Enter your Email Address to subscribe to our newsletters
बुडापेस्टनगरम्, १६ जुलाईमासः (हि.स.)। भारतस्य ओलम्पिक-कांस्यपदक-विजेता तथा २३-वर्ष-आयुवर्गीय-एशियाई-कुश्ती-चैम्पियनस्पर्धा अमन-सहरावतः बुधवासरे बुडापेस्ट-रैङ्किङ्ग-श्रृङ्खला २०२६ स्पर्धायां उत्कृष्टं प्रदर्शनं कृत्वा पुरुषाणां ५७ किलोग्राम-भारवर्गस्य फ्रीस्टाइल-कुश्तीविभागे स्वर्णपदकं स्वनाम्नि कृतवान्।
पोल्याक-इम्रे, वर्गा-जानोस: तथा कोज्मा-इस्तवान-स्मारक-वरिष्ठ-रैङ्किङ्ग-कुश्ती-प्रतियोगितायाः अन्तिम-स्पर्धायाम् अमन-सहरावतः जॉर्जिया-देशस्य रोबर्टी-डिङ्गाशविली इत्येनं १३–३ इति परिणामेन तकनीकी-श्रेष्ठतायाः आधारेण एकपक्षीय-स्पर्धायां पराजित्य विजेतृपदम् अलभत।
द्वाविंशतिवर्षीयः अमन-सहरावतः पुनरेकवारं सिद्धीकृतवान् यत् सः विश्वस्य उदीयमानानां श्रेष्ठ-कुश्तीपटूनां मध्ये अन्यतमः अस्ति। अस्मात् पूर्वं सः पेरिस-ओलम्पिक-क्रीडासु भारतस्य कनिष्ठतमः व्यक्तिगत-पदक-विजेता अभवत्। अपि च सः २३-वर्ष-आयुवर्गीय-विश्व-कुश्ती-चैम्पियनशिपस्पर्धायां स्वर्णपदकं विजित्य एतत् साधयितुं समर्थः प्रथमः भारतीय-कुश्तीपटुः अभवत्।
दीपकेन कांस्यपदकमपि भारताय प्राप्तम्
भारतस्य कृते अपरमपि पदकं पुरुषाणां ६१ किलोग्राम-भारवर्गस्य फ्रीस्टाइल-कुश्तीविभागे प्राप्तम्, यत्र दीपकेन कांस्यपदकं विजितम्।
तृतीय-स्थान-निर्णायक-स्पर्धायां दीपकः अजरबैजान-देशस्य नूरद्दीन-नोवरुजोवम् अत्यन्त-रोमाञ्चक-स्पर्धायां ९–८ इति परिणामेन पराजित्य कांस्यपदकम् अवाप्तवान्।
अन्ययोः कांस्यपदकयोः अपि आशा
भारताय ६५ किलोग्राम-भारवर्गस्य फ्रीस्टाइल-कुश्तीविभागे अन्ययोः कांस्यपदकयोः अपि आशा वर्तते।
कुमार-मोहितः कांस्यपदक-स्पर्धायां कजाकिस्तान-देशस्य नाचिन-कुलारस्य विरुद्धं प्रतिस्पर्धां करिष्यति।
तथैव विशाल-कालीरामणः तृतीय-स्थान-स्पर्धायां कजाकिस्तान-देशस्य ओस्सुमझान-दस्तानबेकस्य सम्मुखी भविष्यति।
महिला-कुश्तीपटव्यः अपि अद्य आरभन्ते अभियानम्
गुरुवासरात् प्रतियोगितायां पुरुषाणां ७९, ९२, ९७ तथा १२५ किलोग्राम-भारवर्गाणां स्पर्धाः आयोजयिष्यन्ते।
तस्मिन्नेव दिने भारतीय-महिला-मल्लयुद्धपटूनाम् अभियानमपि प्रारभ्यते, यस्मिन् ५० तथा ५५ किलोग्राम-भारवर्गयोः स्पर्धे आयोजयिष्येते।
भारतीय-पदक-विजेतारः
स्वर्णपदकम् (५७ किलोग्राम-फ्रीस्टाइल): अमन-सहरावतः (जॉर्जिया-देशस्य रोबर्टी-डिङ्गाशविली इत्येनं १३–३ इति परिणामेन पराजितवान्।)
कांस्यपदकम् (६१ किलोग्राम-फ्रीस्टाइल): दीपकः (अजरबैजान-देशस्य नूरद्दीन-नोवरुजोवम् ९–८ इति परिणामेन पराजितवान्।)
Hindusthan Samachar / Divya Ranjan