— देशस्य स्वास्थ्य-संस्थासु आधारभूत-संरचनायाः विकासे विशेषं बलं भविष्यति।

चण्डीगढम्, १७ जुलाईमासः (हि.स.)। केन्द्रीय-स्वास्थ्य-मन्त्री जगतप्रकाश-नड्डा उक्तवान् यत् भारतम् अधुना विश्वस्य तेषु राष्ट्रेषु समाविष्टम् अस्ति, यत्र सर्वाधिकाः वैद्याः तथा चिकित्सा-व्यावसायिकाः निर्मीयन्ते। अतः अग्रिमेषु पञ्चवर्षेषु देशस्य स्वास्थ्य-शिक्षण-संस्थासु स्नातक-तथा स्नातकोत्तर-कक्षाणां कृते ७५ सहस्रं चिकित्सा-आसनानि वर्धिष्यन्ते। प्रथम-चरणे एव २५ सहस्रं आसनानि वर्धितानि सन्ति, येन भविष्ये देशवासिभ्यः अधिकाः वैद्याः तथा चिकित्सा-व्यावसायिकाः उपलब्धाः भविष्यन्ति।

जेपी-नड्डा शुक्रवासरे चण्डीगढ-नगरे प्रायः ४७००-कोटि-रूप्यक-व्ययेन निर्मितानां स्वास्थ्य-आधारभूत-संरचना-विकास-परियोजनानाम् उद्घाटन-शिलान्यास-कार्यक्रमे सम्बोधनम् अकरोत्। नड्डा अवदत् यत् वर्षे २०१७ निर्मिता राष्ट्रीय-स्वास्थ्य-नीतिः समाजस्य अन्तिम-पङ्क्तौ स्थितस्य जनस्य हितस्य विषये चिन्तां कृतवती। सा पूर्वतन-स्वास्थ्य-नीतेः सर्वथा भिन्ना आसीत् तथा तस्याः दृष्टिकोणोऽपि भिन्नः आसीत्। सा व्यापक-समावेशिनी स्वास्थ्य-नीतिः आसीत्। तस्याः उद्देश्यं केवलं रोगिणां उपचारः न, अपितु रोगाणां निवारणमपि आसीत्।

तेन उक्तं यत् स्वास्थ्य-क्षेत्रे देशेन अभूतपूर्वा प्रगतिः कृता। अधुना देशे १ लक्षं ८५ सहस्रम् आयुष्मान-आरोग्य-मन्दिराणि सञ्चलन्ति। पूर्वं यत्र देशे केवलं ३८७ चिकित्सा-महाविद्यालयाः आसन्, तत्र अधुना १ लक्षं ३८ सहस्रं स्नातक-आसनानि तथा ८१८ चिकित्सा-महाविद्यालयाः सन्ति। अधुना देशे २३ अधिकाः एम्स-संस्थाः कार्यरताः सन्ति। आयुष्मान-भारत-योजना अधुना विश्वस्य सर्वात् बृहत्तमा चिकित्सा-आवरण-योजनारूपेण सिद्धा अभवत्, यस्याः माध्यमेन ९०-कोटि-देशवासिभ्यः आयुष्मान-परिचयपत्राणि प्रदत्तानि सन्ति। अनेन प्रत्येकं नागरिकस्य स्वास्थ्य-विवरणम् एकेन क्लिक-माध्यमेन उपलब्धं भविष्यति।

नड्डा अवदत् यत् अग्रिमेषु कालेषु चण्डीगढ-पीजीआई संस्थया सह देशस्य सर्वासु एम्स-संस्थासु तथा अन्यासु स्वास्थ्य-संस्थासु आधारभूत-संरचनायाः विकासे विशेषं बलं प्रदास्यते।

Hindusthan Samachar / Divya Ranjan