देहरादूनम्, १७ जुलाईमासः (हि.स.)। उत्तराखण्डस्य मुख्यमन्त्री पुष्करसिंह-धामी शुक्रवासरे घोषणाम् अकरोत् यत् उत्तराखण्डः देशस्य प्रथमं राज्यं भविष्यति, यत्र सेवानिवृत्तानाम् अग्निवीराणां पुनर्वासाय तथा विविध-सर्वकारीय-योजनानां लाभप्रदाय विशेषः ‘अग्निवीर-प्रकोष्ठः’ स्थापितः भविष्यति। सहैव पर्यटन-विभागस्य होमस्टे-योजनायाः अन्तर्गतं पूर्वसैनिकेभ्यः अग्निवीरेभ्यश्च विशेषानुदानमपि प्रदास्यते।

देहरादूनस्य कुआँवाला-स्थिते यूथ-फाउण्डेशन-प्रशिक्षण-परिसरे आयोजितं ‘युवा-अग्निवीर-संवाद’ कार्यक्रमम् सम्बोधयन् मुख्यमन्त्री उक्तवान् यत् सीमावर्ती-ग्रामेषु स्थानीय-निवासिभ्यः, पूर्वसैनिकेभ्यः अग्निवीरेभ्यश्च स्व-रोजगारेण सम्बद्धानां आधारभूत-सुविधानां विकासाय अपि विशेषानुदानं प्रदास्यते। तेन उक्तं यत् सेनायां सेवा प्रदातुं गच्छतः प्रत्येकस्य युवकस्य सम्मानजनकं भविष्यं सुनिश्चितं करणं राज्य-सर्वकारस्य प्राथमिकता अस्ति।

मुख्यमन्त्री उक्तवान् यत् राज्य-सर्वकारेण सेवानिवृत्तेभ्यः अग्निवीरेभ्यः आरक्षक-विभागे, वन-विभागे, आपदा-प्रबन्धन-विभागेन च सह विविधासु सर्वकारीय-सेवासु १० प्रतिशतं क्षैतिज-आरक्षणम्, अधिकतम-वयोसीमायां शिथिलता, नियुक्ति-प्रक्रियासु प्राधान्यं च प्रदत्तम् अस्ति। तेन उक्तं यत् अग्निवीरत्वं केवलं रोजगारः न, अपितु राष्ट्रसेवायाः सर्वोच्चः अवसरः अस्ति।

धामी उक्तवान् यत् बलिदानी-परिवाराणां सैनिक-परिवाराणां च कल्याणार्थं राज्य-सर्वकारः निरन्तरं कार्यं करोति। शहीद-परिवाराणां अनुग्रह-राशिः १० लक्ष-रूप्यकेभ्यः वर्धयित्वा ५० लक्ष-रूप्यकाणि कृता। आश्रितानां सर्वकारीय-सेवायां समायोजनम्, सर्वकारीय-नियुक्त्यर्थम् आवेदनस्य समय-सीमां द्विवर्षेभ्यः पञ्चवर्षपर्यन्तं वर्धनम्, वीरता-पुरस्कार-प्राप्त-सैनिकानां सम्मानस्य वृद्धिः इत्यादयः उपायाः अपि स्वीकृताः। युद्ध-विधवाभ्यः, दिव्याङ्ग-सैनिकेभ्यः तथा पूर्वसैनिकानां सम्मानजनक-अन्त्येष्ट्यर्थम् अपि आर्थिक-सहायतायाः व्यवस्था कृता अस्ति।

मुख्यमन्त्री उक्तवान् यत् सः स्वयम् एकस्य सैनिकस्य पुत्रः अस्ति तथा सैनिकानां अनुशासनं, त्यागं, राष्ट्रसेवा-भावनां च बाल्यकालादेव पश्यन् आगतः। तेन उक्तं यत् प्रधानमन्त्री नरेन्द्रमोदिनः नेतृत्वे उत्तराखण्डः विकासस्य सुशासनस्य च मार्गे तीव्रतया अग्रे सरति। समान-नागरिक-संहितायाः, कठोर-नकल-विरोधि-विधेः तथा नियुक्ति-प्रक्रियायाः पारदर्शितायाः उल्लेखं कुर्वन् तेन उक्तं यत् गत-पञ्चवर्षेषु राज्ये ३४ सहस्रेभ्यः अधिकेभ्यः युवभ्यः सर्वकारीय-नियुक्तिः प्रदत्ता।

तेन उक्तं यत् उत्तराखण्डे मदरसा-बोर्ड इति समाप्तः कृतः तथा सर्वेभ्यः गुणवत्तापूर्ण-शिक्षायाः मार्गः प्रशस्तः कृतः। राज्य-सर्वकारः कृषि-पर्यटन-रोजगार-स्वरोजगार-प्रवर्धनाय विविधाः योजनाः सञ्चालयति। गत-चतुर्षु वर्षेषु चारधाम-यात्रा, आदि-कैलाश-यात्रा, शीतकालीन-यात्रा च सहिताभिः विविध-पर्यटन-गतिविधिभिः २४ कोटिभ्यः अधिकाः पर्यटकाः उत्तराखण्डम् आगतवन्तः।

अस्मिन् कार्यक्रमे विधायकः बृजभूषण-गैरोला, यूथ-फाउण्डेशनस्य संस्थापकः कर्नल (सेवानिवृत्तः) अजय-कौठियालः, मेजर-जनरल (सेवानिवृत्तः) गुलाबसिंह-रावतः, जनपदाधिकारी डॉ. आशीष-चौहानः, एसएसपी प्रमेन्द्र-डोभालः इत्येतै: च सह अनेके गणमान्यजनाः उपस्थिताः आसन्।

Hindusthan Samachar / Divya Ranjan