पलवले सद्यस्कप्रसारण कार्यक्रमे युताःजनप्रतिनिधयः

पलवलम्, 17 जुलाईमासः (हि.स.)। प्रधानमन्त्रिणा नरेन्द्रमोदिना जीन्दनगरात् देशस्य प्रथमायै हाइड्रोजनरेलयानाय हरितध्वजः प्रदर्शितः। विविधरेलपरियोजनानां लोकार्पणशिलान्यासयोः अवसरे पलवले प्रत्यक्षप्रसारणकार्यक्रमस्य आयोजनम् अभवत्। कार्यक्रमस्य शुभारम्भः हरियाणाराज्यस्य क्रीडाराज्यमन्त्रिणा गौरवगौतमेन दीपप्रज्वालनपूर्वकं कृतः। अस्मिन् प्रसङ्गे तेन उक्तं यत् भारतीयरेलविभागः निरन्तरम् आधुनिकप्रौद्योगिकीम् अङ्गीकृत्य नूतनकीर्तिमानानि स्थापयति, हाइड्रोजनरेलयानस्य सञ्चालनं च भारतं हरितस्वावलम्बिपरिवहनव्यवस्थायाः दिशि नूतनामभिज्ञानं प्रदास्यति।

कार्यक्रमे हथीनक्षेत्रस्य विधायकः मोहम्मदइसराईलः, होडलक्षेत्रस्य विधायकः हरेंद्रसिंहः, पूर्वमन्त्री जगदीशनायरः, पूर्वविधायकः प्रवीणडागरः, भाजपाजिलाध्यक्षः विपिनबैंसला, भाजपानेता हरेंद्रराणा, जिलाधीशः डॉ. जयेंद्रसिंहः, जनपदस्य वरिष्ठप्रशासनिकाधिकारिणः, जनप्रतिनिधयः तथा बहुसंख्यकाः गणमान्यानागरिकाश्च उपस्थिताः आसन्। सर्वे प्रधानमन्त्रिणः नरेन्द्रमोदिनः प्रत्यक्षसम्बोधनं श्रुतवन्तः देशस्य प्रथमस्य हाइड्रोजनरेलयानस्य शुभारम्भस्य ऐतिहासिकक्षणस्य साक्षिणश्च अभवन्।

मुख्यातिथिः क्रीडाराज्यमन्त्री गौरवगौतमः अवदत् यत् प्रधानमन्त्रिणः नरेन्द्रमोदिनः नेतृत्वे भारतीयरेलविभागः अभूतपूर्वपरिवर्तनस्य युगं अनुभवन्ति। रेलजालस्य तीव्रगत्या विस्तारः क्रियते, आधुनिकरेलयानानां सञ्चालनं वर्ध्यते, यात्रिकेभ्यः च विश्वस्तरीयाः सुविधाः प्रदीयन्ते। तेन उक्तं यत् हाइड्रोजनरेलयानं पर्यावरणसंरक्षणस्य दिशि महती पहल अस्ति, येन प्रदूषणस्य न्यूनीकरणं भविष्यति तथा स्वच्छऊर्जायाः प्रोत्साहनमपि भविष्यति।

तेन उक्तं यत् हरियाणाराज्यस्य कृते एषः गौरवसम्मानयोः विषयः अस्ति यत् देशस्य प्रथमस्य हाइड्रोजनरेलयानस्य शुभारम्भः अस्य राज्यस्य भूमेः अभवत्। एषा उपलब्धिः न केवलं हरियाणाराज्यस्य अपितु सम्पूर्णदेशस्यापि ऐतिहासिकी उपलब्धिः अस्ति। अनेन आधुनिकसुरक्षितपर्यावरणानुकूलरेलपरिवहनाय नूतना गतिः भविष्यति तथा रेलक्षेत्रे भारतस्य प्रौद्योगिकीयसामर्थ्यस्यापि प्रदर्शनं भविष्यति।

कार्यक्रमस्य अवधौ उपस्थितैः जनप्रतिनिधिभिः अधिकारिभिश्च प्रधानमन्त्रिणा राष्ट्राय समर्पितानां रेलपरियोजनानां स्वागतं कृत्वा एतत् विकसितभारतसंकल्पस्य साकारीकरणस्य दिशि महत्त्वपूर्णं पदक्षेपमिति अभिहितम्। सम्पूर्णकार्यक्रमस्य अवधौ उत्साहपूर्णं वातावरणम् आसीत्। उपस्थितैः जनैः रेलविभागस्य आधुनिकीकरणम्, हरितऊर्जायाः उपयोगः तथा आधारभूतसंरचनाविकासश्च देशस्य प्रगतेः सुदृढाधार इति प्रतिपादितम्।

---------------

Hindusthan Samachar / Dheeraj Maithani