चेन्नई, 16 जुलाईमासः (हि.स.)। तमिलगवेत्रिकडगम दलस्य सर्वकारस्य द्वितीयमन्त्रिमण्डलोपवेशने मुख्यमन्त्री विजयः मन्त्रिभ्यः भ्रष्टाचारस्य अनुशासनस्य च विषये दृढं सन्देशं दत्तवान्। गुरुवासरे सचिवालये आयोजिते उपवेशने सः स्पष्टतया अवदत् यत् यदि कस्यचित् मन्त्रिणः विरुद्धं रिश्वतग्रहणस्य भ्रष्टाचारस्य वा गम्भीराः आरोपाः समुपस्थास्यन्ति तर्हि सः तत्कालमेव मन्त्रिमण्डलात् अपसार्यते। तेन अपि उक्तं यत् सर्वकारे कस्मिन्नपि स्तरे अनियमितता भ्रष्टाचारो वा कदापि न सह्यते।

मुख्यमन्त्री विजयः अवदत् यत् तस्य सर्वकारः पूर्णतया पारदर्शी उत्तरदायी जनहितसमर्पितश्च भविष्यति। तेन मन्त्रिणः उक्ताः यत् यदि कस्मिन्नपि विभागे व्यापकभ्रष्टाचारस्य अनियमिततानां वा शिकायताः प्राप्यन्ते तर्हि तस्य उत्तरदायित्वं सम्बन्धितमन्त्रिणः एव भविष्यति तथा कस्यापि भेदभावस्य अभावे तत्कालं कार्यवाही क्रियते। तेन स्पष्टतया उक्तं यत् कार्यवाहीकाले एतत् न परीक्ष्यते यत् सम्बन्धितः जनः दीर्घकालात् दलस्य सदस्यः आसीत् उत अन्यस्मात् दलात् आगतः।

उपवेशने मुख्यमन्त्री मन्त्रिभ्यः दलपदाधिकारिभ्यश्च निर्देशं दत्तवान् यत् ते सर्वकारीयकार्यालयेषु विद्यालयेषु च निरीक्षणस्य नाम्ना अनावश्यकहस्तक्षेपात् विरमन्तु। तेन उक्तं यत् विशेषतः सर्वकारीयविद्यालयेषु अध्ययनसमये गत्वा छात्राणां शिक्षायाः व्यवधानोत्पादनम् उचितं नास्ति। तेन विद्यालयेषु निरीक्षणकाले दृश्यचित्रनिर्माणं कृत्वा तानि सामाजिकमाध्यमेषु प्रचारयितुं प्रवृत्तेः विषये अपि असन्तोषः व्यक्तः।

मुख्यमन्त्री अवदत् यत् केषाञ्चित् मन्त्रिणां दलपदाधिकारिणां च अद्यतनक्रियाकलापानां कारणात् सर्वकारः अनावश्यकालोचनां सोढवान्। तेन निर्देशः दत्तः यत् निरीक्षणानि केवलं प्रशासनिकावश्यकतायाः आधारेण एव क्रियेरन् न तु प्रचारप्राप्त्यर्थम्। तेन स्पष्टतया उक्तं यत् रील्स इति लघुदृश्यनिर्माणं कृत्वा सामाजिकमाध्यमेषु प्रसारणस्य प्रवृत्तेः परित्यागः करणीयः तथा जनप्रतिनिधिभिः प्रचारस्य स्थाने स्वदायित्वनिर्वहणे एव ध्यानं दातव्यम्।

विजयः एतदपि स्मारितवान् यत् पूर्वं विद्यालयेषु मुख्यमन्त्रिणः चित्रस्थापनं तस्य भाषणस्य प्रत्यक्षप्रसारणं च कारितवन्तः केचन प्रधानाचार्याः दलपदाधिकारिणश्च विरुद्धं कार्यवाही कृता आसीत्। तेन सूचितं यत् भविष्ये अपि अनुशासनहीनतायाः विषये एवंविधैव कठोरकार्यवाही प्रवर्तिष्यते।

मुख्यमन्त्री विजयः वित्तविभागस्य अधिकारिभ्यः प्राप्तां संसूचनां उद्धृत्य अवदत् यत् पूर्वसर्वकारस्य कार्यकाले जातानाम् अनियमिततानां परिचयः तासां निराकरणं च तथा सर्वकारस्य राजस्ववृद्धिः प्रत्येकस्य मन्त्रिणः प्राथमिकम् उत्तरदायित्वं भवेत्। तेन उक्तं यत् मन्त्रिणां मध्ये स्वस्थस्पर्धा भवेत् यत् कः स्वविभागे पारदर्शितां वर्धयित्वा अनियमितताः निरस्य च सर्वकाराय अधिकतमं राजस्वं सम्पादयति। तेन उक्तं यत् सः स्वयं प्रत्येकस्य विभागस्य कार्याणां नियमितसमीक्षां करिष्यति।

उल्लेखनीयम् अस्ति यत् सर्वकारस्य प्रथममन्त्रिमण्डलोपवेशनं मुख्यतया विविधविकासयोजनानां अनुमोदनाय समर्पितम् आसीत्, यदा तु द्वितीयोपवेशनस्य प्रमुखः उद्देश्यः मन्त्रिभ्यः सुशासनस्य, पारदर्शितायाः, उत्तरदायित्वस्य, अनुशासनस्य च विषये स्पष्टनिर्देशप्रदानम् आसीत्।--------------

Hindusthan Samachar / Dheeraj Maithani