Enter your Email Address to subscribe to our newsletters
डूंगरपुरम्, 17 जुलाईमासः (हि.स.)। राजकीयशिशुगृहे निवसन्त्याः परित्यक्तायाः बालिकायाः दत्तकग्रहणार्थम् एकस्यै एकलमात्रे (सिङ्गल् मदर्) समर्पणस्य निर्णयः कृतः। एतदर्थम् आयोजितायां दत्तकग्रहणसमितेः सभायां केन्द्रीयदत्तकग्रहणसंसाधनप्राधिकरणेन (कारा) चयनिता एकलमाता बालिकायाः अन्तरिमसंरक्षकरूपेण नियुक्ता।
बालाधिकारिताविभागस्य सहायकनिदेशकः डॉ. कल्पितशर्मा अवदत् यत् सभायां दीर्घकालात् प्रतीक्षारता चयनिता एकलमाता उपस्थिताभवत्। सा भावविह्वला भूत्वा उक्तवती यत् अधुना सा स्वदत्तकपुत्र्या सह परस्परस्य आधाररूपेण जीवनं यापयिष्यति।
सभायां बालकल्याणसमितेः अध्यक्षः भावेशकुमारजैनः तथा शिशुरोगविशेषज्ञः डॉ. गौरवयादवः एकलमातुः अभिलेखानां विस्तृतपरीक्षणम् अकुर्वन्। परीक्षायां सा बालिकायाः दत्तकग्रहणाय सर्वथा योग्येति निश्चिते दत्तकग्रहणसमित्या सर्वसम्मत्या बालिका अन्तरिमरूपेण तस्यै समर्पयितुं निर्णयः कृतः। ततः एकलमाता जिलामजिस्ट्रेट् देशलदानस्य पुरतः प्रस्तुताभवत्। जिलामजिस्ट्रेटेन तस्याः व्यवसायः, वार्षिकायः, मूलनिवासश्च ज्ञात्वा बालिकायाः उच्चशिक्षा उत्तमपालनपोषणं च सुनिश्चितं कर्तुं निर्देशाः प्रदत्ताः।
डॉ. शर्मा अवदत् यत् ‘किशोरन्यायः (बालकानां परिपालनसंरक्षणयोः) अधिनियमः, २०२१’ इत्यस्य अधीनं सम्प्रति जिलाबालसंरक्षणैककस्य माध्यमेन जिलामजिस्ट्रेट्समीपे अन्तिमदत्तकग्रहणादेशप्राप्त्यर्थम् आवेदनप्रक्रिया आरब्धा। आदेशस्य निर्गमनानन्तरं बालिकायै एकलमातुः जैविकपुत्र्याः सदृशाः सर्वे वैधानिकाधिकाराः प्राप्स्यन्ति।
शिशुगृहस्य प्रबन्धकः कुलदीपशर्मा अवदत् यत् ‘कारा’ इत्यस्य पोर्टलस्य नियमानुसारम् एका अविवाहिता महिला बालकं वा बालिकां वा दत्तकरूपेण स्वीकर्तुं अर्हति, किन्तु एकलः पुरुषः केवलं बालकमेव दत्तकरूपेण स्वीकर्तुं पात्रः अस्ति। सः अपि अवदत् यत् सम्प्रति पोर्टले सम्बन्धिदत्तकग्रहणस्य तथा सौतेलदत्तकग्रहणस्य वैधानिकमान्यतासम्बद्धा प्रक्रिया अपि प्रचलति।
अस्यां सभायां सामाजिककार्यकर्त्री जिमिकाभावसारः तथा परिचारिका मनीषाखराड़ी अपि उपस्थिते आस्ताम्।
बालाधिकारिताविभागेन सामान्यजनान् प्रति अपीलः कृतः यत् अनिच्छितान् नवजातशिशून् असुरक्षितस्थानेषु न परित्यज्य, शिशुगृहे अथवा जिलाचिकित्सालयस्थिते पालनागृहे सुरक्षितरूपेण स्थापयन्तु। विभागेन स्पष्टतया उक्तं यत् एवं कुर्वतः कस्यापि व्यक्तेः विरुद्धं काचिदपि वैधानिकी कार्यवाही न भविष्यति।
---------------
Hindusthan Samachar / Dheeraj Maithani