेषितं शोक-संवेदना-सन्देशं अमीर-शेख-तमीम-बिन-हमद-अल-थानी महोदयाय समर्पितवान्। अस्यां सभायां नेपाली-प्रतिनिधिमण्डलस्य सदस्याः तथा कतरदेशस्य वरिष्ठ-सर्वकारीय-अधिकारीणः अपि उपस्थिताः आसन्।

Hindusthan Samachar / Divya Ranjan