अनूपपुरम्, 17 जुलाईमासः (हि.स.)।

मध्यप्रदेशस्य अनूपपुरजनपदे प्रशासनिकस्थानान्तरणप्रक्रियासम्बद्धः विवादः शनैः गम्भीरतरः भवति। मध्यप्रदेशराज्यानुसूचितजनजात्यायोगस्य अध्यक्षः रामलालरौतेलः शुक्रवासरे मुख्यमन्त्रिणे पत्रं प्रेष्य जनपदस्थानान्तरणमण्डलस्य कार्यप्रणाल्याः विषये गम्भीरान् प्रश्नान् उपस्थितवान्।

सः स्थानान्तरणप्रक्रियायां संशोधनस्य मागं कृत्वा संचेतनाम् अददात् यत् यदि प्रशासनं द्विदिनाभ्यन्तरे आवश्यकसुधारान् न करोति, तर्हि सः कलेक्ट्रेटकार्यालयस्य पुरतः शान्तिपूर्णधरणायां उपवेष्टुं बाध्यः भविष्यति।

मुख्यमन्त्रिणे प्रेषिते पत्रे रामलालरौतेलः आरोपितवान् यत् जनपदस्थानान्तरणमण्डलेन प्रकाशितायां स्थानान्तरणसूच्यां शासनस्य मानवीयदृष्टिकोणस्य प्रचलितनिर्देशानां च अवहेलना कृता। तस्य मते प्रशासनिकविसङ्गतिभिः जनपदस्य शासकीयकर्मचारिषु असन्तोषस्य वातावरणं जातम्।

पत्रे विशेषतया दिव्याङ्गकर्मचारिणां, निर्वाचनसम्बद्धमहत्त्वपूर्णकार्येषु नियुक्तानां कर्मचारिणां तथा महिलाकर्मचारिणां स्थानान्तरणे अपेक्षिता संवेदनशीलता न दर्शिता इति विषये चिन्ता व्यक्ता। आयोगस्य मतानुसारं एतेषां वर्गाणां कृते शासननिर्धारितविशेषप्रावधानानां मानवीयाधाराणां च पालनम् अत्यावश्यकम् आसीत्, किन्तु स्थानान्तरणप्रक्रियायां तेषां समुचितं ध्यानं न कृतम्।

प्रकरणस्य गम्भीरतां दृष्ट्वा आयोगाध्यक्षेन मुख्यमन्त्रिणे, जनपदस्य प्रभारीमन्त्रिणे तथा सङ्ग्राहकाय (कलेक्टराय) पत्राणि प्रेष्य स्थानान्तरणादेशानां निष्पक्षसमीक्षायाः मागः कृतः। तेन अनुरोधः कृतः यत् नियमानां विरुद्धं निर्गताः स्थानान्तरणादेशाः त्वरितं न्यायसङ्गतरूपेण संशोध्यन्ताम्, येन कस्यापि कर्मचारिणः प्रति अन्यायः न भवेत् तथा प्रशासनिकप्रक्रियायाः पारदर्शिता गरिमा च अक्षुण्णा तिष्ठेत्।

रामलालरौतेलः स्पष्टतया उक्तवान् यत् तस्य उद्देश्यं कस्यापि प्रकारस्य संघर्षस्य उत्पत्तिः न, अपितु न्यायस्य पारदर्शितायाश्च सुनिश्चितीकरणम् अस्ति। सः पुनरुक्तवान् यत् यदि प्रशासनं आगामिद्विदिनाभ्यन्तरे आवश्यकसुधारान् न करोति, तर्हि आयोगः जनहितार्थं कलेक्ट्रेटकार्यालयस्य पुरतः शान्तिपूर्णधरणायाम् उपवेष्टुं विवशः भविष्यति। एतस्य सम्पूर्णप्रकरणस्य उत्तरदायित्वं तेन सम्बन्धितप्रशासनस्य जनपदस्थानान्तरणमण्डलस्य च उपरि आरोपितम्।

Hindusthan Samachar / Dheeraj Maithani