वाराणसीनगरम्, १६ जुलाईमासः (हि.स.)। वाराणस्यां सिगरास्थिते रुद्राक्ष-केन्द्रे उत्तरप्रदेशस्य उपमुख्यमन्त्री केशवप्रसाद-मौर्यः गुरुवासरे वीबी-जीरामजी इति कार्यक्रमे आयोजिते पञ्च-सम्मेलने देशस्य विभिन्न-प्रदेशेभ्यः आगतेभ्यः ग्रामसभा-प्रतिनिधिभ्यः सम्बोधनं कृत्वा अवदत् यत् ग्रामसभानां विकासं लक्ष्यीकृत्य कार्यं करणीयम्। कृषकाः सुदृढाः करणीयाः। लक्ष्यं निर्धार्य एव तस्य सिद्धिः भवति। देशस्य प्रधानमन्त्री नरेन्द्रमोदी विकसित-भारतस्य लक्ष्यं स्वीकृतवान्, तेन अद्यावधि पञ्चविंशतिः कोटि-जनाः निर्धनता-रेखायाः बहिः नीताः।

केशवप्रसाद-मौर्यः अवदत् यत् उत्तरप्रदेशम् अपि कुटीर-मुक्तं कर्तुं वयं लक्ष्यं स्वीकृतवन्तः। अस्मिन् कार्ये प्रधानमन्त्रीणः मार्गदर्शनम् अस्मभ्यं प्राप्यते। अहं दरिद्र-परिवारात् आगत्य गत-नववर्षेभ्यः उपमुख्यमन्त्रिपदे कार्यं करोमि। निर्धनानां कृते चिकित्सां प्राप्तुं पूर्वं कियत् कठिनम् आसीत् इति अहं सम्यक् जानामि। पूर्वं जनाः चिकित्सालयेषु उपचारं न प्राप्नुवन्ति स्म अथवा ऋणभारे निमग्नाः भवन्ति स्म। प्रधानमन्त्री मोदी आयुष्मान-भारत-योजनाम् आरब्धवान्। अस्याः योजनायाः प्रभावेण अद्य प्रत्येकं निर्धनः चिकित्सालये उपचारं प्राप्नोति।

उपमुख्यमन्त्री अवदत् यत् ग्रामप्रधानेभ्यः मम निवेदनम् अस्ति—यूयं स्वेषु ग्रामेषु एतादृशं कार्यं कुरुत यत् भविष्ये यस्य समर्थनं करिष्यथ स एव ग्रामप्रधानः निर्वाचितः भवेत्। प्रधानमन्त्री मोदी निर्धनेभ्यः असहायेभ्यश्च एतावत्यः योजनाः प्रदत्तवान् याभिः तेषां दारिद्र्यं नश्येत्। महिलानां सशक्तीकरणाय अपि अनेकाः योजनाः प्रवर्तिताः, येन अद्य महिलाः स्वपादयोः स्थिताः सन्ति। ग्रामसभा-स्तरेऽपि महिलानां सशक्तीकरणाय कार्यं करणीयम्। अत्र उपस्थितेभ्यः सर्वेभ्यः ग्रामप्रधानेभ्यः मम आग्रहः अस्ति यत् स्वस्व-क्षेत्रेषु महिलाः सशक्ताः क्रियन्ताम्। सशक्तः भारतदेश: सशक्तम् उत्तरप्रदेशं च तदैव भविष्यतः यदा ग्रामसभाः सशक्ताः भविष्यन्ति। अग्रिम-समये ग्रामसभासु वेतन-प्रदानसम्बद्धः सङ्कटः अपि दूरीभविष्यति। सर्वे सङ्कल्पं कुर्वन्तु यत् ग्रामान् एतावन्तः सुदृढान् करिष्यामः यत् विकसित-भारतस्य आरम्भः ग्रामेभ्यः भविष्यति।

तेन उक्तं यत् वीबी-जीरामजी परियोजनायाः अन्तर्गतं ग्रामे ग्रामे विकसित-वातावरणस्य निर्माणाय वयं सङ्कल्पबद्धाः स्मः। द्वि-यन्त्र-सर्वकारस्य समीपे वित्तस्य कापि न्यूनता नास्ति। ग्रामप्रधानाः परिश्रमं कुर्वन्तु, वयं भवतां साहाय्यं करिष्यामः। अहं केवलम् उत्तरप्रदेशस्य विषये न वदामि, अपितु सम्पूर्णम् उत्तरभारतं विकासे पृष्ठतः न तिष्ठेत्—एवं सङ्कल्पं स्वीकुर्वन्तु।

Hindusthan Samachar / Divya Ranjan